العرب دايم على موّال ليلي لالي !!

للتواصل .. ونعدكم بالجديد

العرب دايم على موّال ليلي لالي=والعجم ماعندهم الا اتخاذ القوّه
والسياسه مالها فيني نبض ياالغالي=لكن العلم الموكّد مايصير مشوّه
علّموا راع القليب اللي رقد .. باالتالي=(لايأمّن جاره اللي طامعٍ في جوّه)
الشجاعه في زمنّا خانت الابطالي=والخيانه في زمنّا ابتلانا سُوّه
صار كلّن موجة الماء تصفقه باالجالي=ولايحرّك من غثاها لو بحجم البوّه
إدمعت عيني على بنتٍ صلاه الصالي=تنتخي وين اللي عن عرضه تجيه مْروّه
أهْلها والشاهد الله مابهم رجّالي=ساكتين وبالعين الذلّ ماهو توّه
فرّقتهم زينة الدنيا وكثر المالي=وأبعدتهم عن حميّاهم خلاف الخوّه
ياكثر من وسط قلبه ماتت الآمالي=وياكثر من وسط داره ضايعٍ ومتوّه
امنياتي وكل شخصٍ بالعرب يبرالي=بأمنياته يوم يرسمها (أمل) بهْدوّه
مجمل الواقع أليمٍ والحدث طوّالي=مستمر مثل المزون اليا تهاطل نوّه
المئاسي دوم حِلٍّ والفرح ترحالي=والفعل من يمنّا يبطي تجيه جروّه
منهم اللي في جساره تشرب الفنجالي=ومنهم اللي في سطاره تستعيد القوّه
فيه فرقٍ بين تحديث العقل والخالي=وفيه فرقٍ بين سفليّ الجبل وعلوّه
ماعلي من كثرة القيل وخطاة القالي=لاقعد يكتب وينقد ماقرى وينوّه
ذي طريقة طرحي الشعري وذا موّالي=وذي نتايج شعري اللي مشتعل في ضوّه
يعْرفه من يعرف الوضع الحزين الحالي=ويعْرفه من كان أيضاً بالقصيد مفوّه
قلت مافي خاطري صوب الألم ياخالي=والبجيدي صعب ينساها وهي في جوّه

بندر البجيدي