ذكرى وأشتياق \ديوان ابراهيم حرير العنزي

النفس طابت ومافي اليــــــد حيـــلة= وحتى العزيمة مرتخي اليوم حيلها
من عقب ماكانت عـــــزوم اصـيلة= لاطبت الميدان يشــوش ذيــــــــلها
تفخــــر بها كل العرب والقبيلـــــة =مهرة اخدلية مالقيــنا مثيلهـــــــــا
واليوم مافادة جميـــع الوسيلـــــــة= واحمولنا صارت تــزايد ابميلهـــا
صعبةو صارت مع امــــور جليلة= يبيلها جسر قــوي يرتكيلهــــــــــا
وترى الشجر دايم اعروقة طويلة= لاشررشت مـن هـويقوم ويشيلهــا
قال المثل هذه احجرة ثقيلـــــــــة= لاصار مـوقعها أيـــعي بديلهـــــــا
ومن كان واقف فوق رملة مهيلة =يجيلها ريح شـــــديد ايهيلهــــــــــــا
ومن كان يمشي يتبع للحليــلـــة= انا اشهد ان بنته لاتعتنـــيلهــــــــــا
الساس واحد نفس نوع الفصيلــة= تسمع كلام الوالـــدة في حليلهــــــا
يامن شراله من حلاله فشيلــــــة= ابعد عن الوديان يجيك ســـيلهــــــا
وربك ايربع في ارياض امحيلـة =ينزل مطرها لاتبين اسهـــــيلهــــــا
ولويعلم الانسان وين الفضيلــــة =ايجنب جميع المصلحة وايحبــــيلها

عادت ايام السعادة والهنــــــــا = والتقينا ياحبيبي من جديـــــــــد
نور وجهك شعشع البيت وسنا = شوف وجهك يجعل قليبي سعيد
يحقق الامال فينا والرجــــــــا = عقب ماكانت امانينا بعيــــــــــد
نظرتك تحرقلي القلب و ر وا = من هواكم وان قتلتيني شهيــــد
دايما حبك لي اعــــلاج ودوا = يالعسل شافي لالامي يفيــــــــد
ياحبيب القلب حبيبك نــــــــوا = مخلص لحبك و ياحبي الوحــد

هذه القصيد مهداه للرائد عناد العنزي ( ابو متعب )

يارجال الامن ياحمات البلـد=اضربوا بالنار كل واحد حسود
ناكر المعروف ولربعه جحـد=أجعلوه لنار حقده هـو وقـود
مانبي كل فاسد ازيـادة عـدد=أسحوقه ومانبي لمثله وجـود
امشدد (ن) بالدين مرتد بعـد=أمتابع الشلات وأبليس اليقـود
انقلـع عـن دارنـا قلنـا أدد=يامرض بالمجتمع مامنك فـود
بفضل رب البيت الواحد الاحد=نبقى نحمي دارنا درع وسدود
قادنا المغوار بالطيـب أنفـرد=قادنا صقر العروبه بكل جـود
الاسد عز البلد نسـل الاسـد=موحد الامة له العالـم شهـود
قادها بالسيف مـن الله المـدد=من قبيلة كلها أحرار وأسـود
عيال وايل عزنا وجه السعـد=ماخبرنا واحد(ن) منهم شرود
ولاذكرنا عنـاد للقـوة سنـد=واقف كالذيب عن داره يـذود
ابو متعب جاهزخصمه طـرد=أطرده بالامر وبخشم البـرود
ياالله احفظ دارنا طول الامـد=تزدهر بالخير أبظل ال سعود

هذه القصيده موجهه للشاعر محمد فضل المريسي
ساحه الشعر

يالمريسي ساحه الشعر انتهت =والملل حت الصخور وفتها
الخبول القشم باعت واشترت = وبدلت طعم الزهور بجتها
مايهم من المعاني ماانزلت= وكلمته عند النهايه زتها
القصيده طولت ولا اقصرت = ماتوصل للهدف من هتها
المواقف غيبت والا احضرت =قربت ولا بعيد ابعتها
المهم الاسم والصوره اظهرت =بالجرايد والاذاعه ونتها
تنحسب يمه قصيده وانشهرت = سمعت المغرور زود شتها
ومن يقول الصدق ناقته اعثرت = حوصرت بين الحفر واخرتها
عن بقايا الركب قصب اخرت =ومن منافس للسباق اجهتها
ومن يعز النفس دوما ارتقت = للمعالي سايره ماكتها
والاصيل الذرب نفسه مااشتهت = العلوم المهاجه مامتها

