شبكة المضايف الأدبية والثقافية

شبكة المضايف الأدبية والثقافية (https://mdyf.net/vb/index.php)
-   مضيف دواوين شعراء المضايف (https://mdyf.net/vb/forumdisplay.php?f=11)
-   -   ديوان الشاعر / عبدالمحسـن المسعودي (https://mdyf.net/vb/showthread.php?t=17617)

رياض الهديرس 07-10-2010 06:12 AM

ديوان الشاعر / عبدالمحسـن المسعودي
 
(الخـيزران )


.


اسعد الله ليلة الميعـاد والملـح وزمانـه=يامسى الياقوت لاحمر على جيدك وغنـا
والهبوب اللي نثر قذلة وميـل خيزرانـه=ويش عذر الخيزران من الهبوب اليا تثنا
كل ماتلعب به النسمات يشفع لـه ليانـه=التهى شاعرك فيك بشوف خدك ماتهنـا
احسب انه برق لوح لي ضياه وعنفوانـه=لين شفت الخد منا والمـح البـراق منـا
جادل لاحرك المعلوق بمـزوح وميانـه=كم تبادلنا العبث بعنادنا كم ضـاع منـا
قلت لك لاتفتح البيبان يصـرخ سنديانـه=قلت لك والليل طرف وآخر الزوار حنـا
ان فهقت الشال والمجدول مايستر مكانـه=خلني اروي ضما عاشق وجاه اللي تمنـا
لاتسمي طيحة العقد وخلاخيلـك خيانـه=الخيانه لانزعنا اخلاقنا والصـدق عنـا
ماتركتك تزبن الخفـاق الا انـك امانـه=وانت خابر نشرب الموت ونزبن من زبنا
ارحل وحقك علي اجيك يامرهف ثمانـه=اما انا حقي عليك انشد هل التاريخ عنـا
مر حيين الذمم واحتك باطهرهـم ديانـه=يخبرك كيف العذارى من فعايلنا عشقنـا
ياولد عم الحرير الحر واخضر طيلسانه=ياعناقيد ثمرهـا ميـل الغصـن وتدنـا
كنك التاج المرصع وارتكازة صولجانـه=ليه ادور لك شبيـه بشامنـا والا يمنـا


.


رياض الهديرس 07-10-2010 06:22 AM

مشـاريه وحقوق
 
( مشـاريه وحقـوق )


.


لنا على الدنيا مشاريه وحقوق =ضاقت بصوت المستغيث المنادي
والبير شح بماه ياحادي النوق=لاتنتخي بمكبلات الايادي
طالت على يد الطهاره يد البوق=شفني تعبت ولاعتقني قيادي
اول ضحاياها عصافير وعذوق=وانا حدتني للشتات انفرادي
صحيح هالايام ماعندها ذوق=فيها اغتيالات المفاهيم عادي
من صابني وادمى من الصدر معلوق=مدري زناد الغير ولا زنادي
بوح المشاعر لوملا نزفه السوق=مفتوح باب السمسرة بالمبادي
يامن زعلت ولاحت بعينك بروق=حزني بوادي وانت حزنك بوادي
لايحزنك بيت لشاعرك مسروق=الحزن الاعظم لاجفتني بلادي
انا وطن من وين مارحت ملحوق=ازرع ويشبع جوعهم من حصادي
اما انت لك صدر التباريح مفتوق=لافاض تعرف ليه سر ابتعادي
الشوق لاعاند لك الله مهو شوق=وانا خلقت وراسي مالي عنادي
الشوق شوق الصوت لاصارمخنوق=بين الحناجر واصبح الصوت غادي
ماعاد هي شرهات عاشق ومعشوق=رميت عن كل الهقاوي شدادي
يشدني طاروق واشيل طاروق=ويحدني ياحادي العيس حادي



.

