ديوان الشاعر مساعد مزعل العنزي

ظهورا مايشرفني غيابا في جبر خاطر
ولا لي من ورا خطوه تقدمني وتتعبني
على سيما السحاب اللي على متن السما الماطر
حسبت الغيث في كمه ولادري كم يحسبني
هجوس الشوق في جو الخيال وغيمه القاطر
وانا شمت لبقاياها شموخ العز يندبني
على جو الظلام ونورها يشموها العاطر
بهاها من حلاها في جدار الود يكتبني
على العقد الجميل اللي تباها بجيدها ساطر
وانا في نظرة العاشق خيال الشوق يجذبني
مساعدالمزعل

لا سلام ولا كلام ولا اعتبار ولا تحيه
كيف لاوالوضع في تال الزمن ماهو بعادي

لاتدور فزعتك من عند مفقود الحميه
والحميه ماتجي في راس فاقد للمبادي

المزون اللي تشوف ابروقها والشمس حيه
والبسيطه من رعدها لابسه ثوب الحدادي

لو عقول الغدر ماهي من خساستها بريه
يضلمون ويقتلون وينكرونه بالروادي

دايره بين الخلايق ظاهره ماهي خفيه
منتصف فيهاالبياض ومنتصف فيها السوادي

ركعتين المستخيره بالطهر ماهي حريه
بين الموضوع مايحتاج شك ولا اجتهادي

ماافرقت من بين ذاك ولا افرقت من بين ذيه
كلهابالجرم واحد بالمطاول والعنادي

اقدح ازنودك ترا زند السطر مافيه زيه
لاتنادي بالمقابر وانت ما حولك منادي

البحر كان اعتذر للسفن يشكي قل ميه
شوف عينك مايغرك وانت تحكم بالمرادي

ومن حفظ نهج النبي ماضاع عن سنة نبيه
من درسها بالعدادي حافظا نص العدادي

والخلايق بالنوايا تفترق ماهي سويه
والله اللي فوق خلقه عالما سر العبادي
(مساعد بن مزعل)

الله لا يقطع البترول ياسارا
واليانقطع تنقطع كل العلاقاتي

لاطار خلك ولايمك بعد سارا
والبرج ماجاب لك نص الرسىالاتي

والطير من كثر هم الوقت ماطارا
والحزن يرسم على وجهه علاماتي

يامكثر اللي بوقت اليوم محتارا
متحير الفكر في كل المجالاتي

والوضع مشغل اكبار الناس وصغارا
وبعدك شغلني وطرف العين ماباتي

هواجسي مقتفيها برق و عصارا
وفي ربع ساعت زمن سجل عباراتي

يوم السفينه جرت من دون بحارا
بشراعها ساقها صلف الهواء العاتي

والشمس ودع شفقها والزمن دارا
يبقى عزاها على نور المجراتي

شربت كأس المحبه سر واجهارا
ولو كان كنيت بعض الود بسكاتي

من شمعة الكون تعطي شمعة الدارا
زين المفاتن على طيب الحكاياتي

وخذت من صفوت الايام تذكارا
وسجلتها ايام حلوه ضمن مافاتي

(مساعد بن مزعل)

طب البحر من شأن لولو ودره
تجني ارباحك من ورا قيمة الدر

والكحل بعيون العمى لاتذره
ماطابت عيونه ولا فادها الذر

ولتخاوي اللي تعرف الناس سره
مايحفظ الخوه ولايكتم السر

كلمه بسيطه من عدوه تجره
ديس المنيحه كل ماينمسح در

تستامن العدوان كره وفره
ولاتأمن اقرابه من الكر والفر

والحنظله لوهي على النيل مره
النيل ماغير طعمها عن المر

قطب الشمالي غير نجم المجره
علامة الساري عن الدرب ماغر

وترى الرجل له نظرتن ماتغره
يعرف طريق الخير من سكة الشر

ومن يعمل المعروف مثقال ذره
لجل الولي ماهو من المال مغتر

عند الولي يلقى بها مايسره
يوم الهوايل يضحك الوجه مستر

مساعدبن مزعل اليمني

اللي يفرق بين الاقراب وش جاب
غير التباغض والحسد والنميمه

عمر القرايب منقفل بينهم باب
من يقفله يااهل العقول الحكيمه

لاصار وصى الدين في وصل الاقراب
وقطع القرايب عند ربي جريمه

تسامحو من قبل لايقفل الباب
عيش التسامح والنوايا السليمه

الصبر طيب عند زلات الاحباب
تاجا على روس الرجال الكريمه

من خلقة الدنيا بها العيش ماطاب
هذي طبايعها ماهي مستقيمه

دمع الشقاوي بان من بين الاهداب
سود الليالي فيه ماهي حليمه

قدام فكره بركت كل الاسباب
وقفى السحاب اللي سرابه نسيمه

الشمس غابت والقمر بعدها غاب
واللي بقى له برق في متن غيمه

تسابق الايام والقلب مرتاب
يعد ها با لر ا حله والمقيمه

لاصار الاصل اتراب ونعود لتراب
مال البشر من دون الاسلام قيمه

(الشاعر/مساعدبن مزعل اليمني)

