البروق اللي تلاعج ورى الشاشه=ودي اصل يمها بس ما امداني
في طرف غيمة مودّه ورهّاشه=ديمها يقبل عليّه ولا جاني
كل ماناضت وحسيت برشاشه=تقتفيها الريح حتى تعداني
ماجداي الا اتوجد على الباشه=باشةً مرت على شان تبلّاني
ياوجودي وجد من طال كلباشه=مسلمً مضلوم بيدين نصراني
فازعً للي تلوّى على فراشه=امَه اللي هدها سقم الابداني
بمالها اللي حاشت وكل ماحاشه=والعلاج لوضعها غال الاثماني
واخمشوه ولادرى ويش خمّاشه=واثبتو كل القضاه انه الجاني
يحسب ان الوضع يمشي ابّخشاشه=مادرى ان السالفه ذبح رهباني
فتشوه وبينهم قسمو كاشه=هاينه وقته وهالحين ينهاني
وجابو اللي حافظن رمي رشاشه=وارسمو له دايره بين الامتاني
قيدوه وجهّز الرامي كلاشه=وغطو عيونه ودمعه بالاوجاني
ماطرى له وقتها غير بشّاشه=امه اللي تحتري رجعة العاني
ايتوجد والتوجد حرق جاشه=والتوجد مانفع كل وجداني
جعل مامسلم يعيش بعمر عاشه=قصةً جت من خيالي على لساني
حدني للدبلجه فقد شواشه=مهرةً مرّت بلا سرج وعناني
تذبح اللي وجهت له بالارماشه=وتجرح المحروم مثلي وتنساني
جرح صدري ينفتق كل ماناشه=طيف من عمّق جروحي وخلاني
مانفع تضميد وتدبّل الشاشه=لو وقف واحد بدا ينزف الثاني

كل مازهمت القاف فسّر وجاني=ويجمع معه قيفان شرّد مباكير
ماقد طلبته شئ يوم وعصاني=كنّه معي عبداً وانا كنّي امير
كسبت فيه الطيبه بالمعاني=وكسبت عرف الطيبين المناعير
وماوقفت خيالي حواجز زماني=اخذت كآس الشوط الاوّل والآخير

وسّعو لي جيت والنيّه مطيّه=والنوايا غير ربي ماعلمها
جيت في نيّه ولالي غير نيّه=احترم ذوق الخليقه واحترمها
جيت الاعب مهرتي بنت العبيه=مهرتاً قولو عساني ماعدمها
مهرتاً خلّت حياتي مزهريه=والسقيّا ريقها العذب ونسمها
بنت شيخاً ماتلفّت غير ليّه=اصلها الطيّب تجمّع مع كرمها
من كثر فزعاتها هالشوشليه=قلت ياحسبي على منهو ضلمها
كل مامرت عيون الشوق فيّه=يختنق صدر القصيد ولا زهمها
ويييييه لاغنت لحون السامريه=القصيدة تعتكف بأطراف فمها
فمّها اللي من كثر طغيان غيّه=كل حرف يقول يالذة طعمها
خيزرانية جسد طرقا طريّه=رمح؛؛ لولا ردفها جار وهضمها
لاتثنت قلت جعل الكسر بيّه=كن تركيبة جسدها من لحمها
تنطوي وافش غلّي في يديه=والقط الجوال سرعه واستلمها
كل ماقلت ارحميني تقول ويّيّه=ويّيّتن قلبي عشقها مافهما
والله اني شفت واجد بس ذيه=مهرتاً مرّت بحظّي واغتنمها
كنها فزعت خوياً مع خويه=ياعساني كل عمري مــ انحرمها
نيتي بيضا ولا فيها رديّه=ماطمعنا غير بالكرت نختمها
واهني من وافقت له واهنيه=واهني اللي تجيله ويحشمها

حاولت ابكتب شئ ماتنطري فيه=اما افتخار او مدح ولا فكاهي
وكل ماكتبت البيت وارجع اغنيه=صوت الحروف يقول لازم لهاهي