شبكة المضايف الأدبية والثقافية

/

@

http://7lema.up4arb.com/uploads/9ef119ecf9.gif

@

/

رحلتي ولاقدرت أخذ تفاصيلك

عيونك، وجهك، وشيبك ،،

تجاعيك ..وضحك النور بيدينك،،

حنانك، رحمتك، طيبك،،

تناهيدك،،ودمعه فرحتي بعينك

أقول إلا أنتي وشلونك

عساك بخير

عساك أنتي مثل ما أنتي

حنونه ومن على كفوفك

فرح عمري

وحنين القلب والنوير

دريتي ولا يايمه

مثل ماكنتي ماتدرين

مثل ماصوتي يتشظا

ويرد صوتي على صوتي

أحبك بيني وبيني

مثل ملح الدموع اللي

تخبي من ورى عيني

ويجيني كل ماشفتك

إلى هذا العمر وأنتي

معى بكل لحظه ماعفتك

مثل نور الدعاء اللي

وصل من كفك،،

يمر قلبي ..

يزيد النور في طيني

أحبك بيني وبيني

إذا مريتي من بين السوالف

أووف يايمه

أحس يديني تتشجر

وأصير من الوله ورد وعطور

وعمري يتبخر

أحبك كل مانزاحت غيوم

وطلت القمرى ،، وأقول إنتي

وكل مانامت بعيني نجوم الليل

ماغمضت

أقول إنتي،،

لأن كل نور يايمه أشوفه

إنتي وإنتي،،

كبرتي مثل ما إنتي كبير بداخل التفكير

مثل مإنتي يايمه كبيره حيييل في عيني

أشوفك عندي وأتلبس جناحات الرضا واطير

وأمد عمري على عمرك وهذا الشوق يكفيني

ألملم صورتك تعكس عيونك في عيوني خير

وأشم عطرك وأحس أنك ركضتي في شراييني

وأنا رجال يايمه أشوفك أشعر إنى صغير

أحس للحين في رحمه يديك إنتي تهزيني

وإذا مرت أغاني المهد ماتدرين أي تأثير

يصيب القلب يايمه وحنيني لك يوديني

ساعات أنساني ومثلك فلا يحتاج الى تذكير

وحليبك كل مازاد العمر فيني،، بقى فيني

كبيره وإنتي مايقدر يطول عيونك إي تعبير

يا أكبر عاطفه يجري نهرها بداخل سنيني

كبرتي وشيب كل عمرك يزيد بعمري التنوير

رحلتي وهذا انا لازلت احفظ الصوره في عيني