صفحات المضايف على تويتر
عدد مرات النقر : 185,077
عدد  مرات الظهور : 159,123,199
عدد مرات النقر : 180,614
عدد  مرات الظهور : 103,068,954مركز المضايف لتحميل الصور والملفات
عدد مرات النقر : 152,553
عدد  مرات الظهور : 87,205,113مضيف الخيمة الرمضانية
عدد مرات النقر : 151,111
عدد  مرات الظهور : 86,862,540صفحات المضايف على الفيس بوك
عدد مرات النقر : 186,481
عدد  مرات الظهور : 159,123,207
ملتقى الويلان الثقافي والإجتماعي
عدد مرات النقر : 155,640
عدد  مرات الظهور : 140,491,782
عدد مرات النقر : 151,490
عدد  مرات الظهور : 86,862,511فضيلة الشيخ محمد المهوس وفضيلة الشيخ عبيد الطوياوي
عدد مرات النقر : 187,731
عدد  مرات الظهور : 153,321,3935موقع المضايف على أنستغرام
عدد مرات النقر : 181,170
عدد  مرات الظهور : 145,100,297ليل التعاليل
عدد مرات النقر : 178,304
عدد  مرات الظهور : 101,594,141
التميز خلال 24 ساعة
العضو المميز الموضوع المميز المشرف المميز المشرفة المميزه
قريبا 27 مارس يوم # مبادرة السعودية الخضراء
بقلم : جمر الغضا
قريبا قريبا

الإهداءات

« آخـــر الـــمـــشـــاركــــات »
         :: الزكاة ( فريضة وأحكام ) (آخر رد :خيّال نجد)       :: أكفلهم … ونحن نرعاهم (آخر رد :جمر الغضا)       :: اللي يسمع خالد يرفع 🇸🇦 واللي ما يسمع خالد يرفع 🇸🇦 (آخر رد :جمر الغضا)       :: وزارة التعليم رسمياً : (آخر رد :جمر الغضا)       :: 27 مارس يوم # مبادرة السعودية الخضراء (آخر رد :جمر الغضا)       :: ومن سيصدقني يا خديجة ؟ (آخر رد :كساب الطيب)       :: وزارة الدفاع قريباً : (آخر رد :كساب الطيب)       :: وزارة التعليم (آخر رد :كساب الطيب)       :: أمطار ورمضان 1445 هـ (آخر رد :كساب الطيب)       :: الشؤون الإسلامية قريباً : (آخر رد :كساب الطيب)       :: طبتم أينما كنتم (آخر رد :كساب الطيب)       :: شكراً ل | " (آخر رد :جمر الغضا)       :: أخصائي تغذية يحذر من تناول الجبن السائل ويكشف الأسباب (آخر رد :معزي العنزي)      


العودة   شبكة المضايف الأدبية والثقافية > ►◄الـمضـايـف الأدبـيـّه►◄ > مضيف دواوين شعراء المضايف

مضيف دواوين شعراء المضايف بالنَّدَى يُكتب الشِّعْر، وَبِالنُّورِ يُعرَف، وبهِ تَنتَشي الأرواح { دواوين الشعراء }

كاتب الموضوع زاحم بن نومس مشاركات 12 المشاهدات 9126  مشاهدة صفحة طباعة الموضوع | أرسل هذا الموضوع إلى صديق | الاشتراك انشر الموضوع
إضافة رد
 
أدوات الموضوع انواع عرض الموضوع
#1  
قديم 19-12-2009, 01:17 PM
زاحم بن نومس غير متواجد حالياً
اوسمتي
وسام الألفية الأولى 
لوني المفضل Cadetblue
 رقم العضوية : 214
 تاريخ التسجيل : Nov 2009
 فترة الأقامة : 5244 يوم
 أخر زيارة : 14-11-2017 (09:13 AM)
 المشاركات : 1,172 [ + ]
 التقييم : 10
بيانات اضافيه [ + ]

اوسمتي

افتراضي ديوان الأمير محمد الأحمد السديري



مقتطفات من ديوان الأمير / محمد بن احمد السديري رحمه الله

هو محمد بن احمد بن محمد بن تركي بن سليمان السديري - رحمه الله تعالى - ولد عام 1340ه تقريبا في مدينة ليلى بالافلاج حيث كان والده اميرا عليها ثم انتقل مع والده الى الغاط ونشأ وترعرع هناك في كنف والده ودرس الابتدائية على يد الشيخ عبدالمحسن المنيع شغف في بداية حياته بركوب الخيل وكان معروفا بسرعة العدو الجري حتى قيل: انه كان يلحق الصعاب من الابل ويمسك بها مارس هوايته المحببة ركوب الخيل والهجن كما انه كان مولعا بالقنص واقتناء الطيور النادرة,, في السابعة عشرة من عمره اختاره الملك عبدالعزيز - رحمهما الله - اميرا على الجوف سنة 1357ه واثبت وجوده ودرايته وكان مما قام به تصفية قطاع الطرق والخارجين على الدولة على الحدود الشمالية والشمالية الشرقية ثم انتقل الى منطقة جيزان عام 1363ه وتولى امارتها ومكث هناك، وعندما ثارت المشاكل على الحدود السعودية اليمنية بعد الاطاحة بالامام يحيى بن احمد سيطر معاليه على الحدود بحنكة ودهاء وعين عام 68ه قائد للفدائيين السعوديين في فلسطين ثم اختاره الملك عبدالعزيز محافظا لخطوط الانابيب وقرر رحمه الله ان يتخذ مدينة عرعر مركزا للمحافظة وكانت حينذاك صحراء قاحلة وخوله الملك عبدالعزيز للتصرف بالاراضي فأسس ثلاث مدن رئيسية هي عرعر والقيصومة وطريف وساعد ذلك على توطين القبائل حتى اصبحت مدن مليئة بالحركة والنشاط والتقدم,
بعد وفاة الملك عبدالعزيز نقل الى جيزان مرة ثانية ثم اعتزل المناصب الا انه عاد وتولى قيادة الجيش بالمنطقة الجنوبية ومكث ثماني سنوات حتى انتهت حرب اليمن وعاد وقضى بقية حياته متنقلا بين الطائف ومزرعته الخفيات شمال بريدة على طريق حائل حتى داهمته ازمة قلبية حادة لازم الفراش لمدة شهر حتى توفي عام 1398ه بالرياض ودفن بالخفيات في شمال القصيم - رحمه الله - وأسكنه فسيح جناته ,