رد الشاعر محمد فضل المريسي
يابن وايل

يابن وايل ساحت الشعـر انحــنت = استسلمت للي تزوج بنتـــــها
روحت معه وعلى الشاطي رست = من سكن معها وراكب يختها
صارت اشلل ومنها عـينـــــــت = من يحابيها ويتبع رتمــــــــها
هذا من ذاك وهذاك اللـي بغـــت = ما سمعت للي يقول لنعتـــها
والكلمة المثلى بمـعنـاها سمـــــت = حتى لو راد الجماعة كتمـــها
والشعر غـاية اذا الغـاية رمـــــت= افهم المقصود اذا مارمتـــها
يكتب الكلمة لواقـع ترجمــــــــت= كانها البذرة ويطلع نبتــــــها
الشاعر المغرور عمره ماثبــــت = ليلة الجمعه اذا جاء سبتــــها
التصنع زاد والفرقة نــــــمـــــت = يوم ماتعودها ولاانا عدتـــها
كم نفس بالشعر قامــــــت حيت = ترقى بالمنبر تفجر صمتـها
هذه الساحة رمتنا وارتــمــــــــت = في مغثتها مثل ماقلتــــــها

لاتقط نغـزات جعلـك ماتــفيــد =والرويتب كان يمك اقــطعــــة
لاتفلسف بالكلام ولاتــزيــــــد= وكان عندك من كلام ابـلــعـــة
لاتباحث بالرمال وبالجــريـــد= مــــــدور الزلات هذا مطـمعة
ذكرنا ناصـع وتاريخ مجيــــد =افتخر والراس فـــــوق ارفعــة
ربعي الويـلان والعالم يشيـــد =بفعلهم بكل الوصايف مااروعة
وحدوا شبه الجزيرة من جديد= عقب ماكانت اراضي امـقطعــة
سادها بالسيف والراي السديد =ابو تركي شعبه التــــفـــوا معـة
زانها العمران والامن الفريـد =والمهندس راح يبــــني مصنعـة
انتهى عصرالتعصب والعبيد =والفقير صار محـد يمـــــــنعــــة

عجزت ارتب موقفـي بالتقاعـد=وقعدت اقول الشعر واجيبه امثال
فكـرة اتقربنـي وفكـرة تباعـد=ماعاد اقدرهـا بالامتـار واميـال
مـرات اثبتهـا ومـرة اتراعـد=تهتز مثل اللي حدث فيـه زلـزال
ياعزمي الثابت على السير ساعد=دربي طويل وزايد الحمل بثقـال
اصبر على الخدمة على شي واعد=وكله بعلم الغيب وازيـادة المـال
تلعبـي الافكـار نـازل وصاعـد=واضيع احسابي ويصفيلي احثـال
راح الشباب وحيل مافي يساعـد=لازم اريح شيبتي وانعـش البـال
ابيت السكن مرتاح لاكنت قاعـد=بين الاهل بين القرايـب والعيـال
ابي اتقهـوى والتـزم بالقواعـد=واشرب مع اثقال الرجاجيل فنجال
واثبت على امراحي ولاني امباعد=وسط المدينة ماني اليوم رحـال
ياالله تستر عيبنا ولـي تساعـد=وتبعد اعيون الحسد مع كل الانذال
وتفـك هـم لفنـي كالمضاعـد=نتيجة التقصيـر منـا والاهمـال

هذي ثقة


هذه مساجلة بيني وبين موفي الدين

هذي ثقة ماهي علينا غريبه = ومن قال قول أيتحاسب على القول
أجيب معنى القول والله لاجيبه = وأسمي مع العربان لازال مشيول
والله لو ماكنت قد المهيبه = ما قلت بك وصفا وانا عنه مسئول

