مقهى ليلة الحب الكبرى حيث نحتسي الأرواح طهراً ونرتشف الفرح الحضور دهراً

قال : فمان الله ودي أغادر
ولازم تناساني وقلبي بينساك
طريقنا صعبه ولا لا تكابر
وخلّك من عنادك وساعدني أنساك
قاومت ضيمي بس ماني بصابر
بُعدك ذبحني وأنت يا شين فرقاك
تكفى قلبي زايدت به مخاطر
وهذي دموعي يا حبيبي اترجاك
دنياً بلا حبك تراها مقابر
وش فايدة عمرٍ أعيشه بلياك
راجع قرارك وأرحم اللي يثابر
عايش سنينه غايته بس فرضاك
لا تحسب أن الحب نزوة مقامر
الحب حلمٍ منيتي يكون وياك
تكفى ، فديتك خل عنك المغامر
ودي أعيشك آمناً دوم فحماك
يالله حبيبي وأسعد اليوم خاطر
يبذل عشانك كل عمره ويفداك

لا اتعذر حبيبي ولا أباك إتحلف
يامليكـ(ن) ملكني في حروف أربعه

مايس القد عوده ومن نصف منتصف
به مثل خيل التبع وخلفها تبعه

من يصادفه صدفه في محاسن صدف
ينحني له تواضع ويرفع القبعه

يندهش في مفاتن بين كتف وردف
عزته واحترامه والمجد يتبعه

الجمال الحقيقي ياعرب ينعرف
في حبيبي بيانه ساسه ومنبعه

من يوصف جماله بالوصف مانصف
شل حسن الخلايق في طروف اصبعه

يوم أناظر عيونه بالصحيح أعترف
وأكشف أسرار قلبي للذي طبعه

يرني في وداده لين قلبي وكــف
وعن هوا غير شخصه صده وشبعه

يا لج قلبي لـج سـرب مـن الميـراج
ليا أصدر لأوامر قايـده واعلـن الغـاره

مع الفجر الأول عاد ضوح السفر ما أنباج
تحـرك وتـعـداده ثلاثـيـن طـيـاره

ويا والله اللي غلق الصبـر مـا يحتـاج
ولو كان عينـي بـأول الوقـت صبـاره

هواجيس قلبـي بالدقيقـه تجيـه افـواج
وعينـي شقاويـه والافكـار محـتـاره

تخالف همومي مثل ما تختلـف الأمـواج
على شاطي مـا بيـن فرضـه وعبـاره

توارد وترد القلب مـن كـل فـج وفـاج
وتقبل كما أمواج مـع ريـح صرصـاره

ليا أشتد صلف النود والبحر هاج ومـاج
تسوقه على الشاطي عواصيـف جبـاره

غريب ومشتاق وشفـق علـى المنهـاج
وسـود الليالـي تخلـف الظـن غـداره

وجودي على شوف المحبيـن يـا فـراج
وجود الكسير اللـي دنـو منـه بجبـاره

هم يحسبون المسألة كلها سلك
إذا انقطع تقطع معاه المسالك

ما دروا إني بالإحساس أبادلك
مو شرط أشوفك وأسألك كيف حالك

أحس بك لو كنت ماني مقابلك
وتحس بي و لو كنت ماني قبالك ..

تدري وش اللي بس يقطع وصلك
الموت بس الموت.. يقطع وصالك

حيل أحبك … زود عن العادة
حيل أحبك .. أحضنيني بزيادة
ضمّيني .. و ابكي .. وبكّيني
قولي .. بعد أحبك ….
ولا اقدر .. على بعدك ..
دقيقه .!!..
وش فيني !! .. أرتجف
غريبه ..
حضنك اللي ما ينوصف
صِرت أوصِفه ..
صار بارد ..
جامد .. هامد
غير عن العادة
صِرت أضم ابقوتي
كِنت .. أبي تحس .. ابمحبتي
بِكيت .. قِلت يمكن .. تِمْسح دمعتي
غريبه …
كل شي فيها ..
جامد … هامد
غير عن العاده
قلت .. خلني أغني
يمكن .. تغني
وين الصوت ؟!
اسمع سكوت !
قلت .. خلني أناظر شفاها
يمكن .. بالخجل اتردد غناها
غريبه ..
كل شي فيها ..
جامد .. هامد
غير عن العاده
مسكت بيِدي على قلبي الهايم ..
فتحت عيني ..
للأسف …. كنت نايم
وغيييير عن العاده
كانت هاذي … الوســـــادة