وهذه بعضٌ قصائده المشهوره

اتمنا ان تحوز على رضاكم







الله من هم بروحي سهجها=بخافي ضنيني في كنين الحشا لاج
احر من نار توقد وهجها = منها خطر روحي على سلك ديباج
وعينٍ عسى المولى يعجل فرجها=يفوح ناظرها كما عين هدّاج
استرسلت للدمع مما رهجها = غيظٍ يكظ اعبارها مثل الامواج
كم واحدٍ له غايةٍ ماهرجها=يكنها لو هو للأدنين محتاج
يخاف من عوجا طوالٌ عوجها=هرجة قفا يركض بها كل هراج
يقضب عليك المخطيه من حججها=حلوٍ نباه وقلبه اسود من الصاج
الله خلق دنيا وساعن فججها= وعن مايريب القلب لك كم منهاج
والرجل وان شطت لياليك سجها=عسى تواليها تبشر بالافراج




يقول من عدا على راس عالي=رجم طويل يدهله كل قرناس
في راس مرجوم عسير المنالي=تلعب به الارياح مع كل نسناس
في مهمه قفر من الناس خالي=يشتاق له من حس بالقلب هوجاس
قعدت في راسه وحيد لحالي=براس الطويل ملابقه تقل حراس
متذكر في مرقبي وش غدالي=وصفقت بالكفين ياس على ياس
اخذت اعد ايامها والليالي=دنيا تقلب ما عرفنا لها قياس
كم فرقت ما بين غالي وغالي=لوشفت منها ربح ترجع للافلاس
ياما هفا به من رجال مدالي=ماكنهم ركبو على قب الافراس
ولاقلطوهن للكمين الموالي=ولاصار فوق ظهورهن قطف الانفاس
ولارددو صم الرمك للتوالي=كل يبي من زايد الفعل نوماس
من بينهم سمر القنا والسلالي=مثل البروق برايحٍ ليلة أدماس
يقطعك دنيا ما لها اول وتالي=لو اضحكت للغبن تقرع بالاجراس
المستريح اللي من العقل خالي=ما هو بلجات الهواجيس غطاس
ماهوب مثلي مشكلاته جلالي=ازريت اسجلهن بحبر وقرطاس
حملي ثقيل وشايلة باحتمالي=واصبر على مر الليالي والاتعاس
وارسي كما ترسي رواس الجبالي=ولا يشتكي ضلع عليه القدم داس
يابجاد شب النار وادن الدلالي=واحمس لنا يابجاد ما يقعد الراس
ودقه بنجر ياظريف العيالي=يجذب لنا ربع على اكوار جلاس
وزله الى منه رقد كل سالي=وخله يفوح وقنن الهيل بقياس
وصبه ومده ياكريم السبالي=يبعد همومي يوم اشمه بالانفاس
فنجال يغدي ما تصور ببالي=وروابع تضرب بها اخماس واسداس
لاخاب ظني بالرفيق الموالي=مالي مشاريه على نايد الناس
لعل قصر ما يجيله ظلالي=ينهد من عال مبانيه للساس
لاصار ما هو مدهل للرجالي=وملجا لمن هو يشكي الضيم والباس
بحسناك يامنشي حقوق الخيالي=ياخالق اجناس ويامفني اجناس
تجعل مقره دارس العهد بالي=صحصاح دوِّ دارس مابه اوناس
البوم في تالي هدامه يلالي=جزاك ياقصر الخنا وكر الادناس
متى تربع دارنا والمفالي=وتخضر فياض عقب ما هيب يباس
نشوف فيها الديدحان متوالي=مثل الرعاف بخصر مدقوق الالعاس
وينثر على البيدا سوات الزوالي=يشرق حماره شرقة الصبغ بالكاس
وتكبر دفوف معبسات الشمالي=ويبني عليهن الشحم مثل الاطعاس