رياض الهديرس 07-10-2010 06:29 AM

العبـرة
 
يالعام الاول طعونك طابت العام=وآخر طعونك سترته بابتسامة
والعبرة اللي ندمها عضة بهام=عضة بهامي من العبرة ندامة
كنيتها خوفة الحاسد ولوام=كنت احسب الدمع ياصل للكرامة
تزاحمت بالخفوق وصارت انغام=اثر انتصار العباير بازدحامة
حول غزير السحاب وغرقة اكمام=ولاغصن خضر ولا غنت حمامة
بوحي وظبي العدامة تالي حطام=ولابوح باقي ولا ظبي العدامة
وطيحة ثمنها جواد وضيعة لجام=ماهي بسلامة قريب من السلامة
يالمترف اللي حبست اللول بالثام=وضيك توايق من فتوق الغمامة
لك بالمحاني بياض وتالي اقلام=في كل الاوراق تلقالك علامة
لك بالمحاني قصيد ودمع واحلام=وساحل ومينا وبحرين ومنامة
يامدلهم الهدب واهدابك الهام=ياسبة الجرح واسباب التئامة
توك على البال اهوجس فيك بهيام=وحكي التعاليل عن قذلة وشامة
مرات ترمي زمام وتلبس زمام=وتسخر من العقد لاشك بمقامة
سكر سنين الشتات وملح الايام=ياشمعة الليل ياسيد ظلامة
ادمت خفوقي مشاريهك ولانام=وجربت حرب المضامي واحتدامة
سجيت الاقدام والا ادميت الاقدام=حزن الشمالي مبين من كلامة
لاجاك عني سفيه وفي خبرهام=اخذ الخبر بس طالع في ختامة
تلقاه ارعن ذليل ويرضي اقزام=وهذا دليل انتصاري وانهزامة




.

فــرج الـبـلاز 07-10-2010 06:44 AM

الشاعر رياض الهديرس

الف شكر لك على نقل لنا ديوان الشاعر القدير عبد المحسن المسعودي

شاعر غني عن التعريف تسلم وبيض الله وجهك وسجلني من متابعين هذا الأبداع

تقبل تقديري

رياض الهديرس 07-10-2010 01:30 PM

ثورة التصحيح
 
( ثورة التصحيح )


.



نهابة الريـح تدحـم صافنـات الجيـاد=قحوم قبا طويلة سـاق ضافـي شليـل
قدح الحوافر على الصوان قدح الزنـاد=عشق النبي الذبيح ابـن النبـي الخليـل
ابطت وهي ماستثارت مجدبات الحمـاد=اعنهـا باللجـام وتركـب المستحـيـل
في معركة ثورة التصحيح حمي الطـراد=والعز روس الاسنـة وامهـات الفتيـل
لاني بالاخطل ولاحسان بس الـو كـاد=آرد على العد لامن هـاب منـه الذليـل
عرفت من قصة البردة وبانـت سعـاد=ماهز غصن المشاعر غير شعر جزيـل
أهل العزايم تزيد اصرار وقـت العنـاد=اللـي تنـوخ نهـار النايبـات وتشيـل
الشعر حرر يديـه محمـد مـن القيـاد=شيمة اصيل فلاحي وانتخى بـه اصيـل
ماضاعت الأندلس لولا وقـوف الحيـاد=ولايبلغ المجد من يرضى لمجـده بديـل
ياألسن الإفـك ماضـر البعيـر القـراد=يبقى المصقل حبيس الغمد واسمه صقيل
لاكـرم الله وجيـه تستغيـب العـبـاد=لوقلت حاتم كريم تقـول حاتـم بخيـل
ماللخفايف بوجه الريـح غيـر النفـاد=اما الرواسي بوجـه العاصفـة ماتميـل
واهل الشداد استعـادت حقهـا بالشـداد=تعال واعطيك صـدق البينـة بالدليـل
شفني حمم لاستثارت بي حروف المـداد=يغص بي أرخبيـل ويلتهـب أرخبيـل
اصحي الليل من غفوة عيـون السهـاد=واقوم الصبح لو ّ الصبـح نومـه ثقيـل
اما قصيدي نخيل اعطيه صـدري بـلاد=ولا قصيدي بلاد أعطيه صدري نخيـل
لعيون داري وربعي والسـرى والهجـاد=كفرت بالصمت في ميدان صوت الصهيل
إن ما تسامت حروفـه للنجـوم البعـاد=ماجيت عابر سبيل ورحت عابر سبيـل
أنا امتداد السحـاب وللسحـاب امتـداد=أنا سقيت السنابـل واستحـق الحصيـل



.

