ديوان الشاعر/ منصورالجلعود

أدنيت عدوانـك وابعـدت مغليـك=مـدري جهـل ولا غـرور وحماقـه
وش فيك يابن الناس وش جاك وش فيك=صداقـة الأنـذال ماهـي لبـاقـه
مـن صادقـك للهون للهون يرديـك=يرديـك لـو زانـت معـاه العلاقـه
اللي عن الطاعـات والخيـر يلهيـك=ان طعتنـي اذبـح لفـرقـاه نـاقـه
واللـي يجـرك للـردى والتهالـيـك=ان طعتنـي جـره ونشـف ريـاقـه
واللي يبي قلـوب الخلايـق تعاديـك=ان طعتنـي عـاده وقطّـع وثـاقـه
واللي حكا بغيرك وهو حاكـي ٍ فيـك=ان طعتنـي تركـه لمثلـك وفـاقـه
واللي يتضيمى لجل يشرب من يديـك=ان طعتنـي حـرم عليـه الـذواقـه
واللي يتميلح لك واذا غبت يهجيـك=ان طعـت شـوري لاتمالـح مذاقـه
واللي يتضيحك لك واذا رحت يشنيك=ان طعت شوري ابتعـد عـن نطاقـه
واللي يبي يوذيـك بالديـن ويجفيـك=ان طعـت شـوري لاتِسّلفـه طاقـه
واللي يبي بدرب الكفـالات يرميـك=ان طعـت شـوري لاتطيـح بزلاقـه
واللي يبي يخشرك بالنـوق ويشكيـك=ان طعـت شـوري لاتخاشـر نياقـه
واللي نـواك بسـو ماهـو مصافيـك=امـا جــزاك بـسـو ولا بعـاقـه
الحـر يبقـا حـر مافيـه تشكـيـك=والتبـع تبـع ولا يـغـرك نفـاقـه
يافلان جاك النصح من قلـب يغليـك=نصيحـة محـب ٍ بقلبـه شفـاقـه
خذها قبل تصعب عليـك المساليـك=مـن صـادق ٍ يبغـا عـدوك فراقـه
ولابـد مـا سـود الليالـي تمسيـك=وتذكر كلامي عـن بنـود الصداقـه
وآخـر كلامـي ياعسـا الله يهديـك=النصح لامـن فـات صعـب ٍ لحاقـه

ياعـيـن هـلــي دمعي اليوم وعـزيــن=هـلـي دمـوعــي قـبــل لايـقــال مـرحــوم
الـعــمــر ســلــفــه والـمـنــايــا ديــايــيــن=يستخلصـون الديـن فـي وقـت معلـوم
الله يـثـبـتـنـا عــلـــى الـخــيــر ويـعــيــن=ويغفـر ذنــوب(ن) مالـهـا عــد ورقــوم
نـفـنـى وكـــل الـخـلـق لاشــــك فـانـيــن=ما باقي(ن) غير الذي أوجب الصوم
بعد الفنـى نبعـث حفـات(ن) وعاريـن=الشمـس قـدر المـيـل والـجـو مـشـؤوم
رحـمــاك ثـــم رحـمــاك رب المـصـلـيـن=نسألك ظل العـرش عـن حـر محمـوم
مـــن بـعـدهـا يـشـفــع امــــام النـبـيـيـن=يـبـدى الـسـؤال ويكـثـر الـنـوح والـلــوم
يـبـدى الحـسـاب وينصـبـنّ المـيـازيـن=يظهر خفي الفعـل فـي ظـرف مختـوم
يالله ثــــــــــــم يالله رب الــمــســاكـــيـــن=عـفـوك وسـتـرك يـاولــي دايـــم الـــدوم
يانفس توبـي قبـل ماتشخـص العيـن=ويلتف ساقي ويمسي العظم مهشوم
لامـــا مـتــى يـانـفـس وأنـتــي تـمـنـيـن=لامـــا مـتــى والـمــوت لابـــد لـــه يـــوم