اللي هتف باسماه قلبي وناداه=حتى الضلوع بوجدها صفقت له
اللي غرامه تل قلبي من أقصاه=وبالدمع عيني خيّلت وامطرت له
اللي عسفت النفس لاجله ولرضاه=والرجل في سمر الغداري عنت له
بيا سبب عهد الهوا ليه ينساه=وينسى تخطي رجلي اللي خطت له
الرجل لو هو نازح الدار تنصاه=على حثاث القاع يا ما مشت له
أموت من فرقاه واحيا بذكراه=والروح خلت جسمها وانتحت له
قولو له أنه عذب القلب وأدماه=وحي يود لقاه ماله بقتله
ياكود والله غيبة عقب لاماه=وعيني بكت فرقاه ثم اخجلت له
ماصاب قيس بحب ليلى توطاه=ولوعات قيس وماجرى له جرت له
مالاق له غيره من الناس مشهاه=ويعاف كل الخود لو عرضت له
ان شاف زوله مغرم القلب يبراه=وان مر غيره صد مايلتفت له
أغليه لامانساه واذكر سجاياه=لوهو بعيد الدار نفسي هفت له
معذبي بالحب وان حل طرياه=اسرار ودي بالضمير اهتفت له
لو هو ظهر للناس وابدى محياه=كل الخلايق بالجمال اشهدت له
عزاه ياقلب على الصبر ماقواه=لو مابغى الفرقا عصت واخطمت له
عزي لمن دمعه على الخد مجراه=ودنياه غيب نورها مااسفرت له
قولو لبن سلوم ابو زيد ينخاه=يوم ان غارات الهوا صادفت له
يتابع الونات من كود ماجاه=لوكثر الونات مافرجت له
يهيم مثل موده وسط مضماه=يذكر سنين بالوداد ضحكت له
ماجت له الدنيا على ماتمناه=وذياب ياسه من حبيبه عوت له
يكفيه من جور الهوا ربع ماجاه=وتغيرت دنياه يوم اوجهت له
قلبه من الحرمان فاخت حناياه=من يوم باقي ايامها ماصفت له
هنيت من حصل مرامه بدنياه=والورق بلحون السعد غردت له
هنيت من حصل مرامه بدنياه=والورق بلحون السعد غردت له
المولع الي في طريق الهوا تاه=لومابغاه اشراك دربه سعت له





الصدر ضاق وحاير الدمـع دفـاق=من ناظر(ن)من حاير الدمع مرهوق
دمع تكبه عيـن عاشـق ومشتـاق=ارعد سماها بالغضب ومطر الموق
الا سفح من فوق الاوجان وانسـاق=يسيل منه معيلـت مرتـع النـوق
محدن رحمني يوم الاقـدار غـراق=منجور دمعاتٍ تكسر بصنـدوق
صدر من الفرقاء رمع فيـه دقـاق=ووجس معاليق الحشا يشعلن فـوق
فاذا بغيت ادلـه تذكـرت الافـراق=طفلا على شل المعاليـق مطفـوق
طفلا نقل بالزين غضات الاعنـاق=عزالله انه طالنـي منـه ملحـوق
في مامضا دنياي جتلـي بالاوفـاق=وردت عددهن قبل ماهوب مطروق
جيت الحبيـب دالـه بالكـرى راق=ومجوهرات امبيسمـه ذقتهـن ذوق
يوم انتبه لي صاحبي بعـد مافـاق=اصبح يعاتبني على الغدر والبـوق
يقـول مامثلـك للجـواد ســراق=ولاانت على هذا من الناس مسبـوق
قلت ارحمو من زاركم ماله ارفـاق=ورووس الافاعي بالقدم حطهن سوق
ماله رفيق وبـه يضيقـن الافـاق=واذا جفيتـو مايبـي كـل مخلـوق
فطلق حجاجه وبدل الوجه بشـراق=وافتر عن بيضاء تكاشف بها اوراق
فنهن سقاني كاس خمـرا بتريـاق=زود على ماصار بالغدر مسـروق
احباب لحباب تعاطـف بالاريـاق=وارواح تحيا بين عاشق ومعشـوق
هو حط ذرعانه لي افراش وارواق=وانا لويت العضـد لمعنقـه طـوق
ثوبه نظيف ولاوطى فيـه عشـاق=وثوب الخنا يجوز به كل منطـوق


انبيك يامن هو عن الحال نشاد=شف دوك قلبي من محانيه مفقود
مشيت بدروبٍ عتيقات وجداد=ولقيت بيبان الموده بهن كود
دخلتهن عقب العناء هو والاجهاد=وقبلي دخلهن ناظم الدرع داؤود
مابين حام وسام جور الهوى ساد= في كل قلبٍ شاغل الحب ماجود
كلٍ على ماراد صادر ووراد = عدٍ لكل الخلق بيّن ومارود
الود قد هدّا صليبين الأولاد= البيض تشهد به وتشهد به السود
لي فيه قرّر صافي الخد ميعاد=ودخلت ماميزت للنقص والزود
صادفت ملهوف الحشا ظبي الأجراد= طفلٍ عليه من البها ستر وعقود
طفلٍ نفل بالزين غضات الأنهاد= به سحر هاروتٍ وماروت منضود
له قلت راع لحالتي يابن الأجواد= ارفق على قلبٍ من الحب مضهود
لجلج بسودٍ طرفهن للحشا جاد= وادي فؤادي عقبهن تقل مجرود
وخلاني اجرع بالهوى كل ماكاد= كني بوسط الموج تلعب بي النود
ونيت من كود العنا عقب ماكاد= ونة خالوجيٍ على جلد مفرود
ماينفع العشاق ترديد الأوجاد= ان شاف من غاليه ميلات وصدود
من عقب فقده حاربت عيني الزاد= وعيني لها عن لذة النوم راصود
بغيت اجيب اسمه على روس الأشهاد= لولاه يلحقني من الناس منقود
انا ونفسي عقب فرقاه بجهاد = واغضي وكن بناضري يرتكز عود
صبرت واثر الصبر يرّث بالاكباد= وخلا فؤادي خافق القلب ملهود
فرقا لطيف الروح لاعاد لاعاد=القلب من فرقاه يرعى به الدود
يازبن قلبي فيه جور الهوى زاد= كنه بما جاء قيس يازبن موعود
من غاب عني ماتهنيت برقاد= قلبي لقلب مغيزل العين مشدود
يمشي معه يازبن في كل ماراد= ماله عن الغالي محاريف وصدود
لو ان قلبي من صليب الصخر باد= ومن المحبه صار به كسر ولهود
يازبن شفت الكود من جور الأنكاد= وحبٍ دخلت احماه حبٍ بلا حدود
الله يذكر من فقدناه بــ جماد = وانك تلم الشمل ياخير معبود



