أخواني زوار/اعضاء شبكة مضايف عنزه
السلام عليكم ورحمة الله وبركاته
يسعدني ان اقدم بين ايدكم ديواني المقروء واللذي اجمع به كل قصائدي باذن الله
امل واتمنى ان تجدو به مايليق بذائقتكم وحسن قبولكم ويشرفني
زيارتكم فمن هنا احييكم ولكم مني الشكر والتقدير على
الزياره لهذا الديوان لكم اطيب واجمل تحيه
لادقت أجراس الخفوق وتضايقت=اطلقت جنحان الوهس في قصيده
داعبت عذبات المعاني وعانقت=بيض السحاااااايب وامطرتني جليده
الاعب اطروق القوافي اذا اشتقت=الين ما القى جملتين مفيده
اتبلسم اجروح الزمن ون تحققت= القى بها الفين عله جديده
ان طحت من هامة مرادي تسلقت=ارقى على روس الرجا لو بعيده
ما أذكر اني لقامة الياس دنقت=شامخ ولو بعض الليالي عنيده
مادام انا ليامي السود علقت=بيرق سلاااام وتعتبرها مكيده
ماتدري اني بكاس الامرار لو ذقت=اروي مرارتها بروح العقيده
لاتفكر اني يازماني تعلقت=روحي ولو ذاقت عناها سعيده
كلما هبط من عزمي الوقت حلقت=واضحك ولو بين المحاني وقيده
وياصبحي اللي كل ماجيت واشرقت=قل لليالي يافجر وش تريده
وقل لزمان انك عليه تفوقت=عمر العصى ما تكسر ابسط حديده
مدام بيني وبين الاحلام فرقت=ماعاد باقي شي فيني تزيده
سعيده سهرتي معها ( قلام الشعر والتلوين )=بسكون الليل وبصمته تناجيني واناجيها
يداعبها الهجوس اللي يسولف بين حين وحين=تقول النفس مافيها وتكتب كل مافيها
تجف وتطلب المسرى واقول ارجوك لا تكفين=شعورالقلب راعيها وشوفي حال راعيها
وأنا توي بديت اكتب على الدفتر أبو ستين=وبعده لوحة الصوره باواسيها واساويها
بما انه هروب الذات لاهو يوم او يومين=ضروري مابقت فيني حياه إني اسليها
وبما إني عجزت اقوى طعون الوقت با السكين=وأجابه قوة ايامي إذا صالت مغازيها
حكاية هوية الفارس تجي جمله على قوسين=لبيب الفكر يفهمها وابوها اللي يسميها
وانا والله لامطلوب دم ولا عليّه دين=ولكن فيني الأعظم بصدر الصدر مخفيها
على النيه امشيّها ولا اعرف ها النهايه وين=مشيت السكه البيضأ وابا اصل لين تاليها
أنا أنا مثل ما انا على الفطره من التكوين=مافيني ميزه ابنفسي على غيري مخبيها
اذا طالتني الغلطه اعدي وحده وثنتين=واذا طفح كيل السبل قطعت احبال طاريها
مدام اني حفظت العهد والمبدا وساس الدين=كسبت رجال حية بي وأنا با المثل احييها
ياعناد انا لوغبت عنها فلا غبت=أشوفها ياعناد في كل ظيقه
ابعدت عنها يوم طحت وتصوبت=وخليت رجلي مثل فكري طليقه
انا ادري اني بحقها والله اذنبت=واكبر خطاي اني كتمت الحقيقه
في حقها وفي حق نفسي تسببت= اجروح تنزف كل وقت ودقيقه
الجوف في جوفي نبت حبها نبت=اليا طرت لي تشتعل بي حريقه
ان جيتها جمعه لوزم اشطف السبت=لاصار ماعندي حلول وطريقه
ياعناد شفني من غثى الوقت شيبت=ون كان باقي بي صبر ما اطيقه
قصيده رداً على الاخ الشاعر/ تركي بن عبدالله العنزي
مع الخط جتني ريحة الورد والنوار=ولو فز بي هاجوس الاشعار ما الومه
يطيب القصيد وليله العذب يا السّمار=ولا يطري المسرى ولا تطري القومه
