صدق المشاعر ( للحاضر الغايب تركي عبدالله العنزي )

كل عام وأنت بخير يامنبع الخير = عسى الفرح يزهى حياتك لياليه
حييت (ياتركي) زبون المناعير = يالوافي اللي شامخاتٍ مباديه
منك التهاني مثل مزن التباشير = صافحتها بالشوق وأسمى معانيه
دام الغلا بوجيه الاصحاب تصوير = بانت على وجه العطيفي مواريه
شاعر غيابه غير وأطلالته غير = في مضيف الويلان يسعد محبّيه
(تركي) زبون الكايدات المعاسير = عزالله أنه يرفع الراس طاريه
أهديته حروفي بجزل التعابير = ومكانته وسط الخفوق ومحانيه
بنات فكري .. مقفيات ومصادير = أسرج لها خيل القصيد وقوافيه
لي هاجسٍ يقطع بعيد المشاوير = برق الشمال وغر الامزان يدعيه
أكتب له المعنى محبه وتقدير = وأصوّر الهقوه برجوى مساعيه
ياصاحبي حطمت كل المحاذير = كسرت غايات الحسود وامانيه
التجربه في حزة الضيق تفسير = والرُجل يفخر في مواقف أبناخيه
يفدونك الواشين مع نافخ الكير = اللي أفعوله ماتشرّف عوانيه
لجل الوفا يفوح مسك ونواوير = صدق المشاعر بين غالي وغاليه
أنا القصيد اللي يهز الجماهير = وأنت الشموخ اللي عريبه مجانيه
بين الحقيقه وأختلاف التفاسير = كلن على ساسه يشيّد مبانيه
ماجيت أدورّ بالقصايد دنانير = ولاجيت أعاني طعنة الغي والتيه
جيت أستفز الحرف معنى وتعبير = حرفٍ ينومس كاتبه قبل قاريه
ماكل فارس بالمواقف كما الزير = ولاكل رُجلن يستحق المشاريه
راع الردى طبعه يسوق المعاذير = وراع الوفا ماخابت ظنون ناصيه
لا هان راسٍ مايهاب المخاسير = ولا عاش راسٍ قاصراتٍ هقاويه

.
.
.
.