حل الرحيل وفرقوا شمل الاحباب=ناس على فرقا الاحبه مغاليل
غدى لهم مع طلعة الشمس ضبضاب=وسالت دموع العين مثل الهماليل
وقفت اراعي سيد تلعات الارقاب = واغضي وهو يغضي بسود مظاليل
بشفاه يظهر ماتخفى بالالباب= وبشفاي افصل له عن الحال تفصيل
اسرار ودٍ بين صايب ومنصاب=نجوى لها باقصى الضماير مداهيل
سرايرٍ تنساب من تحت الاجياب=لصدورٍ اطهر من قراح الشهاليل
روحي على حبه لها كم جذاب=ويتل قلبي عذب الانياب بالحيل
لوان حبه يطعن القلب باحراب= ابرى ليا شميت بيضٍ معاسيل
على نقا ماني بغادر وكساب= وبالعرض والله ماندور محاصيل
ماني بمن يجرح عشيره بالاسباب= ويحط له مع كل ريعٍ محابيل
بس الحديث وقرعة الناب بالناب= واظهار مكنون الغلا والتعاليل
عزي لمن مثلي من الحب منصاب= تارد عليه هموم قلبه زعاجيل
اليا رقا مرقاب ناداه مرقاب=بمفارق الخلان شاف الغرابيل
الله لايجزي عريبين الانساب= لو هم على ماقيل سوٍ على الخيل
الي سعوا بافراق وضاح الانياب= وخلوني اجزع من عنا الغبن واشيل
فرقا ومنها القلب وسط الحشا ذاب= وعسى هل الفرقا لهم صافي الويل
عسى يصادفهم من الغيث سكاب=وبله غضب مابيه يمطر لهم سيل
ابيه يجدع مثل قلات الاطواب= منها البرد ينماز كبر المخاليل
وصواعقٍ منها المواليد شياب= والحي منهم ذاهل العقل بهليل
بامر الكريم ومن ترجاه ماخاب= يمطر عليهم مثل ماجا هل الفيل
الا لطيف الروح يذريه بحجاب= كنه براس الطور وهمْه ورى النيل
ويرجع علينا جادلٍ يزها الاسلاب= من خلقته مانيش عرضه ولا قيل
به مايعيبه للبعيدين واقراب= حاشا ولا تلقى عليه المداخيل
نقي عرض ولا عشق كل نصاب= الجوهر الغالي رفيع المناويل
وانا يصارحني بلا سر وكتاب = وعن حالته يشرح لي العدل والميل
هرجه على قلبي كما الشهد ينذاب=وقلبي على قلبه يرد المراسيل
كنه بعيني لو غضب كل عتاب= بدرٍ تعلى كوكب الجدي وسهيل
طفلٍ سلب مكنون عقلي والالباب= عليه اجاوب نايحات البلابيل
ياشطون قلبي زجي السر بكتاب= مني لابو غشام زبن المشاكيل
قولي رفيقه من هوى الزين ماتاب= ويرجيه رجو البدو وبل المخاييل
وبالليل ياقف له عن النوم حراب= وكنه يلوج بموق عينه سماليل



