عناد الغريب .. مشتاق لك تعال هنيا

[تركي عبدالله العنزي]

السلام عليكم

ابوغلا مبطي انا وياك ماتهاوشنا هههههههه



مني سلام وتحيه والبدى للبدي=مخصوصةٍ للخوي عناد واللي حضر
تعال يالوايلي بقول علمن ندي=مضمونها عبرة للي يبي يعتبر
.

.

[معيض بن عريفج]

الله الله صح لسانك ياتركي

وبالنتظار ابو غلا وصح لسانه مقدم

ولكن ياتركي تكفى افعش شوشته

وقرص اذيناته هههههههههههههه

متابع

[تركي عبدالله العنزي]

ياهلا وغلا يابووليد

والله يارجل اني مشتاق لك وودي افعش شوشتك حتى انت هههههههههههههه

ياخوك ماعينته ابوغلا مقفل جواله اذا لقيته بلغه ان به هوشه هنيا وخله يجي ههههههههههه

متابعتك شرف يابووليد انت استاذنا كلنا

فديت خشمك

[حلا الوائليه]

صح لسانك اخوي تركي وبنتضار عناد الغريب تاكيد نسمتع بالمجاراه

[تركي عبدالله العنزي]

ياهلا بالشاعره والاخت حلا

متابعتك تسر الخاطر

كلنا بنتضار ابوغلا

واذا طول بنرسل له طياره تجيبه

[عناد الغريب]

يامرحبا والله يابو عبدالله
اسمع نتهاوش لكن ممنوع العظ انت خابر السنون كلها تركيب هههههه

استلم لاهنت


يامرحبا ياهلا ياتركي الاجودي=ترحيبةً تشبه الهملول وقت المطر
جيتك وانا خابراً مافي علومك ردي=رجلاً تعرف السلوم ورجل عندك نضر

.

.

[عناد الغريب]

ابو وليد
حلا

لاهنتم وصحت ابدانكم
متابعتكم تتويج وشرف
دمتم بخير من الله

[تركي عبدالله العنزي]

ياربي تحييك يابوغلا

ابشر بدون عض انت تامر فديت هالخشم هههههههههههه

[تركي عبدالله العنزي]

صح الساااااااااااانك يابوغلا

استلم يابعدي



تسلم ياراع الجمايل وانت يامسندي=تفهم خويك لو ان العلم به مختصر
بس المصيبه لو انك شفت لك معتدي=والمعتدي حالته ياخوك لا ماتسر

[عناد الغريب]

ابو عبدالله
الله يعينك تنسق الابيات
انا ادخل من الجواال

استلم لاهنت



ياكبتن الطايره دام اتجاهك جدي=اربط حزامك قبل تقرا دعاءالسفر
ماقدمنا الا غشيمً كل يوم يغدي=يطرد سراب الحماد ويحسبنه بحر

[تركي عبدالله العنزي]

ياسلام



اصبر نبي حل للي مارضا يقتدي=جاته دعاوي من العربان ماتنحصر
والمذنب اللي نصحته كيف مايهتدي=والحسنه عند الولي معروف تدبل عشر

.
.

[معيض بن عريفج]

اللللللللللللللللللللللللللللللله عليكم مبدعيييييييييييييين صحت الالسن والقلووووووووووب

[عناد الغريب]

ابو وليد
لاهنت وصح بدنك
حضورك مكسب ومحفز
دمت بكل خير

[عناد الغريب]

ابو عبدالله
استلم



الغاوي اللي على الغرات دوم يعدي=من شجعه غاوياً واثنينهم في خطر
شيطانه اخرس وتاريخه ردا واسودي=ورصيده من المراجل ماتعدا صفر

[تركي عبدالله العنزي]

صح الساااانك يابوغلا

والعذر والسموحه على الاطاله لانشغالي وسفري

اللعب معك طرب وسوف نلعب على طاروق اخر في وقت اخر بإذن الله


ابووليد متابعتك وتشجيعك شرفر يا استاذنا

الله لايقطعنا منك يارب

[حمود العبيـــــد]

الله عليكم .. الله عليكم .. الله عليكم

تركي عبدالله ( برق الشمال )
vs
عنـــاد الغريب أبو غلا

طاروق راااااائع
ونيشان غز نفسه

والهدف سامي وراقي

لله دركم وصحت ألسنتكم يامبدعين

والله لكم وحشه

ودي ومودتي و ودادي
واحترااااامااااااتي