[.. هيّض شجوني مبدع الحرف ..والقاف=وامسيت ليلي بين حرفه .. وقافه ..]

الحقيقة الشاعر القدير والصديق العزيز أبو تركي (عرفاء قماصي) شاعر مبدع وقد نزل قصيدة في المنتدى

ومطلعها :

البارحه ليلي من خلاف لخلاف = ليل الشقاوي فاختته اللطافه
عطني قلم يرعف على الكاغد ارعاف = يامج حبره صعب ياخذ مسافه

وهي على الرابط التالي :

http://mdyf.net/vb/showthread.php?t=14334

وهذه الأبيات مجاراة لتلك القصيدة وأتمنى ان تعجبكم :

هيّض شجوني مبدع الحرف ..والقاف=وامسيت ليلي بين حرفه .. وقافه
وجبت القلم والطرس والحبر ذرّاف = على خدود الطرس سال بكثافه
زراق حبره.. من على البعد ينشاف=تقول وشم(ن) فوق خد وشفافه
وسطرت به بعض المعاني ..والاوصاف=يا كود تعجب من قراها .. وشافه
يا صاحبي.. ياشوق منبوز الارداف=الجادل اللي فوق زينه.. لطافه
بقول لك دنياك ما عندها اخلاف = مار البلا في ناسها.. والصحافه
ماحدن يراعي للمبادي.. والاعراف=كثروا بها هل الدجّل واللقافه
ناس(ن) على راع السّنع ترجف ارجاف=مدري حسد والا بعضها تخافه
يُضربّها الناجح كما ضرب .. ندّاف=بلسان فاشل دون جهد .. وكلافه
والوضع ماهو دايماً دوم .. شفاف=وضع(ن) مخادع مختلط به .. سخافه
ما ينفعه لو ينقع أوراق صفصاف=صعب(ن) شفاه من المرض .. يا حسافه
وانتا يبو تركي .. فهيم(ن).. وعرّاف=بخيص باوضاع العرب ..باحترافه
ودامك رقيت بقافكم فوق مشراف =جزل المعاني ما تخالط ..عذافه
لا تلتفت للي سكن وسط الاجراف=بين الدوابي نايم(ن) .. في لحافه

وسلامتكم ،،،،،،

أخوكم / أبوفهد

-