ودعـت جلعـود المكـارم وأيقنـت=بـأن القـدر لابـد يـوم ٍ يجيـنـي
رضيـت بالمقسـوم وبالله آمـنـت=اللـي كتـب وقـت المنايـا يعينـي
وش حيلتي يانفـس لامـن تكفنـت=وش حيلتـي يـوم النعـش يحتوينـي
وش حيلتـي لاحـل يـوم وتبينـت=في مسجد ٍ ماتبصـر النـاس عينـي
وش حيلتـي لانزلونـي وتيمـنـت=وصكوا علـي مابيـن لبـن ٍ وطينـي
وهلوا علي كثب الثرى عقب ما كنت=حيـن مـع الحييـن قبـل اليقينـي
وحان السؤال وزاد خوفـي وأذعنـت=لسؤال منكـر مـع نكيـر المتينـي
ياليتني صليت وزكيـت وأحسنـت=وياليتني مـا طعـت شـور اللعينـي
ياليتنـي فيمـا مضـا لـي تزبنت=ياليتني مـا أهملـت نفسـي ودينـي
ياعامر الدنيـا يجـي يـوم لاهنـت=تفنـا ويبقـى الـورث للوارثيـنـي

[/center][/b][/size]

قصيدة على بحر الرجز=
يالآدمي ياسرع والله ماتموت=مار البلا لامت وش عقب الممات؟؟
وش حالتك لاصرت بالكفن مغموت=وش حالتك بالقبر من عقب الحيات!!
ظنك يفوت العمر يوم انه يفوت=لامايفوت وكل شي ٍ له ثبات
كل شي محصا من كلام ومن سكوت=بأمر الذي احصا جميع الكاينات
اما انتفعت بصوم واذكار وقنوت=ماينفعك لامت طرد الملهيات
ماينفع التدخين او لعب البلوت=ولاينفع التفحيط وشرب المسكرات
ولاينفعك قولت احبك حب نوت=لاصار حبك حب تغرير البنات
ولاينفعك لو صار لك ملك ٍ وقوت=لاصار ملكك من ربا ولا سحات
ولاينفعك املاك ملكك لاغدوت=ظالم ونايم عن عيون ٍ ساهرات
ولاينفعك رتبه ومنصب لاسهوت=عن الحقوق اللي بحلقك واقفات
ولاينفعك ظلمك ولو تلبس بشوت=لاصرت مثل الكاسيات العاريات
ولاينفعك مال ٍ اخذته بالبهوت=المال بالبهتان ممحوق بركات
ولاينفعك جفوك ليامنك جفوت=امك وابوك /أهل الفعال الطيبات
ولا ينفعك زوجات وعيال وبيوت=لاصرت ماتصلي ولاتعرف الزكات
ولاينفعك سعيك ليا منك سعوت=بقطيعة الارحام وفعل المنكرات
ولاينفعك لامنك بيوم ٍ خلوت=فعل الذنوب الملهلكات الخافيات(1)
ولابعد عصيانك لذو الجبروت=بفعل الذنوب المهلكات الظاهرات(2)
كانك عن الجنه بهالدنيا لاهوت=وقف وقل يانفس يكفيني شتات
تكفيني ذنوبي ليا مني غفوت=وش لون لاطوّل مع الذنب السبات!!
اما نجوت اليوم فاني مانجوت=من صالي النيران يالله النجات

(1):روى الإمام ابن ماجه رحمه الله في سننه
عَنْ ثَوْبَانَ رضي الله عنه عَنْ النَّبِيِّ صَلَّى اللَّهُ عَلَيْهِ وَسَلَّمَ أَنَّهُ قَالَ :

( لَأَعْلَمَنَّ أَقْوَامًا مِنْ أُمَّتِي يَأْتُونَ يَوْمَ الْقِيَامَةِ بِحَسَنَاتٍ أَمْثَالِ جِبَالِ تِهَامَةَ بِيضًا فَيَجْعَلُهَا اللَّهُ

عَزَّ وَجَلَّ هَبَاءً مَنْثُورًا.قَالَ ثَوْبَانُ: يَا رَسُولَ اللَّهِ صِفْهُمْ لَنَا. جَلِّهِمْ لَنَا. أَنْ لَا نَكُونَ مِنْهُمْ وَنَحْنُ لَا نَعْلَمُ.

قَالَ: أَمَا إِنَّهُمْ إِخْوَانُكُمْ وَمِنْ جِلْدَتِكُمْ وَيَأْخُذُونَ مِنْ اللَّيْلِ كَمَا تَأْخُذُونَ وَلَكِنَّهُمْ أَقْوَامٌ إِذَا خَلَوْا

بِمَحَارِمِ اللَّهِ انْتَهَكُوهَا )
صححه العلامتين الألباني والوادعي رحمهم الله تعالى .


