ان جيت لك والا بعد رحت ماجيت
خلك شمالي كل صدرك رحابه
ماجيت عاني يم دارك وصديت
ودخلت في دارك وصكيت بابه
وقفت اخيل البرق بالعين وقفيت
يسرني برقه بعرض السحابه
ادري لو اني جيت ياراعي البيت
الفي على عزه وقدر ومهابه
وش عاد لو بينت بعضه وخفيت
ساق القلم هجوسنا للكتابه
اخترت من بعض المعاني وخليت
وحرفا مميز سهم الافكار صابه
ماتدري ان الحي يبكي على الميت
ويشفق على دارا حواه ومشابه
ياخوي انا تالي زماني تنحيت
ومثلي اليا يروح يطول غيابه
انا سبقتك بالاشاره ورديت
وترى الحروف اخوان لو ماتشابه
مشيت في طول البسيطه ولفيت
حافي قدم عطشان يطرد سرابه
مريت ماوقفت لحظه وعديت
اشوف بعيوني سحاب وضبابه
ماتمت الهقوه على ماتمنيت
ظرفا حداني ماحسبنا حسابه
في حرف شعري ماكتبت وتعاليت
عبدا فقيرا مايوفر زهابه
احسنت ظني بالولي يوم ظنت
الواحد اللي ماقطعنا الرجابه
مساعدالمزعل
|