هات القلم وكتب جزيلات الالحان
من هاجس لاهاض جاب الجزيله
نصه لربعي بالمواقيف مزبان
مداتهم تشف الكبود العليله
مثل الحرار اللي على راس مابان
مقرهم روس بالجبال الطويله
وفعالهم معروفةً عبر الازمان
يوم المغازي والسيوق الصقيله
يفداكم اللي بالمواقيف كوبان
اللي علومه بين ربعه فشيله
ياضاعت الهقوات بفلان وفلان
دفنتها تحت الثراء بالمسيله
ياكم هقيت بناس لاشك غلطان
من اولاً عندي بحسبت قبيله
لاشك راحت هقوتي دون عنوان
وضيعتها بين المرا والهبيله
ياكثرهم يالقرم لاقلت صدقان
مع كثرهم ماشفت منهم حصيله
اللي وقف معنا له الكيف مليان
ونترك علوم مشاورين الحليله
وحنا انجازي راع الاحسان بحسان
ماننكر المعروف لهل الفضيله
عبدالرزاق المطرفي
|