(2):روى الإمام البخاريّ رحمه الله تعالى عن أبي هريرة رضي الله عنه قال :
سمعت رسول الله صلى الله عليه و سلم يقول :
" كلّ أمّتي معافًى إلاّ المجاهرين،
وإنّ من المجاهرة أن يعملَ الرجل بالليل عملاً
ثم يصبح وقد ستره الله فيقول: يا فلان،
عملتُ البارحةَ كذا وكذا، وقد بات يستره ربّه،
ويصبِح يكشِف سترَ الله عليه "

.اجارنا الله من الذنوب والمعاصي ماظهر منها ومابطن

محبكم في الله
أبو جلعود

هذه القصيدة في حفل أقيم في مدينة أبا الورود التابعة لمنطقة القصيم
على شرف الشيخ/عقيل بن مهنا بن مجلاد
وجمع من شيوخ الدهامشه ومن شيوخ القبيلة وشعرائها

يارجال محددت الجمـل بالمصاويـل=لكم سـلام اسـلام مثنـي ومـردود
وأحلى سلام اسـلام بكـادي واكليـل=من حد عرعر ولسميراء وأبـا ورود
سـلام للمجـلاد زحـول الرجاجيـل=شيوخ الوفى والفعل والطيب والجـود
وللي حضر أهدي سلامـي بتبجيـل=سلام ٍ أحلى من هـوى بـارد النـود
من بعـد هـذا يالقـروم الحلاحيـل=ما ينبني جودن على غيـر موجـود
ومن وجد موجودي تجـود التماثيـل=جادت بجلب النصح والنصح محمـود
يالابتي حـذرى مـن القـال والقيـل=الصمت حكمه وأكثر القـول منقـود
ويالابتـي كـم بالسوالـف تهاويـل=ما كل ما يحكـى مثبـت ومشهـود
ويالابتي بيـوت التجـارب مداهيـل=ومن لا احترز من نقص ما زاده الزود
ويالابتـي مـن لاوطتـه الغرابيـل=يظن كـل النـاس بسهـود ومهـود
ويالابتـي الديـن يسـر وتساهيـل=ومن يلتزم بالدين بالخيـر موعـود
ويالابتي كتـوف الخلايـق مكاييـل=وما كاله الكيـال محصـى ومعـدود
ويالابتـي دام الليـالـي مقابـيـل=تـزودوا للمـوت والقبـر والــدود
وصلوا على المختار ما درهم النيـل=واعداد ماهب الهوى بأخضـر العـود

صوت من اخي الشاعر القدير/عويد ابن كسار المضياني بمناسبة مسابقة سيف عين حايل

وسم الجزاله واضحه ومعروفه=لاماعليها اثنين فيه اختلافي
ومن الخليج لبحر جده سمعنا=بجبال حايل صار مرسى المرافي
مراكب الشعار تمشي مع الريح=لاكن حسب ظني وكل اعترافي
لاصكت فحول العرب بالمثايل=والكل قدم شاعره بأحترافي
جزلٍ من الويلان نسل الجلاعيد=بسم عنزه شاعر عن الكل وافي
يشيل حمل(ن) مادرى عن ثقيله=حملٍ على بليهان شاله عوافي
ياعيال وايل والعرب تجمع اصوات=وصوت العرب يسري مع الليل صافي
اليا انقسم نصفين نجم المجره=في سيف واحد نضرب الدرع كافي

ورديت عليه بهذه الابيات:

قال الجلعودي هيض البحر قافي=بحر القصيد اللي ليّا قال يآفي
عويد بن كسار راع الجزايل=أنا أشهد انه للمجره يضافي
نجم ٍ ضياه بعالم الشعر ساطع=يفداه من هو في سما الشعر طافي
نخا ربوعي محزمي عيال وايل=لجل الفزع بالصوت والصوت شافي
أصواتكم ياعزوتي هي مرادي=حد ٍ مثل حد السيوف الرهافي
في مجمع ٍ يجمع ثلاثين شاعر=الكل منهم بالمواقف يشافي
كل ٍ نخا من لابته من يوفي=وأنا نخيت كل وايلي ٍ سنافي
بكم يشوش الراس ياتاج راسي=يأهل الفزّع وقت النزّع بالشظافي
من غيركم يحكم ويآمر وينها=لاطوحن بيض البني بالغدافي
وأختم كلامي بمثل ما قال عويّد=في سيف واحد نضرب الدرع كافي

وبفضل الله ثم بموقف اخواني بمضايف عنزة حصلت على المركز الثاني بالمسابقة

الف الف مبروك يا ابو جلعود وتستاهل كل خير حضور للاحتفاء
واتمنى لك التوفيق والمزيد من التقدم في مسيرتك الشعريه والادبيه

