ديوان الشاعر/ عبدالرزاق بطاح المطرفي

مبداي بسم الله في كل حال
ونعوذ من شر النفوس وخوافيها

ياهاجس الشعر حضر ماعاد فيها مجال
لياقامت الشعار تنظم قوافيها

لبيت دعوة الداعي من ربوع الشمال
بعد المسافه ياوسيع العرف نطويها

لجل شيخٍ دعانا جينا نحث الرحال
ايه شيخ قومٍ على العليا خطاويها

سلام يابن يالعواجي ياكريم السبال
شيخ قومٍ تفاخر في عزاويها

هذا محمد عريب الجد طيب فال
شيخ قومٍ أتنومس في عطاويها

مايقدر جهود الرجال الا الرجال
اللي تشرف بالصعايب نخاويها

كرمتم من يستحق ولا عليها اجدال
كرمتم شيخٍ أفعال الطيب حاويها

يستاهل التكريم شافي والفعال جبال
من روس قومٍ ماتخيب هقاويها

ايه شافي ياقلت شافي والحمول ثقال
يشيل صعبات الحمول وبلاويها

شافي ولد فاحس والفعال فعال
سيرة كرم من قديم الوقت هاويها

ربعه صقور الصيد ماتصيد الا الجزال
طحاطيح الرجال اللي ابعادن غزاويها

من صلب وايل هل الفزعه والفعال جلال
أيه عنزه هل الفزعه مزبنتٍ جلاويها

كتبت ابياتٍ وفيها الجزل منهلي
ابيات شعرٍ وصح لسان طارقها

طرقت طرقٍ أحروفه حيل جازلي
من يوم جزل القوافي بان بارقها

في ساحت الشعر والقيفان تنهلي
وشعارنا لاحضرو ترهب بيارقها

عزالله اني من هذا الوقت منعلي
والناس قفت مع الموضه زوارقها

هذا زمانٍ ياهل العرف منحلي
وياكثر ناسٍ أشوف الوقت حارقها

عطوني الراي ترى الحال من سلي
وهواجس الراس تغربي وشرقها

ابيات للمجاراه

عبدالرزاق المطرفي

يامرحبابك عد خط الصحيفه
وعداد ماذعذع هبوب الشمالي

بالوايلي راع العلوم الظريفه
من روس قومٍ يحتمون التوالي

ربعك أطلوح العز ماهم لفيفه
عدوهم يرحع من العقل خالي

وجموعهم مثل الجبال المنيفه
ولادعه عون الرفيق الموالي

وعدوهم يشرب من الغبن كيفه
وصد يقهم يشرب قراحٍ أزلالي

ولادعه يوم السنين الكليفه
ذراء الضعيف وللقريب الموالي

مدحت ربعي بالعوم الطيفه
من طيب ذاتك يابعيد المدالي

ربعي وربعك بالمواقف عنيفه
عدوهم منهم يصيبه أجفالي

أخيولهم بالارض تسمع رجيفه
وسيوفهم تلمع أحدادٍ أسلالي

فيك الكرم والطيب أفضل وضيفه
يالنادر اللي بالتواضع مثالي

صدقت ياناظم جزيلات الاشعار
تطقف زهر نوار ارضٍ أمريفه

والمدح يزهونه طويلين الاشبار
اللي يشيلون الحمول الكليفه

اللي لهم في ماقف العز تذكار
اهل الفعال الطيبه والشريفه

روس الرجالي اللي لهم بالكرم كار
اهل الصدور والواسعه والنظيفه

والحر يضرب بالمخالب لياغار
صيده سمين ولايصيد الضعيفه

أعجبني الطاروق ياواف الاشبار
وحبيت أجاريكم بنفس الوصيفه


عبدالرزاق المطرفي

لقيت بعض اعلومكم بالتعاليل
حمض الرجال ليانسوه الهلايم

سوالفً يطرب لها كل حلحيل
اعلومً لدسمين الشوارب تلايــم

اخبار واعلوم الرجال الزلازيل
أجداد ولا مسملاتً قدايــم

تذكر شواهدها عليها دواليل
شواهدً مثل النجوم النعـايم

يطرب عليها متعبين المعاميل
اللي احفظوها من ضياع العلايم

يوم الحياه اظروف صعبه وتنكيل
ارواحـهم راحت وراهــا قسايم

احيوا تراثً عقبوه المشاكيل
عساه يبقى بأوسط الكتب دايم

يالمطرفي نبغى وكاله وتوكيل
عسى على المجلس تهب النسايم

اقرا على المجلس تبارك وتنزيل
ماني عن الصولات يالقـرم صـايم

ما تنفع الشعار كـثر التهـاليل
يبن عليهم يكتمن العسايم

اللي يذلل كايد البيت تذليل
هو ليه عنها يابيض الوجه شايم

بيتً يقلل قيمه الشعر تقليل
وبيتً يحيّر يالقلوب الفهـايم

المزن رودم قبل ما يطلعله اسهيل
يبي يطم الدار وبله غشايم

يامن ينايي ترى درج يمكم سيل
ياهل البيوت مكوسرين العدايم

ابو خالد ������������

::::::::::::::::::::::::::::::

