تعبنا من ملاعبة الهبوب اللي تهد الحيل

تصفق كل ما نكرب حبال الصبر تشلعها


ونرجع نبني الآمال ونضوي وسطها قنديل
وش نسوي ولو ما تنبلع لا بد نبلعها


عليك الله يا وقتً جبرت الصامد الحلحيل
على ونه مخفيها ما يبغى الناس تسمعها


ولو عطاش الثرى للدمعه اللي ديمت منديل
تساوي من قوي السيل نازلها وطالعها


ولو الصدر الشمالي كان يحسب بالمسافه ميل
غدى اقصر من كفوف الردي والبخل قاطعها


ولو كوبً من اكوابً شربها انتثر بالنيل
ملا ضفافه مرار الكوب ويبست به مزارعها


مضى له عمر وارحاله تقلب بين حط وشيل
ثلاثين العمر راحت ويالله زين اربعها


طلبنا اللي حفظ مكه من هجوم ابرهه والفيل
وارسل طير بحجاره وعلى الخذلان رجعها


وطلبنا اللي عصم يوسف رغم ماجاه من تنكيل
وقميصً رد شوف ابوه وقميصً السوه اطلعها


يهون كل ماياتي ويصرف عن سمانا الليل
وتصير ادروبنا خضرا ونهنا في مرابعها









ل شاعرها