رياض الهديرس 07-10-2010 01:40 PM

ذمة الأطـلال
 
( ذمة الأطلال )





.


قفا لنبكي بيـن الاطلال لحظات= في ذمة الاطلال حلم خسرته
هنا غداة البين سوت بنـا سوات=طاح اكثري وقت الرحيل وعذرته
كنيت صوتي وامتلا صدري اصوات=كن الصبر ثوب عتيق استعرته
اشرب مرار من غير سكرات=واحيان قبل اشرب مراره سكرته
مبطي وترحالي من الذات للذات =بيني وبيني الف بحر وعبرته
الخوف يشفع للحذر والتلفات=وانا لـو ظلالي تلفت حقرته
الحلم حي وسيد الحلم مامات=مازال يكبر بي مثل ماخبرته
هزيت بيبانـه وصحيـت الاهات=وانهـل دمـع مابعمري ذخرتـه
واخضرت غصون الحزن والمعاناة=والصمت ليّل بالضلوع وسهرتـه
كل اكثري تلعبّـه الريح لاجات=يامـن يجمعني ليـا من ذكرتـه
لو كنت اعرفه خامس الاتجاهات=ماشفته بكل اتجاه ونحرته
وجـه خسرته ساقني للنهايـات=ظالم ولكن فـي النهاية شكرته




.

رياض الهديرس 07-10-2010 01:45 PM

نـجـد
 
( نجــــد )



.

يانجد لاعدى من الليل ثلثين=الشعر يامر والمحاني تطيعه
طبعك تغير ماخبرتك تصدين=وعمر التطبع مايسمى طبيعه
وقتك ثقيل وساعتك عن نهارين=وكنا نحسب ان الدقايق سريعه
بينك وبين طويق وبيوته الطين= وترابه الطاهر وحكم الشريعه
خلفة معزي وامتداد الامامين=صفوة هلا العوجا حرار الطليعه
اكرم من الهداج واثقل من الدين= واصدق من البارود واكثر قطيعه
واقسى من الحرمان لافرق اثنين=واصعب من الردات يوم الوديعه
الصيرمي ابتع من سيوف حطين=من سطوته صدت سباع مجيعه
سترى العذارى فيصلي الذراعين= بيوم يخليه الفزيع لفزيعه
يخلي ميادين ويملا ميادين=مقدم شجاعه للصقور الشجيعه
نهر تفرع من مصبه بساتين=وبين على وجه الهيافا ربيعه
الله يردك عيد قلب وفرح عين=ياعيد ثالث لرمضان وتبيعه
فرحة نخل طيبه وصخرة فلسطين=وطهر المأآذن والنفوس الرفيعه
بيض الايادي رافقت قولة آمين= لادنقت سمر الجباه بخشيعه
يامفخرة عز الوجيه الميامين=يامرعف خشوم الغدر والهزيعه
سألت بقدومك خفوقي سؤالين=وحملت نفسي فوق ماتستطيعه
خبر قدومك في وجيه المذيعين=تدري فرحنا به قبل لاتذيعه
واقول لاهبت رياح الخماسين=منهو لنا شم الحصون المنيعه
لاغبت يامزلزل عروش السلاطين=يضيع فينا كل درب ونضيعه
لامن فضا ياسع فروخ الشياهين=ولافي السعوديه فجوج وسيعه




.

رياض الهديرس 07-10-2010 01:52 PM

مرثيـة الإحسـاس
 
( مرثيـة الإحسـاس )


.

خان جرد الفيافي كذب وسميته=وانتحى بارق المزنه وتباعته
الاحاسيس تولد بعضها ميته=لاحيا بعضها ساعه دنت ساعته
بانت من امس نية بوق ومبيته=في صدور صدفها الصدق بس باعته
مابغيت انشد الغدار عن جيته =في طريق تسيد فيه قطاعته
خابر وش وراه وخابر نيته =وعارف اقصى مداه وعارف بضاعته
مكسب الشعر بانصافه وحريته=جوع صدق المشاعر شوق لاجاعته
مس الاصفاد واستعباد قدسيته =اسمنه مستجير بصدر فزاعته
تستحق حفلة التأبين مرثيته =مهزلة قمع بين يدين قماعته
للحبر يارقيق الحرف سريته=لاتشرع شبابيكه لطماعته
شف هجير المسامع يحتري فيته =لابغى البوح تسكت غصب سماعته
وانت صمتك صداه وصبح عيديته =انت نفحة عبيره وانت ذعذاعته
مرتعه زيزفونه ملح وصفيته=بحره اللي ينام الدر قي قاعته
انت دافي شتاه وبرد صيفيته =وانت ذنبه وغفرانه وشماعته
انت ابلغ حروفه وانت رجعيته =يوم تعصي عليه ويوم في طاعته


.