حييت يامرسل جزيل التماثيل
ياشاعرٍ في بحر الابداع عايم

ياللي اتذلل عاصي القاف تذليل
مافيك حيله ياقوي العزايم

شفت البكار النادرات المواحيل
اللي عليهن من طرفكم وسايم

ارحب يابوخال على البن والهيل
ياشوق من قرنه على المتن نايم

وان كان تنشد عن طرات التعاليل
وسوالفٍ فيها اعلوم وغنايم

راحت يابوخالد مراح الهماليل
مع الرجال الطيبين القدايم

اللي سوالفهم بعيده عن الميل
وخويهم دايم براس السنايم

وسوالفٍ فيها اشهود ودواليل
ويابعدهم عن الردى والظلايم

ولا زمنا اليوم يانافل الجيل
قامت تعلا فيه روس الهلايم

ياالله يامنزل تبارك مع الفيل
يارب عفوك من لهيب السمايم

والمعذره وان كان بالقول تقليل
ورجى السموحه يالرجال الفهايم

رد متواضع على الشاعر / مفضي علي
الطلوحي ابوخالد
عبدالرزاق المطرفي

يالمطرفي يارفيق الخير مني سلام
سلام يرقى سما من فوق نجم الجدي

وبعد التحيه وزود القدر والاحترام
كيف انت يالصاحب الغالي سمي ولدي

بشر رفيقك عن أوضاعك عساها تمام
يالوافي اللي عسى يفداك راس الردي

لو الليالي اشغلتنا عن بعض بالزحام
غصن الغلا والموده يارفيقي ندي

القدر بالصدر باقي يارفيع المقام
وحفظ الوفا بالصدور الوافيه مايغدي

وانا ترى وضعي بخير وعلى مايرام
اجاهد النفس وابذل بالحياه جهدي

أنور جالي
:::::::::::::::::::::::::::
أسناد ورد
::::::::::::
بك البقا ياوسيع العرف عال المقام
ترا الوفا والصداقه بيننا ما تغدي

انشهد انك وفي ولا يبله كلام
لك التحيات والتقدير وانت سندي

أسمك يكفي كما نورٍ يفج الظلام
ياقالو انور ابن جالي فداه الردي

ياالله عسى احوالكم يالقرم دايم تمام
ويرزقكم اللي خلق خلقه وله تسجدي

وانا تراني اعدك يابن وايل حزام
ودنياك مادامت لصدام وبنه عدي

وختامها يازميل الخير مني سلام
لك التحيات والتقدير يالاجودي

عبدالرزاق المطرفي

أنشهد انك للجزيلات عشاق
حرٍ مخاليبه أسوات الاخله

حرٍ وكفه لبرق الريش شلاق
يلحق الطاير والموقع يدله

شافي ابن فاحس على الطيب سباق
كم واحدٍ من غيهب السجن شله

وليانخيته ثم وقف على ساق
أبشر بعزك والمواقف جبله

من روس قومٍ له تواريخ وعماق
من صلب وايل كالجبال المطله

عدوهم من ضربهم طاح ونعاق
يبغى المطامع والطمع ماحصله

اجمل. تحيه للمطاليق تنساق
مع خالص التقدير يرفق سجله

عبدالرزاق المطرفي

اباغني وكتب ابيات أجدادي
كل طرقٍ لابدينا به نجيبه

والشعر مع العرب له أمتدادي
من اعصورٍ فايته كلٍ دريبه

من قبل الاسلام لين الدين سادي
والشعر معروف وبحوره عجيبه

مرحبا ياصاحبي والقاف بادي
ليابديت القاف بالحيل اعتنيبه

أشهد انك صاحبي حلو المبادي
من رجال اهل اصدورن رحيبه

من رجالٍ بالمواقيف الشدادي
مادخل في صفهم خطو الزريبه

دون حق الجار يروون الهنادي
يحتمونه بالمواقيف الصعيبه

يابوصالح هذي أفعال الجدادي
وعادت العربان ماتحب الغليبه

بعض ناسك شغلهم بس أنتقادي
نقدهم لناس وفعالٍ مريبه

بالمجالس يزعجونك بالدوادي
هرجهم مغلوط وهروجٍ معيبه

بالمجالس شفتهم شين وكادي
صارو شيوخ العرب قدرٍ وهيبه

قصدهم ياصاحبي خبث ونكادي
مصيبة بالمجتمع أكبر مصيبه

وماكسبو مع العرب غير السوادي
الردى عاداتهم ماهي غريبه

عبدالرزاق المطرفي

ياكثرهم وقت الفضاوه قريبين
تقول ذولا بالصعايب ذيابه

ولاحتجتهم في ساعةً ضرفها شين
كلٍ تخلا عنك وأقفت أركابه

راحو هلا الوقفات شيالت الدين
عن الصديق اللي زمانه سطابه

لاشاف من صكات بقعا عناوين
والهجس والهاجوس شد وسرابه

جوله على صوت النداء مستعدين
اهل الكرم والطيب واهل المهابه

الله يرحمهم معي قولو أمين
اللي لهم وقفات مع كل لابه

عبدالرزاق المطرفي

ياكاتب الشعر تكفى تضبط اطروقه
بعض البشر ياوسيع العرف نقاده

أتعب ابنظم القوافي لو غلا سوقه
ووشتر من الجزل ترى الناس نشاده

الشعر مثل الصباح انبات أشروقه
وليا نظمنا القوافي جتك منقاده

مثل السحايب ليا ناضت به أبروقه
يطرب لميع البروق وصوت رعاده

ياشاعرٍ يعجب الشعار في ذوقه
ياشاعرٍ حبكت القيفان لك عاده

فنجال كيفٍ على ابوخالد انسوقه
اللي على الطيب دايم يقدح زناده

شاعر يجيد الابداع وجزل منطوقه
يختار جزل القوافي دوم برياده

عبدالرزاق المطرفي