ديوان الــشـــاعـــر/ ســــعــــود فــــهــــد الــحـــريـــري
بسم الله الرحمن الرحيم
الأخ الشيخ الآطرق آلهذال المحترم
رئيس مجلس إدارة مضايف عنزه
الأخوه المشرفين والمشرفات المحترمين
الأخوه الأعضاء المحترمين
الأخوه زوار المضايف المحترمين
السلام عليكم ورحمة الله وبركاته
يسرني ويشرفني أن أضع بين أعينكم وأيديكم ديواني الشعري
الذي أرى بكم وفيكم ومنكم النور فيه لنتاج فكري وحس شعري
متنوع ........عله ينال رضاكم وحسن لطفكم وذائقتكم التي أعتز
وأستنير بها , فهي المحصله النهائيه لكل نتاج .
ولكم فائق التحيه والتقدير والشكر الوفير
محبكم أخوكم
سعود فهد الحريري .
القصيده التاليه موجهه لإحدى الشاعرات الكبيرات المعروفه على مستوى الساحه
ولكنها طلبت مني عدم التصريح بإسمها إحتراماً لوجودها وعائلتها المعروفه
(( والسبب هو أنني نزلت إحدى قصائدي في إحدى المنتديات وقالة لي
بتهكم (( الحريري سوري أولبناني )) كيف يكتب شعر نبطي كأنه من
أهل نجد ....وأسترجلت هذه القصيده بغضب وبعثتها لها وقدمت
إعتذارها الشديد بعدها ورفضت إني أنشرها ولكنها تحمل
في ثناياها فخر لي ولقبيلتي عيال وايل كافه حيث تطرقت
لشيوخها ومجدهم التاريخي وسأنشرها للتاريخ
العز مايبنى على جرف وهيال = والطيب ماتخفيه نفس(ن) رديه
والمجد حيد جبال ومناطح رجال = ماهي سواليف وحكاوي فضيه
يابنت عن هرج الخطاء ذبي الجال = وعن العلوم الفاضيه قيد نيه
إن عودت للأب والجد والخال = حنا هل التاريخ صبح وعشيه
أنا من الويلان ذربين الأفعال = حكام نجد أهل الشرف والحميه
حنا دول تسلسلت منها أبطال = وزادو على كل الخلايق شويه
ماهوكبر لكن مثل ضمن الأمثال = ويبقى لعصمان الشوارب هديه
وكل القبايل والنعم عز وجلال = إعدودهم بالطيب دايم مليه
منا آل سعود أهل الذرى حكم بتال = روس العرب نعم الفعول الزكيه
حكامنا اللي سيلهم خير لاسال = ويبدلون العاصيه بالرضيه
وآل الصباح منوخة كل من مال = شجعان خلقه بالنفوس الفتيه
وآل الخليفه درع وحزام سلال = سقم المعادي بالسيوف العصيه
وإن كان همك داخل الصدر يختال= من ماجرى باقي سوالف هنيه
أنا الحريري والحريرات غربال = ولادعه يابنت من ولدعيه
فرسان شجعاناً مجانين عقال = يردون حوض الموت فرد وسريه
جدي خلف فارس وباشا وقتال = هذا لقب من تركيا له عطيه
من فعله اللي يجدع الروس بالحال = ولاخضع راسه لمخلوق زيه
وكيل للباشا على كل الأعمال = من تركيا لمكه بسيف ومطيه
بالوجه له سيره تسجل وتختال = مع إبن رفاده خوت(ن) عالميه
ثلاث وثلاثين إكتمل عقدها فال = ونالوا مع التاريخ سيره وفيه
فعلاً يخلي صاحي الراس يهتال = بسيوف ورماحاً بروحه وجيه
وخاله الأيداء رمز والفعل مثقال = شيوخ فعل وماكر الطيب ريه
كسارة الطابور من هول الأهوال = ماهمهم بالكون نفس(ن) لويه
إخوان بقشه مروية كل بهلال = خزامت(ن) للفيل تطمي طميه
خواله اللي فعلهم يسبق الفال = فعلاً يخلي عقرب الأرض حيه
وأبوي شيخ الجود والطيب والمال = ينفذ من يدين الكريم النديه