ابى احاكي انجوم السماء واظهر الاخبار=ولاهي غريبه واحد ايكلم انجومه
وصلني كتابك يا الشمالي مع الافطار =وانا تِطرب افكاري مكاتيب مفهومه
وانا اقول ياتركي هلا مرحبا مليار=عدد ماسرى التفكير من حايل لدومه
وعدد ماتبشرنا بروق السماء با امطار=وعدد مابها الدنيا مخاليق مظلومه
هلا ياشبل وايل هلا يا فتى الأحرار=هلا يا رفيق(ن)تعتبر قومنا قومه
تبى الصافي الصافي وكنه حليب ابكار=تبى العلم ياتركي على طرق منظومه
ترى الوقت مو وقتك ولاهو زمان اخيار= الافواه ملجومه والايدين محزومه
ترى طيب المبدا شفه عايش(ن)بشهار=بعد ماعطى للوقت نظرات مشئومه
ترى الصادق الوافي تزاحم به الافكار=بعد ما جته صفعه على الوجه ملطومه
واذا الضيقه اللي جتك من واحدن ثرثار=قل لعزتك ما انتي للاشكال ملزومه
يضيع الكلام وتبتلش منه الاشعار=عجزنا نعرف الوقت مع طابع اسلومه
أنا أذكر من أول فياض البلاد انهار=بزمان الوفأ والطيب ماهي ابمحرومه
عسى الله يهدينا مع اعباده الأبرار=ويثبّت انفوس عْن الخطاء غير معصومه
أشوف الحب با أعيونك يقول أحذر تخون الحب=وأحس الوّد في قلبي يقول ابـداً فـلا اخونـك
بنضراتك تحاكينـي تقـول ان السفـر قـرّب=وأقول بنضرة أعيوني أنا ما اصبر عن أعيونك
انا أقراء كلمة النضره وكلمة عيـن ماتكـذب=وأنا تلعب بي أعيونك دخيلك بي علـى هونـك
كفايـه لا تولّعنـي تـرى قلبـي بـدأ يتعـب=أعيونك هرجها دافي الا يا اعيـون مجنونـك
لو ابعد عنـك واسافـر لوابعدعنـك واتغـرّب=ترافقنـي خيالاتـك وقمـرى لونهـا لـونـك
يذكرني بك المغرب وريح الورد لامـن هـب=وتذكرني بك اجروحي تذكـر قلـب مطعونـك
ولامن هزني شوقي أخذت من الورق واكتـب=قصيد يترجم أحساسي وأقول اللي حصل دونك
شعلة اشموع وقناديل
حبك كما فجر(ن) طرد عتمة الليل=جلاّ ظلامه واستحل بشعاعه
جاني إبلا موعد وحلحل بي الحيل=وجيته ابقلب(ن)مابقت به مناعه
حبك غزاني واسرج بداخلي خيل=واستسلم احساس الغلأ ابنص ساعه
من شفت رمشك شال طرف الهدب شيل=الله وكيلك صرت مثل البضاعه
لا تبتسم أوتحسب السالفه قيل=أو هي خيال من الفضأ ورتفاعه
محبتك شعلة اشموع وقناديل=أحرق بها حرف القصيد وذعاعه
ماني ابشاطر با الوصف والتفاصيل=والا طبعتك با القصيده طباعه
لعنبو حي الغلا ويش سوابي=لو حفظته بينّت بي علاماته
ماعطيت السر إلا لمرقابي=يوم جيته با الشعر يفهم ابياته
حبها مخفيه عن اقرب اصحابي=يبي يدري مير ياكبر شرهاته
لو هواها هدني واتعب اعصابي=في هواها الموت ذايق ملذاته
ان حكالي با الوفاء سيّل العابي=ون سكت ماغير اراقب حركاته
والله اني ما خبر طيفها غابي=ولو يغيب اتزور عيني خيالاته
لو يشوفه عسكري حطه ارهابي=من كثر ماترهب الناس نظراته
ولويشوفه حر(ن) اشقرعلى بابي=هد يمه يحسبه بعض صيداته
يا المضايف لو دريتو عن صوابي=كان جبتولي ربيعه بعياداته
التعديل الأخير تم بواسطة زايد الدغماني ; 04-12-2009 الساعة 09:21 AM
