محاوره شعريه بين الشاعر تركي الميزاني والامير خالد بن سعود الكبير.

السلام عليكم ورحمة الله وبركاته :


حبيت انقل لكم هذاا الرديه بين سمو الأمير خالد بن سعود الكبير
والشاعر المبدع تركي الميزاني المطيري ...وأتمنى أن تنال أعجابكم

تركي الميزاني :

سلام الله سـلام للعلـوم الطيبـه عنـوان ** واعرف معزبه والضيف في حكمه معازيبـه
وأنا لـي صاحـب ماينطـق الكلمه بـلا برهـان ** ابا سولف معه والعلم يدري به وانا ادري به

الامير خالد بن سعود الكبير :

الا يامرحبا واهلا بشاعرقلطة المطران **تراحيب لها بالصدر تشريقه وتغريبـه
وانا ياصاحبي مانيب مثلك للشعر ميزان **ترفق بي ترى توي غشيم وداخلي ريبه

تركي الميزاني :

يدوم لك البقا والطير مايكفخ بـلا جنحـان ** وانا خابرك صقر وكل صقر لـه مخاليبـه
سبحنا في البحور اللي تضم اللول والمرجان ** واخذنا مانبي والوقت ماتصفـي مشاريبـه

الامير خالد بن سعود الكبير :

صحيح الوقت مايصفي وتعكير الزمان الـوان ** واشوف الخايبه تعجـب وهـذه والله مصيبـه
غدى عند الهزيله شان والجزله ثمنهـا هـان ** وسيف الكذب والتهريج اشوف الناس تغزي به

تركي الميزاني :

انا مثلت فيك القاف مامثلت فيـك فـلان **وطبعي كل مقفي ماالحقه واشذب عراقيبه
نبي نبعد عن المنقود والمشروه مهما كان **ولانفرح على المسلم ليا كثرت عذاريبـه

الامير خالد بن سعود الكبير :

اجل بنشدك عن فيل يحب مغازل النسـوان **تضيق ابه الاماكن والمداخل مـن لغابيبـه
يقول الهن انا الساحر انا الباهر وانا الفنان**وهو ياكل شنق غيره وكـل داري بعيبـه

تركي الميزاني :

سمعت انه على كبره يحس بعقدة النقصان **مجند له رعـاة تمدحـه وتقـول ياطيبـه
لكن الفيل يبقى فيل يوم ان الحصان حصان **وضلع طويق ماكل مايبي المرقى يعدي به

الامير خالد بن سعود الكبير :

مابين ممسح الريضان وبين ملهي الرعيان **غدى ماللجزاله دور ولا لاهل السنع هيبـه
الا يال الزمان الشين الا ياضيعة الوجـدان **نزل في سوق ابن قاسم وكل قال كم هي به

تركي الميزاني :

من اول كنت ياهداج تيما تـروي الضميـان **لكن اليـوم جمـك ماتذوقـه مـن غثاريبـه
لابد الوقت يكشف من هو الرابح من الخسران **وكل يلتبس له ثوب فـي قـده يصلـي بـه

الامير خالد بن سعود الكبير :

انا يعجبني الشاعر قوي الحبك والبنيان ** الي منه بنى بيته يشوقك فن تقطيبـه
اجاذبه العلوم اللي تونس والخفا مابان **مثل تركي عساه يفوز بالمليون ويجيبه