رد موفي الدين

ولوماالشرف والمرجله تحتذي به = ما يظهر العنوان واضح ومدلول
ولو منت من يرفى خمايل قريبه = ما صار طيبك عن ردى ذاك مقبول
ولو أنتمعن كلنا بالمصيبه = ونقيسها بالعمق والعرض و الطول
ما والله ان احدا يعادي صحيبه = بالعكس يبقى بيننا الود مكفول

قلت

من مثلكم ياخوي حن نحتذيبه =وانت تورلك على جال منهول
مافيه مابين الاحبه طليبه = أبساط أحمدي خله على طول مفلول
ابوضح النقى هات البيوت العجيبه = أحصد حصاد وحاصل القول محصول
البحر جاكم مايهاب الشعيبه = والموج ماخاف النقع لو هي أسيول
والعمر رايح والحياة الذهيبه = ولابد مامنا على الكتف مشيول

رد موفي الدين

غزالله ان الراي يطلب صليبه = واليا حكم ما قيده ضد مجهول
ولكل جرحا خاصا به طبيبه =حتى الجرب راعيه يطلى على الحول
جتنا الرعود الداويات المريبه=ماهي على مقياس واكف وهملول
منها غدى المرباع ما ينحكي به = وغطى الربيع ديار من مبطي محول
وتو الحوير يهتني في حليبه = شطرا يصبح به وذا شطر مشمول

قلت

شنا أبنواحيها ونشرب قليبه = واكثر أوقاتك ماترى عندك الزول
كل على ذوة غدى ينتحيبه = وراعي الغنم صدربها وغز مخيول
يندح من أنوع اللبن والرويبه = أبمخمر الخاثر به الزبد مزلزل
عيشت بدو ياهي حياة صعيبه = ياحلوها لاربعت خير وأسيول

رد موفي الدين

مهما كتبت من القـــوافي عذيبه = والله مدري ويش ابا اقول واقول
حتى ولو مثل الذهب في صبيبه = ما هو لابن فيحان موفي ومعقول
صعبا على اللي به تعرف يسيبه = والوصف عن قدره عقيما ومقفول

قلت

القول يعرف من تعابير طيبه = الشاعر اللي ردلي أبغير منقول
الطيب عمه والفخر هو نسيبه = وزين المعاني بانيه أجبال وأسهول
وأن قال أبن فيحان ماينحكيبه = من الحكم ما هو عن الناس مسؤؤل
يبقى أبو حرير وانا أنتخيبه = راعي غنم يسرح من الحول للحول
وعصرالحضارة ماعجبنا زبيبه = وأزين منه خبز مجهز من أعدول

رد موفي الدين

متواضعا في منطقه وتهذيبه = راعي غنم واشلون هو قاد الاسطول
من ساس ذيبا من توحى طنيبه = عقب الامان يصيبه الرعب بذهول
وأصغر عياله قايدا للكتيبه = لامن مشى تقرع له أجراس وطبول
على عدوه لا بدى تقل شيبه = وعلى صحيبه كنه الزبد بصمول

الجيب غرز

الجيب غرزوما غرزهو لحالة =وقعد متحير مدري ويش سويلة
غلطان من هو يمشيلة حدى عيالة= الارض رخوة وصارالورع ياويلة
يمشي على الهون في حله وترحالة= كنت احسب الجيب دايم شاد حيلة
يالين غرز وصرنا كلنا اقبالة =ودريول الجيب لازم حان تبديلة
الورع حول واسوقه انا ابدالة =والصعب لازم اقبالي سهل تحليلة
الدبل فز وصارن تقل محالة-= توايرة كلهن ما قومن شيلة
وفزعولي اخوان كانوا عند عرزالة= واحد ايشر مع الثاني يباريلة
جابوا لي الونش ومد الونش لحبالة =واقفى به الونش رايح تقل يوميلة
ورجعت للبيت صارت حالتي حالة= اشوف جسمي تعب والراس يشكيلة
والجيب متليص بالطين سروالة =صعب ايتنفس ويبغي من يهويلة
وديته المغسلة والوضع يرثالة= وتفازعوا كل منهم شايل زيلة
بلشو مع المغسلة من صارت حثالة= وسيارتي واقفة محدن يراعيلة

