ديوان الشاعر مساعد مزعل العنزي

وفقك الله

اضرب تهاتيه الخلا وترك الناس
من عدل المايل يجيب المصيبه

تغنيك عن جلسة عديمين الاحساس
اهل العقول الناقصه والغريبه

الناس فيها اشكال والوان وجناس
وكلا تميز مشيته. من صحيبه

الجسم يستر عيبته زين للاباس
وعيب العقل هرج اللسان يحكي به

ونعوذ بالرحمن من كل خناس
وبليس يحضر مير مايندريبه

وسواسه طشت متن فوقها راس
ومصايبه تقفى المصيبه غليبه

وعيني على برقا حبس كل الانفاس
من صافي مزونه تحدر شعيبه

اسرج له الخوه مع الصبح عساس
ومن عفت من جنس البشر وش نبيبه

وماعاد اجلمل صرت بالحيل حساس
عمري دفعته بالمجامل ضريبه

مساعد المزعل العنزي

عن جلسة الانذال يابدر سجيت
في صحصحا من زيلة الناس خالي

يابدر ماشافة عيوني ولا اوحيت
غير الهبايب صفقها بالجيالي

كني ملكة الكون كله وخليت
حلقه صغيره للعقول الهبالي

اللي على الغرات مثل الدنانيت
نيشانها جنب القريب الموالي

لبسة هرجتهم كفنها وصليت
ودفنتها بقبرا طويل هيالي

وانا كريم بحشمتي يوم صديت
والحر ماله بالهلامه مجالي

واشفق على رجالا لهم بالكرم صيت
شرواك يالزبني كريم السبالي

والا ترى الانذال في كف عفريت
يمشي بها الشيطان في كل حالي

ومليت صحبة ناقل الهرج مليت
لو كان في قلبي عزيزاوغالي

ياماوياما يابدر كم عديت
من هرجة لها جواب وسوالي

اخشى الخطا مني ولو كان مخطيت
واخاف لكسر قلب غافل وسالي

الشاعر مساعدالمزعل العنزي

الله وكبر على شوق سطا فيني
متملكا هاجس والناس سلمها

ماهو بكيفي على كيفه يمشيني
للمزنه اللي جمال الغيم عتمها

احس ناره تلظي في شراييني
ومن حره شوقه ضلوع الصدر حطمها

قمت اتذكر بعدها صفحة اسنيني
يوم ارسم احلام عمري واتحلمها

وحان المفارق وحلمي وينه ويني
دار الفلك لين قزمني وقزمها

وياالله بلطفك وعفوك رافع ايديني
تلطف بروحي من ذنوبي وترحمها

انت اللذي تعلم اللي بينك وبيني
لو ماتكلم خفايا النفس تعلمها

يامالك الملك عطني لين ترضيني
جزايل المد تغني يوم تقسمها

نطلبك يارازق البكم المسكيني
ونفوسنا عن سوال الخلق نحشمها

مساعد مزعل العنزي

انته سمعت بيوت مجنون القصيد اللي كتب
‏يكتب على متن الهواء والحبر من غيم السحاب
‏
‏وزع نجوم الكون فوق حروفها فن وعتب
‏ وفتح لنور الشمس باب وللقمر عشرين باب
‏
‏حنا عرب واليا كتبنا الشعر من فن العرب
‏وانا هواجيسي دعتني حسب مضمون الخطاب
‏
‏على المحيط الهندي اللي نصف شاطيهم طرب
‏جتني بيوت الشعر فوق الموج من تحت الضباب
‏
‏لو ان داع الشوق للمربى على نفسي غلب
‏والحب سيد والسيادة مالها عد وحساب
‏
‏اخيل براق المزون اللي تزاحم وانسكب
‏ماكنه. الا فوق دار الجود خيل ثم صاب
‏
و‏المر مر الذنب. لامنك. فعلته وانحسب
‏وكررت ذنبك كنك. اللي. ماعلى ذنبك عقاب
‏
‏
‏الشاعرمساعدمزعل العنزي
‏

الله من قلبا سرت فيه الاوهام
‏ودارت عليه من الدواير دواير
‏
‏يخرج عن الواقع ويسرح* ورا العام
‏وانا على شكواه لطب حاير
‏
‏من كان له سلطه على بيض الايام
‏بيض * لياليها* على* كف* طاير
‏
‏واشهد شهادة حق ماني بظلام
‏ولاني من اللي يفعلون الكباير
‏
‏ان العمر فرصة لتحقيق الاحلام
‏وان طاعتك لرب ماهي خساير
‏
‏وان الخساره عند عاصي ونمام
‏وقتال* بالافراح* وجه* البشاير
‏
‏وصى النبي في طاعة الله بالاسلام
‏وصفحتك تقراء يوم تبلى السراير
‏
‏عمرك رقم محسوب من بين الارقام
‏واللي كتب ربك على الخلق صاير
‏
‏لو الانامل متعرف مسك الاقلام
‏كان الجهل في سطوة العلم غاير
‏مساعدمزعل العنزي