ديوان الشاعر مساعد مزعل العنزي

انا مصيفي السوده ان طابت لي مزاجي طاب/
وان ماطاب المزاج بسودة ابها ماجلست ابها
واذا طاب المزاج بسودة ابها كلها من باب/
على شان اللذي بالنفس تخطي مانحاسبها
ولانبحث عن الزله ولاندور لها الاسباب/
وجميع المعضلات مسهله لجل مطالبها
ولا يالبارق اللي صرت للعالم حديث عجاب/
على رواق الشمالي سقت والانظار معجبها
لعل الوابل اللي طاح مايبقي وراه اتراب/
يعل الضامي الولاهان والاوطان يعقبها
خفوق اللي حواه انسان وباقي خافقه منصاب/
جروحه صاطيه بااقصى الضماير من سبايبها
واقول بسم الله الحافظ من الاقراب والاجناب/
ولوطلت عيون الناس ماتحفظ مصايبها
اخذله من ظلام الليل دون العالمين احجاب/
حجابٍ ضف نهد وخصر والارداف حاجبها
والا يحاسب الليله عليك من الليال احساب /
ولاظني تفوتك ساعةٍ ماانته بحاسبها
وانا مصيفي السوده ان طابت لي مزاجي طاب
وان ماطاب المزاج بسودة ابها ماجلست ابها
مساعدمزعل

اسعد الله اوقاتك وعمّر حياتك بالطاعه والأيمان
الف صح لسانك على القصائد المميزة
وردة بنفسج لروحك الطاهرة

الدمعه اللي حشمت خد عن خد
هو ليه ماكل الخدود تحشمها
لاصار حق القرب والجار لابد
بس الامانه حُملت من عدمها
يبدي لك الحاضر ويخفي لك الغد
ويمكن من الغد الحواضر حسمها
موت الضماير قرب القرب للبعد
وجاب البعاد النايدات وخدمها
يامكثر الاشكال تبدي لك الزهد
جند الخفى بسلاح ريشة قلمها
ياهيه ماتجني من الحنظله ورد
ولاتنوكل مره ومرٍ طعمها
والعبدلويبحث عن الرزق بالجهد
ماجاب حبه خالقه ماقسمها
مير اللذي ضيق خفوقي وانا اشهد
يوم السفن راحت يرفرف علمها
تحمل من الخيرات للي ورا الحد
واللي بوسط الحد ماااحدٍ رحمها
ناسٍ وفت بالعهد ماتنقض العهد
وحسراتها في عنق شخصٍ ظلمها
واظن من كتمانها بيح. السد
مقواك ياصدرٍ حواها وكتمها
وصقر العروبه لاوقف وقفته جد
لعل من حوله تبرّي ذممها
ياخادم البيتين شوف وتوكد
الناس محرومه من اللي حرمها
ياطيب السيره ترا الخير مبعد
والناس بك مازال ترقب عشمها
نبغى الرواتب يابو متعب تزود
ونبغى البطاله تنتهي ونعدمها
ونبغى البضايع بالمتاجر تحدد
ونبغى الشقق ترخص وينزل سهمها
ترا الاراضي عندنا سعرها شد
وزادت على القرض العقاري قيمها
وتكفى يابو متعب ترا خيركم بد
من كبر مدتكم تميز كرمها
وعداتكم مد العطايا بلا عد
وشعبك ترا شخصيتك يحترمها
ويالله عسى رسالتي عنك ماترد
وان جتك طلبه خلها في تممها
مساعد بن مزعل

وحياتك بالطاعه والايمان

رائع ومميز

الله يعطيك العافية

-
من ينزل نجم ثابت في محله عن محله
والنجم ثابت مكانه ماتزحزح عن مكانه
كان تسمع للنصيحه شوف ذاك الدرب دله
من يعاند في زمانه صار عبره في زمانه
كيف تعقد راس حبلك وانت ماتقدر تحله
كيف تضمنها لغيرك وانت ماعندك ضمانه
صاحو اصحاب القبور وقالو ذاك العلم خله
وانت حيٍ وسط الاحيا مااحدٍ يصغي باذانه
رحمة الله يارفيقي رحمة الله رحمة الله
ماتوا اصحاب الكنانه ماتوا اصحاب الكنانه
قيل طيرٍ بالبحر مايذبحه ياغيرضله
وكل شانٍ دون شأن الله نزل من تحت شانه
بيت واحديرشد الفاهم على صدر المجله
كنه يقول الطريق الصح قدم العين عانه
تحسب ان ابليس مات ابليس حي ومرتكله
رأس خشم طويق ما بينك ولابينه ميانه
تسعة اشهورٍ وتسعه والخواطر مسفهله
ليت كمل للضحيه بعد ماصام ارمضانه
يوم خيل في عيونه للمزون المستهله
غرته نظره ونظره جابته يجمح حصانه
الصقـــر ياصــاحبــي نــوبٍ تغره شوفتله
جابته حيله وحيله والسبب شوفت عيانه
سلــم الله سلــم الله يغــفر الله كل زله
والحظيظ اللي بذكر المعتلي ينطق لسانه

