روح في سطر

نفخت في سطرن توفى له ايام
همست باسمك فيه وعادت له الروح

طايح وسمع الصوت من طيحته قام
وجدد صباه اسمك وعاود لي البوح

هو عارف انه للحن حلو الانغام
كم قلّده طيرن على شامخ الدوح

ياللي مسكت بشجو الالحان الازمام
السمع لك بابه من العام مفتوح

هويت انا بيتن له الطير رنَّام
يجي معه قلبي من السحر وايروح

ما اوحيت بك عاذل ولا لوم لوَّام
لو انت تخطي دايما الدوم مسموح

اربط بفكري بك من الرمش سلهام
عينن لها سر(ن) بالانعاس مفضوح

عينن كما بحرن به الموت عوّام
وحلو الثنايا بالثَّغَر جا لها ضوح

وخده كما وردن تفتَّق م الاكمام
والخد كنه با طيب الطيب ممسوح

الوجه صبح وقرنها ليل الاظلام
جامع ضديدينن وبالحيل مملوح

احفيت من شانه مع اوصافه اقلام
ودواة حبرن صابها منه شاحوح

من شوقها تشفق على لمسها انسام
وجديل ليلن تعشقه كل لافوح

تغطرف جدايلها كما الطير لا حام
جِنون شعر(ن)والهواء فيه مشفوح

كاس الحلى منها من الملح جمَّام
وجا للحلى منها على الكاس سافوح

ملك الكلمات
محمد الحربي