فارس كريم وسيرته شمس وضلال = وأشجع من السيف المهند وبيه
سفير ربعه يوم حزات الإخلال = يذود عنهم بالسيوف النقيه
مع السديري بالعلا بدل الحال = وحل القضايا بين شيخ ورعيه
وضع حدوداً للقبايل على الجال = حسب الأوامر من حكومه عليه
نال الثقه والطيب والعز شلال = حتى توجه عند رب البريه
ورحنا العراق وشيخها وإبن هذال = نارد على النهرين شرب وخويه
شيخاً على كبر الصعيبات حلال = وبيته لخطاره جنوبه قويه
ورحنا دمشق وبالنا يمها بال = وراحوا بها حمر الطواقي ضحيه
جاهم إبن شعلان ياوي خيال = أبا الشيوخ وزغرتي يابنيه
داسوا على حمر الطرابيش الأشوال = وصاحوا عليهم صيحت(ن) شوشريه
وإسترسل الطياربالسيف بتال = وأجلى الفرنسيه على راس ميه
في ذبحت(ن) يدريبها كل من قال = ويلان ياطيب الفعل والسميه
وصارعبهاإبن سمير والملحم أقذال =وسادوابها الإثنين كل النحيه
بسيوفهم وأفعالهم مابها جدال = طاعت لهم فوق الرمك والعبيه
وجوها آل مهيد وعقبوا روس الأشبال = أسود كانوا دولت(ن) عنجهيه
من فعلهم تفككت كل الأزوال = الروم والفرس وجيوشاً سويه
وخيالة العرفاء لهم دور مازال = وأفعال إبن مرشد وربعه شفيه
وهذا العواجي مقدم الروس مامال = تاريخ تشهد له قبايل عتيه
وساجرمن الشملان فارس وكم صال = يم الشمال ووسط نجد العذيه
والمرتعد صياح فارس وهمال = ستر معزبته بدهن أجوديه
وسعران بن مجلاد للطيب مدهال = مدهال لكبود الرجال الضميه
وإبن يعيش وفعلهم ماله أشكال= أهل الشجاعه والكرم باذخيه
وبجايده يوم الكرم غول غوال = أبالخساير مدته حاتميه
ومنابهه في شعلة الحرب جلال = مروين من ذبح المعادي رويه
عد الفقير ومارد الطيب خلخال = وخماعله بالجود ربعن سخيه
وإبن ظويهر ناقداً كل فنجال = غضاوره نعم اليدين المليه
ومطارفه والمدح مثني بجفال = في وسط يام أسس علوماً غنيه
وساكر دلاله للنشاما بمكيال = خمشه ودقم خشوم الأعداء ظريه
وعبادله وأشاجعه تهدي الضال=وردو عدوداً ماوردها الكميه
مدحت جزء وجزء باقي على البال = أسود ماتجهلهم الصيرميه
روح الوفاء عطر اللقاء طيب الإقبال = تاريخهم بالطيب نعم السجيه
خاضوا بحور الموت سربال سربال = هذي قصص والسالفه واقعيه
كنا ولازلنا دول ذكرها هال =الانجليز أهل النوايا الغبيه
يابنت ماحدك على الهرج طبال = وتوبي ترى بعض السوالف شضيه
ما أسمح لمثلك والحكي برج الأقوال= وعن نفسي وربعي تراها حميه
جتك العلوم إجزال من مصدر إجزال = وكبي سواليف النفوس الدنيه
قصيت لك نبذه من الجال للجال = إقري كتابي يالهنوف الشقيه
حنا نعز رجال ونميل عقال = إووقت الخطاء ناطاء على كل هيه
إنزعل المخطي وندمح لمن عال = ولا يجيكم من طرفنا خطيه
إلا الخطاء يرجع على شكل زلزال = من فعلنا يقطع جميع الدليه
الرس مايشبه ترى العد لوطال = والله خلق بالكون رجل وحليه
لسانك حصانك على كل الأحوال = يحفظك من سود الليال العميه
ولياجهلت إنشد من الناس جوال = جوال في تاريخ ربع(ن) أبيه
ليانزلوا في فيضت(ن) حي منزال = يبدلون الشمس بالطيب فيه
ولياطلبتي حق للحق عدال = وشهادة الإثنين تنهي قضيه