مساعدمزعل العنزي

حبل الصداقه يافتى الجود منساه
ويابــو ســلامه مانسيت الصــداقـه
تمشي بنا الايام من غيـــر مشـهاه
والعبـــد يابــو حــور لله مســاقــه
وعسى المزيني جنة الخلد مثواه
ختمة اوراقه يـوم تكشـف اوراقه
بالجنـه الخضـراء مـحـلــه ومـــاواه
واربــط علـى قلباً شكى من فـراقـه
ياسعود بكـره كــل حــيٍ ومــاجــاه
كــلٍ علــى ماقيـل يـطــوي رواقــه
يفوز عنــد الــرب لاطـــاب مسعاه
لاختار مــن دنياه حســن الرفاقه
العمــر لــه مبــدا ومبــلـغ ومنــهاه
ياصاحبي وقتك سريع اصطفاقه
اللي يخيل المزن غيره شرب ماه
ياما اعترض للعمر من كم عاقه
ومن بيننا حبل المحبه حفظناه
ولاني من اللي يقطعون العلاقه

(الشاعر /مساعدمزعل العنزي]

من مدلك يمناه حذراك حذراك
عن مثله اوشرواه تقصر يمينك
لاحدتك بكره على اقصاك دنياك
ترا ابن عمك بالزمن هو عوينك
رصيد لو طال الزمن عنك ماجاك
تلقاه لاجارت ودارت سنينك
مالك وماتملك بيمناك مااغناك
لاشفت كل اعداك متكاتفينك
ربعك سند ظهرك لياحد شرواك
وترا الجماعه ماتهينك تعينك
وكب النميمه بين ذولا وذولاك
وترا النصيحه هي كمالك ودينك
ولاطابت النيه ترا طاب مسعاك
الـنــيه الـنيـه تــراهــا تـدينـك

(ربعي إيمنه)

سلام تسليمٍ ظهر نوره على نور القمر/
عموم كل الناس يشملها ولاهو مختصر
ريحه مثل ريح البخور ونوره يغطي كل نور
على الرجال الوافيه اللي لها عز وقدر/
ربعي إيمنه وقت اللقاء صغيرهم مايغلباء
تثبت كما تثبت جبال الارض في عز وفخر/
وانا بربعي مفتخر تاريخهم نقش بحجر
ماينمحي لو دارت الدنياء دهر يقفى دهر/
ربعي لهم فعلٍ جميل عن الجزيله ماتميل
بين القبايل مجدها واضح وله عين وخبر/
وانا احمد الله وشكره واثني لربي واذكره
ان لابتي بفعالها بين القبايل تنذكر/
ولاني بجاحد للفعول كل لابةٍ فيها زحول
وكل القبايل والنعم والطيب ماهو مختصر/
والرابح اللي يستقيم يعلم تعاليم العليم
الواحد اللي كل ضلٍ دون ضله يندثر/
دنياك يالغافل تدور باقي لها بكره فطور
زود زهابك واتكل ماينفعك كثر الحذر/
ترا السعيد بدنيته من اصلح الله نيته
يعيش بالدنياء هني ويفوز أبها يوم الحشر/
واسلك طريق الغانمين الصالحين المصلحين
اللي مماشيهم على هدي النبي سر وجهر/
نصيحةٍ ياهل العقول ابااختصرها لاتطول
وصلوا على محمدعدد ماداج في بر اوبحر/

مساعد مزعل

سلام الله على اهل الحفل وافي من وفا مبداه
تحيتنا ومبدنا ومبدا الخير مبداها
على الجمع الكريم اللي لهم راية وجاه اوجاه
على رجالٍ فعايلها التاريخ الحر محصاها
على رجالٍ لهم هيبه لهم وقفه لهم منصاه
عزيزين الجناب تزبن المضيوم لاجاها
ونعمٍ بالكريم المرتعدحمد عزيز الجاه
من ارجالٍ مثل ثقل الجبال الصم لعداها
وهذالمرتعد شيخ وكريم وضلع من يخفاه
عقيد وشيخ وربعه تزبن اللي لاذ بحماها
وربعه إيمنه سيفٍ له المسلول في يمناه
تحاشاها القبايل بالمعارك ماتمناها
وعزيزين الجناب الجارهم مايقربون احماه
وقوانين العرب واسلومها ماتقطع اعراها
وهذا المرتعد راع الجميله يوم لاذ اقراه
وحتى الشمري رد الجميله ماتناساها
ونعمٍ بالقبايل كلها والظلم مانرضاه
وكل الناس علم الطيب باولها وبتلاها
نحمدالله وحنا مسلمين وربنا نخشاه
وجميع المسلمين اخوان والمله تبعناها
تحت راية ملكنا ياعسى عدوانه من افداه
وجميع المملكه توفي من ادناها ليا اقصاها
ومن يسعى على نهج النبي يطيب له مسعاه
والا ياحض نفسٍ طاب عند الله مسعاها
ويبقى فعله اللي تحصده يمناه في دنياه
وجمايل سابقه بينه وبين الناس سواها
تبي تمشي بنا الدنيا بلا رغبه ولا مشهاه
وهاذي حالة الدنيا تدور بحكم مولاها
كما مزنن مقاديمه كما الضلعان في منشاه
تعدا ديار واديارا سقاها ماتعداها
امساه الليل بديارا قريبه او بعد ممساه
على شكله ولونه حالة الدنيا وممشاها
ولوتفطن بها الدنيا تراها كلبوها اشباه
تشبه للبشر باشكال مااطيبها ومحلاها
ترا المخلوق لو تجمع له الدنيا عسير ارضاه
ياكثر اللي حمل هم العباد ولا ادرك ارضاها
لكن ارض العظيم اللي تقدم له تبي تلقاه
جميع اعمال تعمله تبي تحفظ وتلقاها
وصلى الله على محمد كما مزنن تنثر ماه
من امزونن غزيره سالت الوديان من ماها

الشاعر مساعد مزعل العنزي