سبحانه اللي يرزق الداب بالطير
احدن عما واحدن كفخ مايشافي
واللي رزق بالبحر عكف المناقير
شبعت وحاشت رزقها بالعوافي
من بعد ذكر الله يارب التياسير
يا عالمن في سر كل الخوافي
لاعادها الله خوتن تعكس السير
مهما وفيت وطبت والله ماتافي
والخوه اللي مابها زود تقدير
تغنيك عنها وحدتك يالسنافي
تعوض الله بالوجيه المسافير
اهل الشيم واهل الصدورالنظافي
بالناس متواضع وفيهم يبي يطير
وياكثر من غادر... وياكثر لافي
واهل الحسد ماتحسد الا المناعير
حسيبهم ربي وزور..... المشافي
كم ميتن محسوب ضمن المشاهير
وكم حي يرزق يشبه النور طافي
ما ينمدح من كبرته الدنانير
بكره لثار الملح قلبه يخافي
اثنوا على اللي ينطحون الطوابير
لاهل الشجاعه شاش راسي وقافي
اهل الفعل واهل السيوف البواتير
سم العداء على بعضهم لطافي
وكم من فقيرن همشته المقادير
يزها المدايح لو مشى الرجل حافي
ويااهل العقول النيره واهل الخير
الدين عز وناقص الدين هافي
عـبــدالعزيز بن قــالــط الطــويلــعــي
:::::::::::::::::::::::::::::::::::::::::::::::::: ::::::
يامرحبا وعداد ماغرد الطير
بالشاعر اللي جاد فن القوافي
ياصاحبي عساك مبسوط وبخير
وعساك دايم بالفرح والعوافي
قريت خطن فيه جزل التعابير
قرايضٍ ماقالهن كل هافي
يالوايلي افطن ترا هالزمن غير
قليل ماتلقا من الناس وافي
كب المعفنه باردين الدناقير
اهل الردى ومجمعين العذافي
وعليك بزحول الرجال المناعير
والراي شوره بينهم يالسنافي
وخويهم ما يلحقه اي تقصير
في راس عيطانٍ عسير المشافي
يالوايلي حنا بزمان الهوامير
والوضع مزري بالسنين العجافي
شفنا وعفنا بالسنين المدابير
والله يجملها ابستر وعوافي
يابووسام الوقت مافيه تغيير
والله عليمٍ بالسنين بالمقافي
وحنا بهالدنيا اسوات المداوير
والله عليم بسر كل الخوافي
تمشي بنا الدنيا كما يمشي السير
ولابد ماتذري علينا السوافي
ولا انت حرٍ ماكره بالشناظير
ومخالبه مثل السيوف الرهافي
نسل الرجال منزحين الطوابير
عدو هم يمشي على الشوك حافي
وصلاة ربي عد ماغرد الطير
وعداد منهو حج مكه وطافي
محاراه متواضعه جداً لخوي ابووسام
عبدالعزيز قالط الطويلعي
عبدالرزاق المطرفي
|