أنا معزي صفوة أولاد وايل

قصيدة الملك عبدالعزيز آل سعود رحمه الله ..




انا معزي صفوة اولاد وايل
نسل الرجال اللي كثيف فخرها

كيف الرياض امست قبور ونثايل
وعلوم من راحت وراحو بثرها

ان قاله الله يعتدل كل مايل
وبد الليالي السود يظهر قمرها






قصيدة الأمير بدر بن عبدالمحسن آل سعود..






‏

شمس بدت صفرا عليها سمايل= عجٍ .. تهز الريح ذابل سفرها
تعثرت باطناب سود الذوايل= وتسللت والحزن لاقصى حجرها
وتبينت بين الجذوع النحايل= ويم البيوت الشهب مدت نظرها
كانوا توالي الليل شدوا الرحايل= وشافت هل التوحيد تلوي غترها
تلطموا عن عجها والقوايل= والا عن هموم السنين وقهرها
ركبوا وعاجوا ارقاب حيل اصايل= للشرق .. وكل اوطانهم في ظهرها
يوم التفت والقلب ف الدمع سايل = وأسوارها طين يعاتب حجرها
ومن الثرى لامسه الخف قايل = بالله هل الهجن ريضوا بسفرها
شد الرسن واستلحق الحمل شايل = ومش الحزن ودموع عينه زجرها
انا معزي صفوة اولاد وايل = نسل الرجال اللي كثيف فخرها
كيف الرياض امست قبور ونثايل = وعلوم من راحت وراحو بثرها
ان قاله الله يعتدل كل مايل = وبد الليالي السود يظهر قمرها
تغربوا ف امواج بيد وقابيل = سفينة ضاعت بلجة بحرها
شربوا هماج الما وشربوا الثمايل= وشافوا جفا الايام وذاقوا كدرها
تصبر المجروح والجرح صايل = وزرع الاماني قام ييبس خضرها
لاهوب لا داله ولا هوب طايل= قوم رحل عنها وقوم نحرها
يا دار مامنك علوم ورسايل = من ينطح الركبان وياخذ خبرها
يا دار طول الصبر به حصايل = ومن يعشق العليا يوالف وعرها
ياهيه قم شب العتم بالفتايل= والصبح خله من ليالي سهرها
وخل الفشق زاد لغزو فلايل = والما الي وردوا موارد خطرها
فوق اربعين ومالهم من مثايل = كود الكواكب او غوالي دررها
وحول اربعين وما حسبنا الصمايل = والقوم يحسب كثرها من ظفرها
تحزموا بالله على كل عايل = ركبوا وحطوا سهيل بيسر ظهرها
وشقوا الريادي والليالي حبايل = للموت والعدوان زايد حذرها
كريم يابرق السيوف الصقايل = في العارض غيومك تحدر مطرها
غطى على المصمك عجاج المخايل = من قبل ماترمي الصواعق شررها
هذا ربيع يودع الهم زايل = انهل وبله في الرياض وغمرها
مرقاب اخو نوره عطيب الفعايل = الصيرمي عقبان نجد صقرها
لامن شهر يصبح هداده هوايل = ولا من عفا داوا العظام وجبرها
يوم ارتوت بالطل شقر الجدايل = واصابع للغرس تمشط شعرها
تنفست ريح الزهر في الخمايل = وفكت ازارير الدجى عن نحرها
وتبينت شمس السنين الاوايل = على العروس اللي عزيز خفرها
من غير ابو تركي كريم الخصايل = يملى محانيها ويدفع مهرها
هذي الرياض اللي بروس الطوايل = تركز بيارقها ويضحك ثغرها