غنت الورقا على خضر الغصون= واسهرتني والزواهر ساريات
ولعت قلبي وانا قلبي حزين= هاج فكري والحمام مغردات
من سببهن عفت لذات المنام= ساهرٍ وعيون غيري نايمات
جددّن اجروح قلب المستهام= اتعذب والقميري ساجعات
سارحاتٍ لاعباتٍ بالفنون= هازجاتٍ في طربهن دالهات
بالترنم بينهن ورق الحمام= حركن مني شجونٍ خافيات
حركن قلبٍ سبح وسط الغرام= هام ببحور الغرام الهايجات
هايمٍ مشتاق شوقه من قديم= مستكنٍ بالضلوع المغلقات
اتذكر من له افؤادي خفق= فرّ من بين الضلوع المهدفات
في كلام الحب جاوبت الحمام= واستلجن واستمرن شاديات
قالوا انه ساكنٍ موطن ثقيف= ادعج العينين بسفوح السرات
هزني شوقٍ على شوف الحبيب= مني الأفكار يمه شاردات
حلقن بافاق ميدان الهوى = يم من يهواه موقي سارحات
جيت ادور من سبى عقلي هواه= باللواحظ والعيون السابحات
جيت ادور من سبا عقلي هواه= بالشفايا والعيون السابحات
يوسفي الحسن ممشوق القوام= جادلٍ في وصفها مثل المهات
جادل جدد جروحٍ بالفؤاد= صايباتٍ جارحاتٍ داميات
خافياتٍ مزمناتٍ موجعات= مستقراتٍ بقلبي ساكنات
يوم اشوف الزول والعنق الطويل= الله اكبر والقرون امجدلات
مثل شرطان الذهب شقر الجعود = خلقة الله فوق جسمه ضافيات
فاتنٍ واغواه ريعان الشباب= والرموش بحاجبيه مركزات
خصرها ضامر ومهضومٍ حشاه= بين اشافيها نظيم مجوهرات
ان تبسم في شفاياه وضحك = صفقن ليحان صدري هاتفات
من فيافي نجد جيت ارض الحجاز= من ديار نبتها زين النبات
عانين من نجد ميدان المهار= غابت ليوث الحراب الكاسرات
من ديارٍ نبتها شيح وعرار= والشقاؤا والزهور اليانعات
والبختّري والنفل هو والجعد= والخزامى والزهور المنورات
زاهر الحنوه وزهر القحويان= مثل نظم عقود خودن حافلات
به طيور الروض غنن بالفنون=بالترنم غارقاتٍ أمنات
البراعم كل ماهب النسيم= مايلاتٍ بالتهزع راقصات
اليهق والربل يطرب كل عين= والشقارا والسليح بناضرات
ريحهن وان هب ذعذاع النسيم= ينعش ارواحٍ لريحة عاشقات
كن نظم زهورها وسط الرياض= الجواهر في رقاب الغانيات
عللتهن في ربا نجد المزون= ناشياتٍ مرعداتٍ ممطرات
عادياتٍ رايحاتٍ مرضيات= مسبلاتٍ في مطرهن مغدقات
حافلاتٍ مثقلاتٍ هاملات = منوراتٍ بالبروق الضاحكات
لاقحاتٍ مغنياتٍ حاردات= شامخاتٍ شاحناتٍ حافلات
شارباتٍ من بحور ومن شطوط= والصبا هبت لهم بالملقحات
ساقهن ربٍ على عرشٍ عظيم= من بحر جوده برفقه دافقات
كن ودق المزن من فوق الحزوم= المكاين بالصحايف كاتبات
كن كفاخ الطها بين الخيام= بالمشاعر يوم تسع مشاهدات
ارعفن بالكوثر العذب الطهور=من مزونٍ في سماهن مسبلات
ناشياتٍ من دخل فصل الخريف= تسعة اشهر فوق نجد مخيلات
اتسلا بالسراب وبالفجوج= ريحة الأعشاب فيها منعشات
عانين من نجد ملجا المستريب= من زبنها ماتجيه النايبات
عانين من شامخٍ مجده قديم= من طويق العز شرق منمرات
معبينٍ للعدو يوم الحروب= وللصديق وجارهم عز وغنات
شيدوا للمجد بين العالمين= يوم بعض الناس في نوم وسبات
ديرة في ربعها عنتر سكن= وبن كلثومٍ مروي المرهفات
مع كليب وحاتمٍ بحر الكرم= من سكن للجود فوق النايفات
ديرةٍ احيا بها عبدالعزيز= ذكرياتٍ للفخار مدونات
جدد افعول الأسود الي مضت= ثمن احياها وهي كانت رفات
عبقريٍ ماعلى البيداء مشى= مثله الا من نطق بالمرسلات
هزبر الغابات ليثٍ من ليوث= صارمٍ حطم حدود الصارمات
تغلبين من نسل شيبان جال= والكتايب بالسلاح مدججات
يافعن هام المعالي من نشاء= خاض غبات البحور الطاميات
بدر كل الشرق من شرقه طلع= صاح وانور باليالي الحالكات
وانجلت عنه الكواكب كلها= والبدور من المهابه آفلات
لم شملٍ بالجزيره منتشر= وحّد الحضر المقيمه والبدات
النساء ماخلفن مثله عديم= بالسنين الحاضره والفايتات
من بحر جده الى شط الخليج= البنود بمجد عزه لايحات
والنضاء والخيل من ربع الجنوب= في ربا هضبة عنازه مشرفات
جال باجوى الكون صقرٍ من صقور= واخلدت كل الطيور الجارحات
فرخ شامٍ صاقرٍ كل الطيور= الصقور الأوله والتاليات
بالفعايل لو يقيسون الحرار= طولهن عن طول شبره قاصرات
ضف ريشه من مقره بالكويت= واصطفى وارعب جميع الطائرات
خاف من سطوات فعله كل طير = نزلن بالقاع عنه موقعات
مطلبه للعز والمجد التليد= يوم غيره لاهيٍ بالخرّدات
وادرك العليا بعد ضرب السيوف= كم رؤوس في لحاهن طايحات
عقب خوضه للمعارك والحروب= شرب صافي الماء بعد شرب الصرات
في نهار فيه ظهره مثل ليل= به عجاج الخيل غطى الشاهقات
كن رجد الخيل مع غط الصهيل = الزلازل والرعود الصاعقات
فوقهن كل ابلجٍ عين عديم= ملجمات جاهزاتٍ واثبات
حاجبن الشمس نقع العاديات= والمدافع هاجزاتٍ مرزمات
زادها ضرب الهواتر والرماح= والبنادق شاحناتٍ مفرغات
وين قطاع الفيافي والفجوج= النضاء والخيل عقبه مهملات
جيت للمبعوث واوقفت المسير= شرقي العرفاء ذكرت الماضيات
ماشيٍ باطلال اجيال خلت= دارساتٍ موحشاتٍ خاويات
اسأل الأطلال وين اهل البيان= وين من سنوا طريق المكرمات
ياعكاظ العرب ميدان الأدب= يامزار اهل المهار الصافنات
يامزار اهل الرجوله والحسب= ياعرينٍ لليوث الضاريات
يامواطن نخبة المجد الرفيع= يامقر اهل البنود الخافقات
يامنابر مصدر الشعر البديع= مفردات الشعر منهم خالدات
يامناخ الهجن عجلات الفديد= يامداجٍ للمهار المرهمات
فوقهن صيدٍ يضدون الحريب= بالرماح وبالسيوف القاطعات
فوق قبٍ يعربياتٍ عجال= عادياتٍ بالمعارك ضابحات
في ضهور العيس جوها من بعيد= يقطعون فجوج نجد الموحشات
مايهابون الفيافي والخروم= والمخاطر والديار الناحيات
من ديار الشام وديار اليمن= واهل هجر ومن سكن شط الفرات
