عيال وايل

السلام عليكم ورحمة الله وبركاته
أخواني الكرام أتشرف بوجودي بينكم في هذا الصرح الشامخ
ويسعدني ان تكون اول مشاركه لي معكم هذي القصيده بــ عيال وايل
وأن شاء الله ترقى لذائقتكم

فيديو الألقاء بصوتي

البال روق والشعر موعده حان=وكتبت شعر موجهاً للأصايل
فيهم يزين الشعر في كل الأوزان=وفي ذكرهم تزين بيض السجايل
مرصعه بحروف لولو ومرجان= تزهى لوصف مهونين الثقايل
أفخر بهم من دون شكٍ ونقصان=ويشوش راسي شامخاً للطوايل
ربعي بني وايل عريبين الأيمان=أهل الفعول الطيبه والجمايل
أوصافهم طيب المعاشر والأحسان=وطناخةٍ بالراس وعقال مايل
رفيقهم محفوظ في وسط الأعيان=مايشتكي في يوم والهم زايل
عيال وايل عز من كان خسران =هم فزعة المضيوم لاعال عايل
ربعي بني وايل زلال وبركان=وأليا زعلو أتثور فعل وهوايل
يوم انها بسيوف وخيول وعنان= حازو على تاج الفخر بالفعايل
ربعي بني وايل ليا ثار دخان=قامو على ظهور الخيول الأصايل
كم راس شيخٍ طار بيدين شجعان= واللي سلم صارت جروحه علايل
يمسي عليه الليل مانام سهران=ولا غط في نومه تجيه المخايل
من خلقة الدنيا هل المجد ويلان= قومٍ رقو للمجد والمجد طايل
عندي على قولي دلايل وبرهان=وأنشد وتلقى العلم مع كل قايل
وأبترك الماضي على وقتنا الآن=ونشوف مجدٍ حاضراً بالدلايل
المملكه حكامها بكل ميدان= نسل الأمام الوايلي بالنسايل
وحنا رجالاً للوطن وقت الأكوان=حق الوطن ماله علينا بدايل
وحنا لأبو متعب دروعٍ وفرسان=بأسم الوطن وألا على الجد وايل
واخوان مريم حاكمينٍ لدسمان=آل الصباح مهونين الثقايل
وآل الخليفه فعلهم عالي الشان=في دولة البحرين قول وفعايل
حتى معمر للملأ أعلن أعلان= انه لوايل ينتسب للحمايل
صحيح يشطح بالحكي بعض الأحيان=لكن وهو شطحه حكم له سلايل
وختامها بقول والقول ميزان=وكل على قوله يسوق المثايل
من ضاق وقته والفرح داخله شان=مني نصيحه يزبن عيال وايل
عيال وايل عز في كل الأوطان=حازو على تاج الكرم والجمايل
وأكبر فخر للأرض في كل الأزمان=ولاهو قصور في جميع القبايل
هذا شعورٍ شايش براسي عليان=شاعر رويلي وصفّه بالجزايل

وسلامتكم