واتعطر بريحان وردك وفلَّك

.

متواضعه لقلوبكم الطاهره
علها تنال استحسانكم

.

( واتعطر بريحان وردك وفلَّك )

* *
* * * * *

لا يا عمر يا بوي إخوانك اصغار=داري عليهُم لُمُّهُم تحت ظِلّك
جوّد عليهم كالمظله من الأمطار =يا جعلهم يتنعموا في مَطلَّك
برعم زهرهم منبته طيب الأثمار=خلَّك معاهم لو حصل ما حَصَلَّك
واحفظ وصاتي لك ومهما الزمن جار=وافدي سعادتهم ولو فيك كلَّك
لا تزعل اُمَّك واشهد انك وَلَد بار=مَبسَم ثَناياها ويـا بوي عَلَّك
تكسب رضاها وان دعَتلك بالأضفار=والناس تحفظ منزلك أوتِجِلَّك
لو هَدَّت الدنيا عليك من الأقدار =وتكالبت شَدّاتـها أو تِغِلَّك
وَجِّه على صوب الولي النَّافع الظّار=وادعيه يالله الفَرَج هو يدِلَّك
والزم حدود الله في سرّ واجهار =صوم وصلاة ولا تعدى مَحَلَّك
واحذَر وصاتي لك على حُرمة الجار=إيّـاك ثُمّ ايّـاك شَيٍ يذلَّك
جَنّب عن دروب الرَدى ما بها اعذار=واحذَر مقالة قيل قَلّي وقلَّك
لا تكثر من الهرج وتكون ثرثار =والصاحب الي ما تمله يملَّك
هندس كلامك مسطره وخط بيكار=ما تسمع من الناس شَيٍ يعِلَّك
بعض الرَّفق يا بوي تجلبلك العار=لا غبت عنهم تايقظْبون شَلَّك
منهم قليل الدين بايق وغدار =ومنهم عديم الـمنفعه لو يِخِلَّك
ومنهم عديم الساس بالعون سمسار=تفداه بعيونك وهو يستغلَّك
بالوجه تلقاه مبتسم بالقفى نار=لا جاته الفرصه بدينه يشلَّك
واخر كلامي دامك الله بهالدار =واتعطر بريحان وردك وفلَّك

* * * *
ناجي الصقار

.