مثل حال الطيـر خفـاق الجناحـي ..//.. لا كفخ تسمع لجنحانه لفيحي

ليش اراجي حاسدي يطلق سراحـي

وتحتي اللـي واردٍ عنـد الجميحـي

لاسمعت الجمس تحت الضغط صاحي

يشلعن عن جيرة الوجـه الكليحـي

والهروج العـوج ماتجحـد كفاحـي

وبالنهايه ما يصـح الا الصحيحـي

لو يدوج الكذب في كـل الضواحـي

قصر راع الكـذب ملـزومٍ يطيحـي

ولاجل غسل ذنوبنا جبنا الاضاحـي

وارتضينا الذبح بخيـار السريحـي

وعن رماح القوم ماتقصر رماحـي

لو هقيت العنـز تمـدح بالنطيحـي

بس اخبر الصبـح للتايـه رباحـي

واخبث الديبان تسمع لـه فحيحـي

وان سمعت اللي يهـدد باجتياحـي

قلت لـه هـداج ماهـاب النزيحـي

دام ثوب الصدق والعـزه وشاحـي

وفي تواريخ العرب هرجي صريحـي

وان سريت اسري مع الدرب البياحي

ولي لسانٍ لاحكـى جـزلٍ فصيحـي

صاغ لامجاد العرب رفـعٍ مساحـي

مثل وصف الريم باشعار الوضيحـي

وافرق المصدار ووقـوت الرواحـي

واغلي اهل الطيب والوجه الفليحـي

وماخلطت الصدق بهروج المزاحـي

وان جفى طبع العرب طبعي سميحي

عايشٍ وسط العرب كنـي سياحـي

ولا وطيت الظلم لو خصمي مسيحي

مثل حال الطيـر خفـاق الجناحـي

لا كفـخ تسمـع لجنحانـه لفيحـي

والحمام اللي بنـار الغبـن ناحـي

ضاع عمره نايـحٍ قلبـه جريحـي

انظم اشعارٍ مثـل رمـي السلاحـي

وارفعه عن نقرة الهـرج القبيحـي

لون وردٍ طال في حمـر البطاحـي

جاه غيثٍ بالخـلا سيلـه يسيحـي

من مـزونٍ بارقـه بالليـل لاحـي

واختلط روض العرب ربله وشيحـي

تطرب اهل الصدق وطيور الفلاحـي

وكل رجـلٍ عاقـل قلبـه نصيحـي

وتنفع اللي بالعرب شوفه ضحاحـي

ومن يذوق رماحها يقعـد يصيحـي

سار عند الناس في كـل النواحـي

والعرب تطرب مع القـاف المليحـي

وساقني صبري على النبع القراحـي

وعقب ضيقي سرت بالدرب الفسيحي

وصانجٍ نجمٍ بوسـط الليـل طاحـي

او حسـودٍ خافقـه مايستريـحـي

شاف ليله ضاع مع شارق صباحـي

وحزت ناموسي وهو مثل الطريحـي

ومركبه ينعـاق لاهاجـت رياحـي

وان شهر سيفه وقع عندي ذبيحـي

ومن لهب جمرٍ بوسط الجوف فاحي

صار يكره واحـدٍ يطـري مديحـي

وليت من مثله يطيعـون اقتراحـي

ويتركون الظلم والكـذب الفضيحـي

مايطيب الـزرع بالقـاع الملاحـي

والفخر باللي رقد وسط الضريحـي

وطيب رجلٍ مع طريق القبر راحـي

مايفيد اللي قضى عمـره شحيحـي

والجبـال جبـال لايمكـن تزاحـي

ولا يذيـر القافلـه كثـر النبيحـي