رياض الهديرس 07-10-2010 01:57 PM

جيـوش الكلام
 
( جيـوش الكـلام )



.


تو ماطابت لياليك يالعد القديم = واسفهلت واينع الحرف واكتض الزحام
يوم فاق الشعر من نومة اصحاب الرقيم =عيدت بقدومة الضاد وجيوش الكلام
مرحبا يالهاجس الضيف يالوجه الحشيم =منزلك بين الحنايا ولك قدر ومقام
العهد بك غبت بغياب مزعلة الحريم =ملهمة بوح ٍ عرف عقبها عض البهام
كل ماجيت اشعلك في محاسنها واهيم= التهيت بنشوة الحلم عن هاك اللئام
واعتليت بصهوة محجل صافي أديم = واتنومس في لقا مروية ريش النعام
ادحم كتوف الكريمين يالله ياكريم = كل رجل له طموحات يطمع بالسنام
من مزون اقلامنا تلقح الريح العقيم =يستفيض النور منها عقب شرب الظلام
اشرقت وضح النوايا على الليل البهيم= في فجوج تنبت العشق وتصافح غمام
عشق من صادق غلاها تسلطن بالصميم =هي بدايات المحبه وهي مسك الختام
لاسرق غفواتي الهم والا شفت ضيم =ارتميت بحظن من تجلي همومي وانام
ديرتي مهد النبوه وزمزم والحطيم =خصها الله بالمدينه وبالبيت الحرام
فضة المشرق تعدت ليا قوت العتيم =سولفت له عن سفرها وعن طيب المقام
شامخة ماهزها كل افكاك أثيم = جاهل مأموم يدفع ثمن جهل الامام
ماتمنت مهبط الوحي زلات الخصيم = وان تمادى تايه الراي جردنا الحسام
في مواسم طيحة الروس لاشاب الفطيم =نحتدم والله خلقنا صواريم احتدام
نخبره وش يفرق الخوف عن صبر الحليم = شاف وسع صدورنا يحسبه برد وسلام
سلمنا وقت الغضب يلبس ثياب الجحيم = من جنح نجنح له بغصن زيتون وحمام
نستعين بوارث الملك ذو العرش العظيم=وقفة بالعز ساعة ولا ذل الف عام



.

رياض الهديرس 07-10-2010 02:19 PM

أعتـذر ليـه
 
( أعتـذر ليـه )


.


اول الدرب كانت خطوته غير=أنحره بالرجا والدرب توه
علك ليا ركبت الريح ياطير=تلتفت ويحصل لي منك خوه
ليلة البارحه ليلة مخاسير=ومن تسامى تخلى عن سموه
وان كتب لي وصادفتك على خير=كل شي تبي تسويه سوه
اعتذر ليه وعلومي مغاتير=وانحدر ليه والحلم بعلوه
وليه ماضمى وانا مضيعك يالبير=وليه مااجزع من الهاجس ونوه
وليه ماشره ولي حشمة وتقدير=غادي الراي خله في غدوه
ساهي الطرف ياكثر المعاذير=غادي الراي خله في غدوه
لاعدوي ولا والله يبي يصير=طيّب القوم يعرف من عدوه
يابعد هامتي عن نافخ الكير=ليه ما صد عن جاهل تفوه
لايداحمك بافعال المناعير=ولايواجهك باخلاق النبوه



.


الساعة الآن 03:16 PM.

Powered by vBulletin Version 3.8.7
Copyright ©2000 - 2024, Jelsoft Enterprises Ltd Coupotech
HêĽм √ 3.1 BY: ! ωαнαм ! © 2010