انا عيوني مـن دموعـي عميتهـا=من يوم فرقى نور عينـي رأيتهـا
حدتني الدنيا علـى غيـر رادتـي=وتهدمـت احلامـي اللـي بنيتهـا
وشلون ابصبرعن حياتي ومهجتـي=وشلون ابنسى أيام معها قضيتهـا
والله مافارقـت خلّـي برغبـتـي=مير الظـروف القاسيـه ماقويتهـا
كل المصيبه مـن ديـونٍ تراكمـت=راح العمـر . أسـدد وماقضيتهـا
كم مرةٍ راعـي المطاليـب حدنـي=ولرضاه انا زدت الديون ورثيتهـا
اساير الدنيا علـى شـان سمعتـي=وافراج ربـي مايأسـت ورجيتهـا
صحيح لي ربـعٍ يفكـون ضيقتـي=ويلان تفزع لاانعسـرت ونخيتهـا
هم فرحتي لاضاق صدري وعاضبت=دنياي وان كثرت همومي نصيتهـا
ربعي هل الطولات عزّي وسلوتـي=بوجودهم كـل المصايـب نسيتهـا
ويـلان ربعـي للـوازم ذخرتهـم=هم السعد كـان السعـاده بغيتهـا
ربعي وانا في طيبهم دايـم افتخـر=وبأفعالهم روس المعالـي رقيتهـا
ادري بطيب عيال وايـل وفعلهـم=لوعـات قلبـي تنجلـي لادعيتهـا
لكن بلايـه يلجـم لسانـي الحيـا=وكلمات راعين الشماتـه خشيتهـا
ابـي اتصبّـر ليـن ربـي يحلهـا=واحاول اسعد يوم عمـري لقيتهـا
حبيت انا دنيـاي مـن زود حبهـا=وعشقت حيٍ منبنـي فيـه بيتهـا
قلبي غدتبه جادلن تسلب الحشـى=ريميـةٍ معهـا الحيـاه اهتويتهـا
اغليت انا كل القبيله مـن اجلها=حيينهـا والفيـن رحمـه لميتهـا
هي منيتـي بيـن الغناديـر كلهـا=قبل المعرفه جابني طيـب صيتهـا
بنت الشيوخ ويرفع الراس اصلهـا=والله لو تطلـب عيونـي عطيتهـا
هايم بها وامـوت فيهـا واحبهـا=ومن اجلها كل الصعايـب مشيتهـا
ياما على الهاتف سهرت ونطرتهـا=وان طولت عافت عيونـي مبيتهـا
وياما كوتني بالتغلـي مـع الدلـع=وياما بعد في نـار حبـي كويتهـا
كم مرةٍ ناديـت وانطـق بأسمهـا=وكل ماطرت لي نور عيني بكيتهـا
اللي احتوتنـي بالحنـان بغرامهـا=من قلب صادق بالحنان احتويتهـا
يازين ضحكتها ويازيـن صوتهـا=فديتهـا يانـاااااااس والله فديتهـا
لو املـك المطلـوب والله لاادفعـه=ولو ينغزى بهالوقت يمكن غزيتهـا
هي دنيتي صارت وهي كل مطلبـي=وامـوت ياربعـي اذا ماخذيتـهـا
بحـر الهلالـي اهتويتـه وشدنـي=وعليـه قيفـان القصيـده بديتهـا
شكيـت هـمٍٍ بالضمايـر يلوعنـي=وقلـت الحقيقـه كلهـا ماكميتهـا
الاطرق بن بدر الهذال
|