وين بكرٍ هو وتغلب مع تميم= وين ذبيانٍ وعبس اهل القنات
وين حاتم مع ابن سلمى زهير= وين رايات الفخار الشامخات
وين امر القيس مع فارس زبيد= انشدوا عنهم قبور مظلمات
وين غطفان وهوازن مع قريش= وين قيس اهل السيوف الماضيات
وين عنتر وين طرفه مع لبيد= وين بن كلثوم عز الناخيات
وين الأعشى وين نابغة العرب= واخت صخر الي تقول المعجزات
وين حفل الأزد اهل سمر الرماح= اصلهم في شامخ العربا ثبات
وين الاقرع مع ابن عبد المدان= حكموهم بالأمور المعضلات
من فحول الشعر سادات الأدب= علقوا بالبيت عشر معلقات
باتفاقٍ بين ساداتٍ عظام= سنوا الأشهر عليهم حارمات
اشهر ٍ حرمٍ اكيد اتسجلت= بالعهود المحكمات البينات
اشهرٍ بايامهن حقن الدماء= لاحروب ولا مهارٍ مسرجات
ثبتوا فيها طراف وشيدوا= قبةٍ حمراء محط الضامرات
كل مامريت رسم ديارهم= عاودتني عبرةٍ عقب الثبات
عاودتني عبرةٍ باقصى الحشا= والدموع من المدامع سايحات
هيضت بلواعجٍ وسط الفؤاد= المنازل والرسوم الدارسات
ياحماة العرب يانسل الكرام= ياشبابٍ قد تحلوا بالصفات
يارجانا في ملمات الكروب= انتم افلاذ الكبود الغاليات
انتم الآمال يانور العرين= ياحماة اوطانكم والمحصنات
ياشباب العرب وان حمي الوطيس= ياسيوفٍ للشدايد مغمدات
قولةٍ بلكي عسى هذا يصير= مايخلص للديون المرمسات
ابعثوا ذكرى هل الفعل الجميل=راكبين العيس هي والعاديات
ابعثوا بالله ذكر اجدادكم= ابعثوها بيناتٍ واضحات
ابعثوا ذكرى صناديدٍ مضت= اسمعوهم والمسامع مصغيات
اسمعوهم صيحةٍ وسط الهضاب= الهضاب الي بالاقصى مطرقات
مطرقاتٍ شاهدٍ ذل وهوان = شاهدٍ قهرٍ تذوب اله الصفات
صخرةٍ بالقدس تنخي الفاتحين= هلت العبرات منها جاريات
صخرة المعراج تنخي الطيبين= وين جيش الزحف قاسين القنات
اليتامى دمعهم فوق الصدور= فاقدين ابوانهم والأمهات
يصرخون بصرخة الحر الحزين= صرخةٍ منها الجبال مجلجلات
صرخةٍ ادمى صداها للقلوب= عن نماهن اذهلت للمرضعات
صرخةٍ من هولها جظ الحطيم= والمشاعر كلهن مزمجرات
يندبن العرب لاولى القلبلتين = لطخةٍ بالعار بايدين الجنات
فاقدينٍ كل شي بالوجود= والثكالا وسط يافا عاريات
العدو ايسومهن سؤ العذاب= من سبب ماصار والله باكيات
مالهن في وسط موطنهن قرار= بالنياحه والتهظم سامرات
عذبوهن بالسياط وبالحديد= بالسجون مكبلاتٍ غاضبات
عند صلفين اليهود الحاقدين= خافضاتٍ روسهن وحاسرات
هاضمينٍ حقهن بين الأنام= حسروهن عقب ماهن مترفات
لاحلال ولا بيوت ولا ذرى= لاصديق ولا عوينٍ تايهات
لاحليم ولا قريب ولا شفيق= هالكاتٍ بالفيافي معدمات
شردوهن عقب ماهن في نعيم= ياحماة اديارهن مستضعفات
ساكناتٍ بالجبال وبالكهوف= مبعداتٍ بايساتٍ ناحيات
يطلبن الثأر يانسل الكرام= من نطق بالضاد يمه صارخات
من تجبر ضدهن باوطانهن= ناحباتٍ نادباتٍ ناحلات
ياولي العرش يالرب الكريم= يالهٍ شاهدن المنكرات
ابعدوهن عن مواطن حيهن= نازحاتٍ عن وطنهن مرغمات
مستغيثاتٍ بزفرات العبار= كاشفاتٍ للوجيه الشاحبات
حرقن ادموعهن ورد الخدود= من شراب الذل والله شاربات
هدموا لبيوتهن عقب العمار= صارت انقاضٍ هدامٍ جاثيات
ذللوهن عذبوهن بالسياط= بالتوجد والتهظم زافرات
شاهدن لبيوتهن عقب العذاب= يمسحن ادموعهن الذارفات
يصفقن بكفوفهن سمر الخدود= من دمي اخوانهن امخضبات
عرضن لصدورهن زرق الحراب= هن وطلقات الرصاص القاتلات
القهر والغبن يبكي كل عين= والهضايم شيبت بالجاهلات
في رحاب القدس ايضا والخليل= في رباهن شيدوا مستعمرات
كم شبابٍ بالسجون مصفدين= دونهم ابواب ضلم امقفلات
اطلبوا للثار ياشبال الأسود= كان ماختوه فضلتوا الممات
الكرامه مايعادلها عديل = كان خدشت حرموا باقي الحياه
بالقبور ابوانكم تنخى الشباب= انتم احفاد الصناديد الكمات
خيلهم بالعز بايام الحروب= في ميادين المعارك جايلات
ان نشدت وقلت وابديت الصحيح=فلتة الدنيا جنوب امغرزات
ياشباب العرب بايام الكروب=ياذرانا بالأمور المعظلات
شمروا للمجد بايام الخطوب=ابعثوا سوق مضى له ذكريات
جددوا ذكرى عكاظ بما مضى=واعلنوها للوفود السامعات
سجلوا فيها الفخار وطهروا=الشرف يوم الأسنه شارعات
معركة ذي قار خاضوا حربها=بالعوالي والسيوف المشهرات
وابعدوا عار على النعمان صار=ابعدوه وبعدوا للعايبات
به تساموا للفخر يوم النزال=حلقوا للمجد فوق الحايمات
بالجزيره مايهابون المنون=ثابتينٍ كالجبال الراسيات
خيل قحطانٍ وعدنانٍ جميع=معركة ذي قار فيها سابحات
سبلوا للمعركه صب عجال=ممتطينٍ للمهار السابقات
لين رب الخلق علام الغيوب=خالق الأرواح رب الكاينات
انزل ايانه على سيد البشر=انبأه باقراء على رغم العدات
ثم شع النور في شرق العرب=واشرقت شمس الفضيله بالصلات
هبوا الأنصار للخطب العظيم=مع رسول الحق للعالم هدات
احدقوا بالمصطفلى سيد الأنام= كالأسود الكاسرات الفاتكات
وانتشر دين العداله للورى=شاع واهتزت عروشٍ للطغات
وانذهل كسرى وجيش الروم خار=من كتايب من سعوا للصالحات
عصبة محمد هل الفعل الجميل=يطلبون المجد فوق الجامحات
خيلهم بالشرق والغرب البعيد=للجحافل بالمعارك خايضات
في سبيل الحق ماتخشى الملام=كم ازالوا من عروش هايلات
الصحابه بالعوالي والسيوف=اخمدوا نيران قوم مشعلات
بن ابي وقاص هو وابن الوليد=كم تحدوا للصناديد العصات
قادوا جيوش الصحابه بالحروب=طاعةٍ لله رب الصافنات
طاعةٍ للي بعث طه الرسول=مكنوا بالضد روس الباترات
رسخوا بسيوفهم دينٍ حنيف=في كلامي يشهدن الشاردات
من رقاب الروم بالحرب العوان=ينثرون الدم بجدود الضبات
واحمد الله لابتي يوم النزال= مايهابون المنايا الواردات
ظيفهم والجار يلقى مايريد=في رحاب المجد ماجاهم شنات