عم الفرح واليوم زايد أنوارها = تضوي انوار الخير والدار دارها
تشع بالانوار في كل جيهه = يلمع على الصالات يبرق أجدارها
ليله عمر فيها مشاعر تشابكت = تضوي بهاالحاضروترخي أستارها
يفرح بها العرسان والربع والاهل = حان الحصاد اليوم نجني أثمارها
الله يتممها على الخير والفرح = والله يكافينا بلاوي أشرارها
تمضي لياليها بخير وسعادة = فرح وسعاده دايما في عمارها
يوم بها الويلان أعلن زواجهم = أصل وفصل لاصار تفعل أحرارها
أحرار من نسل الرجال النشاما = يوم بها الشجعان يعرف أدوارها
شجعان بالطولات ياحي ذكرهم = أهل الكرم حماية نياق جارها
حمر النواظر بالليالي الصعايبه = حمايه للدار دوما أسوارها
اليا عطوا مارجعوا بالعطيه = عطيه أغبيني تثبت أحضارها
عندالخريصي داله الضيف مهتني = يذكر فعايلهم بداخل أشعارها
قال العامودي يذكرالطيب والكرم = وعده مع ربعه وداره أجوارها
قالوا بها مهرة أصيل أخدليه = لاطبت الميدان أجود أمهارها
وقت التحدي تسبق الخيل عدها = حر أنطلق يقطع فيافي أوعارها
بين القبايل مرتفع دوم ذكرها = لاقالوا الزينات طالت أشبارها
جمالها غطى على كل حاجز = وقت السبق بس يتطاير أغبارها
واليوم ساد الامن والخيروالرخى = في كل ديره تفتخر في خبارها
قبيلة ما تنذكر بالرديه = ولاذقت طعم العز كانت أبهارها
ترى فرحكم ياهلي من فرحنا = ولاذقتوم المرة نذوق لمرارها
وصلاه ربي عد ماذعذع الهوى = على النبي الهاشمي من اخيارها

افتحولي الباب

افتحولي الباب يالشرطة تــــــــراني =راكب سيـارتي واتبع هـــــــــواها
تبي تدخل بالمعسكر لو ثـــــــــواني= الارضية قـار والجيش ايحمـــــاها
عقب ماهي واقفه في وضـع ثانــــي= دايم التربان تلعب في قفاهــــــــــا
خشمها مخفوس نـازل بالطمـــــاني =هيئات الســكان بالحــفرة لواهــــــا
صبغها تعبان طاويــة الزمــــــــاني= وفوق هذا حـر ياكافي شواهــــــــا
والمصيبة من تاخر بالاوانــــــــــي= صادف السيدات بالدرب وسواهــا
انصدم بالواقع وبالوجه شانـــــــــي= حين شاف السيد ضارب في فلاها
جاك مسرع مثل سيل محدرانــــي= يرمي الموتر ومايدري رمـلــــــها
عند حوش الامن والشباك دانــــــي =مثل ماقالوا ايكحلها عمــــــــــــاها
علقوله كرت احضر يافلانـــــــــي =يشرح الاسباب والقصة رواهـــــا
ليه واقف والسبب ويش المـعانـــي =واقف بممنوع وش قصــدك ورها
طلع دايخ ماعرف ويــن المكانـــي =وين صارت موترة والله نســـــاها
راح دار وجال يذكر وين كانـــــي =باأخر المشـــــــوار بالصدفة لقاها
حرك يم البيت ينتظره صيانــــي =الغداء وين الغداء يبغي أيحشاها
والعيال ابشوهم بالقلب بانــــــــــي =حبهم وسط الحشى ثبت بنـــــــاها
ياالله بمسؤل يكسب للرهانـــــــــي =هو يشوف المشكلة ويعرف عناها
الممر محشور والواحد يعــــــاني= لازم التنظيم يـــــــــرفع مستـواها
من سمع مشروع يصنع باللســاني =ويـن دور الهندسة ابهذي وســواها
نبي اتسهل الارض مانبغي مبـاني =اتصبها بالقار بس هـــذا كفاها