رثاء ولله البقاء

بسم الله الرحمن الرحيم

يقول تعالي في كتابه العزيز ((انك ميت وانهم ميتون))

ويقول تعالى((كل نفس ذائقة الموت))

ببالغ الحزن والاسى تلقيت خبر وفاة جدّي رحمه الله صباح يوم الاربعاء 12/11/1431 هــ

ذلك الجد الذي تعلمت منه الجِد ذلك الهرم الذي تعلمت منه الكرم

الصائم الساجد الابي الماجد البار بوالدته الرحيم بلحمته

ادركت شبّته التي بعد العصر للاقراب وللاجناب ودون حصر

ادركته للاموال مزكيا وللانعام مذكيا

بالضيوف مهليا وللضيوف مسليا

لبيب عجيب لجرحه طبيب

فهيم حكيم لجاره حليم

اعيش بظل سمعته واسير بنور شمعته

ذاك كان جدّي هو (لافي اللميع) ومن يعيب ردّي فليسئل الجميع

الله يعين اللي بصبحه تلقّى
........................ خبر وفاة الرمز بالفهم والطيب

اللي عن علوم الصخى ماتتقّى
........................ مواقفه مشهوده ومابها ريب

مرحوم ياللي دوم قلبه يرقّا
........................ اليا سمع صوت المؤذن له يجيب

مرحوم ياللي ماذكر يوم عقّا
........................ بالوالده ولاقطع بالاقاريب

مرحوم ياللي لاعزم ماتنقّا
........................ في مجلس تلقا الربع والاجانيب

راعي فناجيل(ن) بدله تطقّا
........................ وراعي صحون(ن) يتعبنّ المعازيب

يومه رحل من عقبها ماتبقّى
........................ غير الدموع السايلات اللواهيب

لاشك مانجزع وهالموت حقّا
........................ طريق ماشينه ولاعنه تجنيب

يارب عن لاهب جهنم يوقّا
........................ ابرحمتك ياعالم الجهر والغيب

عساه للفردوس جدي يرقّا
........................ والله كريم(ن) يسمع العبد ويجيب