 توقيع :


آخر تعديل زاحم بن نومس يوم 20-12-2009 في 03:58 PM.
رد مع اقتباس
قديم 25-12-2009, 06:20 AM   #2


الصورة الرمزية راع الأوله
راع الأوله غير متواجد حالياً

بيانات اضافيه [ + ]
 رقم العضوية : 375
 تاريخ التسجيل :  Dec 2009
 أخر زيارة : 20-01-2013 (11:13 PM)
 المشاركات : 74 [ + ]
 التقييم :  10
لوني المفضل : Cadetblue
افتراضي



اللي غرامه تل قلبي مـن أقصـاه
وبالدمع عيني خيّلت وامطرت لـه
اللي عسفت النفس لاجله ولرضـاه
والرجل في سمر الغداري عنت له
بيا سبب عهد الهـوا ليـه ينسـاه
وينسى تخطي رجلي اللي خطت له
الرجل لو هو نازح الـدار تنصـاه
على حثاث القاع يا ما مشـت لـه
أموت من فرقـاه واحيـا بذكـراه
والروح خلت جسمها وانتحت لـه
قولو له أنه عـذب القلـب وأدمـاه
وحـي يـود لقـاه مالـه بقتـلـه



من اروع ما قريت من الشعر ،،، جميل ما نقلت لنا يابن نومس


 


رد مع اقتباس
قديم 09-01-2010, 06:39 AM   #3


الصورة الرمزية محمد التركي
محمد التركي غير متواجد حالياً

بيانات اضافيه [ + ]
 رقم العضوية : 425
 تاريخ التسجيل :  Jan 2010
 أخر زيارة : 15-02-2012 (03:53 PM)
 المشاركات : 36 [ + ]
 التقييم :  10
لوني المفضل : Cadetblue
افتراضي



الله يعطيك الف عافيه


 


رد مع اقتباس
قديم 28-04-2010, 04:53 PM   #4


الصورة الرمزية زاحم بن نومس
زاحم بن نومس غير متواجد حالياً

بيانات اضافيه [ + ]
 رقم العضوية : 214
 تاريخ التسجيل :  Nov 2009
 أخر زيارة : 14-11-2017 (09:13 AM)
 المشاركات : 1,172 [ + ]
 التقييم :  10
لوني المفضل : Cadetblue

اوسمتي

افتراضي



اقتباس:
المشاركة الأصلية كتبت بواسطة راع الأوله مشاهدة المشاركة
اللي غرامه تل قلبي مـن أقصـاه
وبالدمع عيني خيّلت وامطرت لـه
اللي عسفت النفس لاجله ولرضـاه
والرجل في سمر الغداري عنت له
بيا سبب عهد الهـوا ليـه ينسـاه
وينسى تخطي رجلي اللي خطت له
الرجل لو هو نازح الـدار تنصـاه
على حثاث القاع يا ما مشـت لـه
أموت من فرقـاه واحيـا بذكـراه
والروح خلت جسمها وانتحت لـه
قولو له أنه عـذب القلـب وأدمـاه
وحـي يـود لقـاه مالـه بقتـلـه