ماعاد باقي بالزمن غير ذكراك
اعيدها مره .. ومره ومره

وانا محال ادله مع الوقت ونساك
وقلبي عليك ادنات ذكرى تجره

اللي يجيبك يوم في يوم وداك
مادام شي(ن) ثابت(ن)في مقره

وعسى القصايديابيض الوجه تفداك
من هاجسا بيح خفاه او تشره

خواطري من بحر حبك لميناك
ما يختلف ... مبداه ... لله ... دره

مراكب الاشواق تسبح على ماك
ومن فوقها تلمع نجوم المجره

تلبس على بعدك حدادك وتنعاك
ماكسرت من شان فرقاك جره

مساعد مزعل العنزي

مع غروب الشمس والشاطي حزين
لين حزنه باح به ضو القمر

يذكر الماضي على شوق وحنين
ويكتب احساسه على ثملة خمر

يطلق الآهات في وجه السنين
كنها في خافقه جمرة سمر

نظرة(ن) في عين ماتت وسط عين
وفرصة(ن) بالعمر مرة بالعمر

والعمر كله رهينت دمعتين
مامضى لك فات لايمكن يمر
مساعد المزعل

هدية للشعب السعودي والشعب الخليجي عامه

ماحلا الشعب السعودي وطيبت نيته
شعب في خيره مناره وللمله دعاه

حب فعل الخير للمسلمين وبيته
فعلهم بالخير واضح يشد الانتباه

شعب يفعل حسنته قبل يفعل سيته
الله اكبر ياحلا الشعب عندي ياحلاه

من وفاهم حركوا بالقلوب الميته
لين صار الملحدين الطغاه اكبر هداه

ماقصر خيره ولو تقصر امكانيته
حسب مايملك تمده يدينه في عطاه

الشهاده حق والشخص في حريته
وانا شفت الخير بالفعل في كل اتجاه

بالنوازل يثبت الشعب مصداقيته
والجزيره كلها للعرب طوق النجاه

والخليج اخوان والاخو من ماريته
صادق الوجدان والبعد مايخلف غلاه

من يجيهم ماشكا قل في مديته
موج بحرا بالعطاء ماشكا من قل ماه
مساعد مزعل العنزي

دار الزمن ياحمود والوقت ياحمود
اخلف هقاوي مبعدين الهقاوي

قصر يدين اهل الوفاء منبع الجود
روس النشاما حاسمين الدعاوي

ياحمود مايبقى مع الوقت محمود
الا جزيل المد صادق صلاوي

وكانك على الطرقه مع الوقت محدود
الحل عندي كان يااحمود ناوي

ابشر بعزا شامخا كنه الطود
اثبت لها ياحمود ماني مراوي

اليا حسمت امرك ترا الحل ماجود
انا اتصرف وانت خلك مخاوي
مساعد مزعل

هلا بالجمال اللي يعانق جمال الروح
وهلا بالخيال اللي بشوفه مسليني

هلا بطرفه الناعس على صوته المبحوح
هلا بالدلال اللي تمرد على عيني

وهمسه بصوته حرك بقلبي المجروح
ولو غاب عن عيني خياله يحاكيني

تقرب وله ليا حضني قبل لا روح
تنثر شعرها فوق خصره على ايديني

قبل لايبوح اب داخله من قبل لابوح
لغه للمشاعر بالجسد بينه وبيني

وخلقه من الله هو كذا شيق ومملوح
مفاتن بهاها بالحلا وين ترميني

على هيبة الطوفان تركب سفينة نوح
وعلى هيبته تجري وتثبت موازيني

ولا ادري كذا مسموح والا ماني مسموح
وموجه يقربني وموجه يوديني

هبوبي شماليه تهيض حمام الدوح
تغني من الماضي عبارات بسنيني

لو الارض من كثر الهوا صدرها مشروح
وانا فوق سطح الارض ضاعت عناويني

ولو كان مالي من ورا بوحها مصلوح
ابا امسك رسنها مير ماعاد يمديني

لساني لهج عن خافقي نص فوق اللوح
وانا اسمي تحتها منكتب بين قوسيني

مساعدمزعل العنزي