الطيب يشره .. يحسّبنا على خبره=مايدري انه غدا مذموم يامشاري
مايدري أنا نعيش أبعيشة(ن)غبره=رحنا ضحيه مابين البايع الشاري
بعض المواجع لك الله مالها دبره=تعيشها طوع غصب وكره واجباري
حتى مع الضحك تلقى للحزن نبره=وحتى مع الصمت لامن مرك الطاري
أحيان يصغر فضا كونك على كبره=تحتار حتى لونك لشقى ضاري
الحر ممكن يموت اليا انثنى شبره=مايقبل العيش دام ايدينه اقصاري
والرجل يصبر ولكن لانفذ صبره=ولاعاد يلقى أمامه حل واخياري
وصاير طريقه مضيق اضوق من الابره=ولو يلبس ارداه كنه بينهم عاري
ماهو بالأفضل يروح وينتظر قبره=لاصاربعض الملامه مالها اعذاري
والطيب يشرهه يحسّبنا على خبره=وعزالله انه غذا مذموم يامشاري
واهمي اللي في حشايه تودّر=هم(ن) مسوي وسط قلبي دواوير
خلا معاليق الضماير تخدّر=وخلا حياتي عن جميع البشر غير
وياللي تلوم الخاطر اللي تكدّر=ماتدري ان بوسط قلبي دوافير
وقّادها من تحت صدري تحدّر=وليا طفت اوجستها كا المسامير
ياليت همي باأول العمر بدّر=ولا شافت أعيوني أورود ونواوير
كان الرجاء عن منقع العين صدّر=ولا احتريت لشين حظي تباشير
ولاني أمعارض كل حكم(ن) مقدّر=امنت في حكم الولي والمقادير
لاشك اسلي خاطري لاتكدّر=وأبلسم اجروح الزمن با التعابير
لاضاق بالي أخذت البال واسيّر=على أبيوت القصيد اللي يسليني
عليه ابعثر أهموم القلب واطيّر=أفكاري اللي غدت تاخذ وتعطيني
واشكي له اللي جرالي من ورى أنويّر=انوير اللي الملمها وتكويني
هدت احلام(ن)مشيدها وانا اصغّير=عزالله ان الحبيبه شيبت عيني
كل يوم تطلع عليّ ابوجه متغير=تذبح وتجرح خفوقي ثم تغريني
صبري عليها طويل وماهو اقصيّر=متى على الله يجي يوم(ن)تناديني
ياشعر والله بحلت وصرت متحّير=ماغيرك اللي خذيته من ورى سنيني
هاك السحاب اللي لمع فوق بارقه=هيّض خفوق اللي هوى الشوق طارقه
ردوم الغيوم اللي بها ذكرتني =معها تجيني بعض الافكار مارقه
والله ما أذكر يوم واحد نسيتها=دايم خياله مثل ضلي ما افارقه
اشوفها لاشفت انا الشمس غايبه=واشوفها لاشفت انا الشمس شارقه
اللـــــــــــــه يامكبر غلاه ومحبته=نيران حبه داخل الجوف حارقه
حتى ولو بيني وبينه مسافه=تخطف لي اخباره هواجيس سارقه
والله ما اكتب للمخاليق وصفها=مدام روحي في هوى الزين غارقه
عليها اغار من الهوى اللي تشمه=وخوفي بعد لاتصيبها عين خارقه
تهمـك حالـتـي وش صــار فيـهـا=تبيـهـا بــا الصـحـيـح أو ماتبـيـهـا
أنا حالي بعـد مارحـت راحـت=لاتــســـأل عـنــهــا ولا تـحـتـريـهـا
تنـام الـنـاس واعيـونـي سهـيـره=أفكـر فـي هـوى اللـي مهتويهـا
الا يابعـد روحـي كيـف حالـك=عـسـى الامــور عـنـدك ماعلـيـهـا
أخاف ايجيك يالغالي ماجانـي=سـهـر واهـمـوم مثـلـي تشتكيـهـا
وانا اللي كنت اقول الامر هين=وعطيت الروح كل ما تشتهيها
صحيح اللي يطاوع حب نفسه=إيتحمل عاقبة كل ما يجيها
وانا حب العنود اتعب خفوقي=نسى قلبي هموم ولا نسيها
عسى الله يجمع اقلوب الاحبه=قـلــوب(ن) تشـتـكـي مـنـهــا وفـيـهــا