من اروع ما قريت من الشعر ،،، جميل ما نقلت لنا يابن نومس



الأروع حضورك ياراع الأوله


لاهنت الف شكر لك


 


رد مع اقتباس
قديم 28-04-2010, 04:54 PM   #5


الصورة الرمزية زاحم بن نومس
زاحم بن نومس غير متواجد حالياً

بيانات اضافيه [ + ]
 رقم العضوية : 214
 تاريخ التسجيل :  Nov 2009
 أخر زيارة : 14-11-2017 (09:13 AM)
 المشاركات : 1,172 [ + ]
 التقييم :  10
لوني المفضل : Cadetblue

اوسمتي

افتراضي



اقتباس:
المشاركة الأصلية كتبت بواسطة محمد التركي مشاهدة المشاركة
الله يعطيك الف عافيه


يعافيك اخوي محمد التركي


والف شكر لك


لاهنت


 


رد مع اقتباس
قديم 28-04-2010, 04:57 PM   #6


الصورة الرمزية فــرج الـبـلاز
فــرج الـبـلاز غير متواجد حالياً

بيانات اضافيه [ + ]
 رقم العضوية : 49
 تاريخ التسجيل :  Oct 2009
 أخر زيارة : 13-03-2024 (05:45 AM)
 المشاركات : 7,504 [ + ]
 التقييم :  10
 الدولهـ
Saudi Arabia
 الجنس ~
Male
لوني المفضل : Darkblue

اوسمتي

افتراضي



رحمهم الله وأسكنهم جنات النعيم

ذهبو ولم يبقى الا علمهم الغانم والطيب

بيض الله وجهك على هذا الديوان أخوي زاحم

لا عدمناك ..


 
 توقيع :

الا يالله يا مبعد الضيق والهم
عن كل مسلم بين كل العبادي

تفرج هموم ٍداخل الصدر ترتم
والصبر منك يا عظيم الغوادي


رد مع اقتباس
قديم 23-05-2010, 07:21 AM   #7


الصورة الرمزية عبدالعزيزالطويلعي
عبدالعزيزالطويلعي غير متواجد حالياً

بيانات اضافيه [ + ]
 رقم العضوية : 236
 تاريخ التسجيل :  Nov 2009
 أخر زيارة : 25-11-2012 (02:46 PM)
 المشاركات : 808 [ + ]
 التقييم :  10
لوني المفضل : Cadetblue
افتراضي



الف شكر لك على نقل هذه الدرر لشاعر مات ولم تمت سيرته وقصائده


 
 توقيع :
الا يالله كـان اللي ) بـقـالي يـشــبـه اللي . راح=-- تـعـوضـنـي بـمـوت مـايـســرّ قـلـوب عـدوانـي


رد مع اقتباس
قديم 07-07-2011, 03:23 PM   #8


الصورة الرمزية وعد منسآإكـ
وعد منسآإكـ غير متواجد حالياً

بيانات اضافيه [ + ]
 رقم العضوية : 1810
 تاريخ التسجيل :  Jul 2011
 أخر زيارة : 05-08-2012 (01:43 PM)
 المشاركات : 1,678 [ + ]
 التقييم :  10
لوني المفضل : Cadetblue

اوسمتي

افتراضي



اختياار جميل وذاائقه راائعه
دائما مبدع مو غريب عليك
كل الشكر لك على جهدك الراائع


 


رد مع اقتباس
قديم 27-08-2011, 11:57 PM   #9


الصورة الرمزية زاحم بن نومس
زاحم بن نومس غير متواجد حالياً

بيانات اضافيه [ + ]
 رقم العضوية : 214
 تاريخ التسجيل :  Nov 2009
 أخر زيارة : 14-11-2017 (09:13 AM)
 المشاركات : 1,172 [ + ]
 التقييم :  10
لوني المفضل : Cadetblue

اوسمتي

افتراضي



اقتباس:
المشاركة الأصلية كتبت بواسطة فــرج الدهمشي مشاهدة المشاركة
رحمهم الله وأسكنهم جنات النعيم

ذهبو ولم يبقى الا علمهم الغانم والطيب

بيض الله وجهك على هذا الديوان أخوي زاحم

لا عدمناك ..



الشاعر القدير فرج الدهمشي



ابيض وجه جعلك بالوجود لاعدمناك


شرفتني بمرورك


صاق ودي وتقديري لك


 


رد مع اقتباس
قديم 27-08-2011, 11:59 PM   #10


الصورة الرمزية زاحم بن نومس
زاحم بن نومس غير متواجد حالياً

بيانات اضافيه [ + ]
 رقم العضوية : 214
 تاريخ التسجيل :  Nov 2009
 أخر زيارة : 14-11-2017 (09:13 AM)
 المشاركات : 1,172 [ + ]
 التقييم :  10
لوني المفضل : Cadetblue

اوسمتي

افتراضي



اقتباس:
المشاركة الأصلية كتبت بواسطة عبدالعزيزالطويلعي مشاهدة المشاركة
الف شكر لك على نقل هذه الدرر لشاعر مات ولم تمت سيرته وقصائده
عبدالعزيز الطويلعي


الشكر لله لاعدمناك


شرفتني بمرورك


صادق ودي وتقديري لك


 


رد مع اقتباس
إضافة رد


الذين يشاهدون محتوى الموضوع الآن : 2 ( الأعضاء 0 والزوار 2)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 04:45 PM.


Powered by vBulletin Version 3.8.7
Copyright ©2000 - 2024, Jelsoft Enterprises Ltd Coupotech
HêĽм √ 3.1 BY: ! ωαнαм ! © 2010
Ads Organizer 3.0.3 by Analytics - Distance Education