كفو هل الريشا

قال الجلعودي ياتباشير الأعياد=عودي علي في ليلة العيد عودي
خليني أنسى ملحمة امة الضاد=اللي بلاها كل وقت ٍ يزودي
ودي أبدل هاجس الحزن بانشاد=وأنثر على طيف التفائل ورودي
متفائل ٍ بالخير والخير يزداد=في ظل أبو متعب عريب الجدودي
عبد الله اللي للوطن درع وعماد=صقر العرب معمي عيون الحسودي
قاد السلام العالمي لكل الأشهاد=سعودي ٍ يحمل سلام ٍ سعودي
ملك ملك حكمه على نورها ساد=مايعرف الغلظه ولاهو حقودي
هذا هو الاسلام ترغيب وجهاد=ماهو بتنقيض الذمم والعهودي
الدين مايبنى على كره وأحقاد=ولايحمد الأحقاد كود اليهودي
قولوا لخصيم الحق الحق وراد=بالدين والدنيا ويوم الوعودي
الكذب والتدليس لابليس مافاد=حتى يفيد اللي غدوا له جنودي
يأهل الفتن السالفة ماهي عناد=ملعون موقظها عسا مايعودي
بشهر الفضايل ضاقت بلاد وعباد=بأسباب من جازى الوفا بالجحودي
كادوا لأمير الأمن وابليسهم كاد=والله يخزم ابليس مهما يكودي
كادوا وربي لكايد الكيد مرصاد=مابين كاف ونون كانوا وقودي
هذا جزا اللي يجزي الخير بافساد=من خالق الدنيا ومحصي الوجودي
يأميرنا بالأمن حنا لك سناد=على الذي شره تعدى الحدودي
حنا هلّ الريشا عريبين الأجداد=دهامشة ويلان ضد الضدودي
وكل القبايل للوطن درع وزناد=اخوان في وجه المعادي عضودي
والختم صلوا عد مالج رعاد=على رسول ٍ بالمكارم يجودي

الف مبروك وبالتوفيق
وماشاء الله على الابداع الاكثر من رائع

صوت من اخي الشاعر القدير/علي بن خلف الدهمشي حينما افتقد تواصلي في احد المنتديات

يـانـاس مـنـصور افتقدته عسى خير=ويـنـه عـسـى مابه من الشر سايه
الله يـحـفـضـه مـن صدوف المقادير=عـلـه بـعـيـنـن لـلـولـي فـي عنايه
الـشـاعـر الـلـي نـور الـدرب لـلسير=بـدروس شـعـرن لـلـمضيع هدايه
يـشـرح ويـفـصـح لـلـمـعـاني معايير=جـلـبـاب واسـع لـلـقـصايد عبايه
يـقـطـف لـنـا مـن كل روضه نواوير=بــادراك عـاقـل يـتـتـبـعه بدرايه
اكـيـد مـيـز بـاجـتـهــاده عـن الـغــير=يـسـتـاهل التقدير مع بيض رايه
شـاعـر ومـبـدع صور الفكر تصوير=هو محترف ماهي مجرد هوايه
يـامـن يـخـبـرنـي عـن بـنـاخي الزير=وش فيه غايب دون ذنب وجنايه
من داخل اعماقي اقول وويش يصير=مـانـيـب مـتـزلـف ولاهي دعايه
مـنـصـور بـن جلعود يالله عسى خير=يـالله عـسى مابك من الشر سايه

وقد تشرفت بالرد عليه بهذه الابيات

لعلي خلف الدهمشي صغت تعبير=فيه أعتذر عن غيبتي وعن جفايـه
يالشاعر البيطار نسل المناعيـر=جاني سؤالـك والاجابـه معايـه
أخوك أبو جلعود بجيش وطوابير=في مدرسه يدرس فنون الرمايـه
ضابط معه ضباط جيشن مغاوير=تطبيق ميدانـي ورسـم وقرايـه
تخطيط مع تنسيق مع حسن تدبير=تكتيك شامل في هجوم وحمايـه
بأول وتال الليل والفجر وعصيـر=تطبيق فعلي ليـن خـط النهايـه
لجل الوطن نقطع بعيد المشاويـر=ونقطع جذور الزيغ وأهل الوشايه
الله يديم الدين والأمـن والخيـر=ويدحر طواغيت الدجل والفرايـه
ويعز حكـام السيـوف البواتيـر=حكـام شـرع الله دليلـن وآيـه
عسى العذر يدمح زلل كل تقصير=يأهل الوفى وأهل الشيم والدرايـه

ديوان جميل ويحتوي على درر ثمينه

صح لسانك اخوي منصور الجلعود

والله يعطيك العافية على هذا الإبداع

لك شكري وتقديري