سندسيات ...

عدنا ...

بعد ماتغدينا .. ضبوا الاولاد كل شي الله يرضى عليهم ..
انا رجعت لغرفتي تمددت بسريري .. حاسه كل قطعه من جسمي
عم توجعني .. ومالي حيل اعمل اي شي ..
طل ابني علي .. ماما بدك شي .. انا واخي بدنا نذاكر .. نادي علينا
اذا احتجتي شي ...
لا ماما الله يرضى عليكم .. انا حنام .. سكر علي الباب ..
سكر الباب وراح .. وانا متمددة على ظهرى عم بحلق بالسقف ..
بعدها قلبت على اليمين .. وشوي على الشمال .. اغمض عيوني
لعل وعسى نام شوي .. ماقدرت ..
تجلست وقعدت ماني عارفه شو اعمل .. وكل هالوقت مخي ماوقف
تفكير .. ولاراحت من بالي بنت عمي ليش تعمل فيني هيك ..
ومن تعب التفكير باين نمت .. لاني صحيت على صوت ابني ..
ماما اصحي خاله ام اصطيف اجت وقاعده بالحديقه ...
انتفضت من فراشي لدرجة حسيت بدوخه لما وقفت .. سندني ابني
ورجع قعدني على حافة السرير .. ماما اهدي ارتاحي شوي ..
بيعرفوني بدوخ اذا قمت بسرعه ..
هديت ودخلت الحمام غسلت وجعي لصحصح ...
وقلت ادخل اعمل قهوة واطلع ..
ماما انا بعمل القهوة .. واحلى قهوة لست الحبايب ..
طلعت للحديقه .. كانت ام صطيف قاعده وبايدها شويه ياسمين
عم تشمهم وتصلي على النبي ..
الله يسعدلي هالمسا حبيبتي .. لاتآخذيني راحت علي نومه
ضحكت مساكي اسعد عمري .. منيح يلي نمتي بترتاحي شوي ..
اي والله ياام صطيف نمت نومة منيحة ..
وصرنا نحكي بكل شي الا قصه زوجي ..
واجى ابني جيب القهوة .. وحاطط كاسه مي وصحن فيه بيتفور ..
الله يرضى عليه مرتب هالولد ..
اسم الله حولك ياعين خالتك ... ضحك وحط الصينيه ودخل البيت
وقبل مايدخل قالي .. اذا بدك شي ماما ناديلي ..
ولاتشيلي هم شي ..ودخل ..
للحظه صفنت بكلمته الاخيره .. بس ماركزت عليها كتير ..
شربت رشفه من فنجاني ... الله .. وتمخمخت فيها ...
كان الوقت قريب من المغرب .. قمت شغلت النور ..
والمي بالشلال .. كانت هالقعده حلم من احلامي ..
نسيت اوصفلكم المكان ...
قدام الباب زارعين ياسمينه ... وعاملين شلال صغير ..
وحاطه طاوله وكراسي .. بتغطينا الياسمينا ...
وبالشتا في مظله كبيره كنا نقعد تحتها ونراقب المطر ..
كنت سرحانه وانا عم اشرب القهوة ... وانتبهت ام صطيف
عم تنادي علي وتضحك ... يييه شو وين رحتي الي ساعه
عم ناديلك ..
ابتسمت .. مابعرف باين سرحت ..
اسمعيني حبيبتي .. بعرف هالامر صعب كتير عليكي ..
وصراحه زوجك باعتني .. بدو يقعد معك تتفاهموا ..
الرجال حس بغلطوا .. وشاريكي ..
ومابعرف شو صابني .. اجتني نوبه ضحك غريبه ..
المره اجتها الصدمه .. سكتت وعم تبحلق فيني ..
وبعد الضحك انقلب لبكا .. كاني عم فضي هالشحنات
يلي جواتي ..
تركتني حتى هديت .. وقالتلي شو قلتي ..
اسمعي ام صطيف ...


وللحديث بقية