يا ناس وش حل الرفيق اللي يعاتب له رفيق
لا حدته الايام والدنيا على منوالها
لا تحسب ان اللي تحبه لا جرحته ما يضيق
لويستر جروحه عليك وعلته ما قالها
يا ضيق لكن مبسمه ضحاك واحجاجه طليق
لان الصداقه كنز والحسنه بعشر امثالها
والحقد في قلوب الرجال اهل الوفاء ما هو يليق
قلوبها تبقى نظيفه لو لو تغير حالها
وانا لو ابني لـ الصداقه جسر لعيون الصديق
الناس من كثر الزعل فال الله ولا فالها
العذر ما يكفي من التقدير والصده تعيق
الوصل من بين القلوب اللي تمد احبالها

نويت ابدا الكلام وكل ماقبل الكلام شعور
يموت بداخلي واخفي من اللوعة تعابيره
بنيت من الغلا قصر ومديت القصيد جسور
وقلت إنت الحبيب وكل مافي الكون لعذوره
عطيته كفي اليمنى وقلت آمر وانا با الشور
فداك العمر لو كثرت على دربك مخاسيره
نسيت إن الحكي ياصاحبي في خافق مهجور
خلي مابه إحساس ولا ذره من الغيره
عرفته قاسي جبار ومع هذا بعد مغرور
جبل لاهزه الاعصار ولا حرك محاذيره
واظن اللي جذبني له كرامة عاشق مقهور
خذا منه الزمن واجد ولا فكر بتقديره
تجاهل قلبي الشاري وهو في صدته معذور
قليل الحظ خانت به بها الدنيا مشاويره
نوى يثأر لمجنون الهوى في داخله ويثور
على ذل ملك نفسه وسيرها بتدبيره
نعم لا كانت الدنيا وهو فيها ذليل شعور
بيعلنها فراق وجعل بالفرقى مية خيره

كم يمر الوقت في ثوبٍ حزين
ويتداول قصتي شعر وحكايا
كم تحملت العنا بعقلٍ رزين
وما شكيت إلا لخلاق البرايا
لا لي أمٍّ تسمع الشكوى تعين
ولا والد يحتويني بالوصايا
باليتم عشت الزمن زينٍ وشين
سرت باخلاقٍ على دين ومزايا
وانقطع حلمٍ تحريته سنين
وما تشبعت الطفوله والحنايا
بي تمر سْنين ما بينٍ وبين
تشهد الجدران همي والزوايا
كل خوفي من ظلومٍ ما يلين
ظالمٍ جبار سوّى بي سوايا
اعتلتني علّةٍ ما تستكين
وارتسم حزني على عالي الجبين
والألم بي يستعر جمر وكوايا
كل ما فيني إلى حبل الوتين
يصرخ بونّات ما بين الخلايا
تصفق اليسرى على كف اليمين
لملم اشتاتي إذا فيني بقايا

... ألا انت سولف لي عن احوالك وخل عنك القصيد
يعني وش اللي فـي غيابـك راح اقولـه واكتبـه ؟
شعري .. على حطة يدك !! في غيبتك ما من جديد
البيت من قبـل اكتبـه .. افكـر انـي اشطبـه !!!
دامـك تعـرف ان الشعـر لا يقنعـك ولا يفـيـد
استوعب حضوري ! وهـو انسـآآه لا تستوعبـه!
ركـز معـي .. الله يرضالـي عليـك ولا تـزيـد
الهـم هـم .. وعدّنـي ضيـف ٍ نويـت توّجـبـه
ما ابيك من بعد الجفـا ترجـع لـي بقلـب ٍ بليـد
حسسني بشوقك ! ودمعك مـن عيونـك اسكبـه !

يتيمة ليل أنا ابكي وحظي ما صفالي حظ
أبات أحضن دموع الهم تنام بصدري آهاتي"
يا يمة ضايعة وآنا أدور فيك وسط الارض
رغم هذا القدر ياللي خذاك وجاب مأساتي"
يتيمة ف غيبتك يمة تركتيني وغصني غض
أفتش في بقايا الامس عن ذكرى ابتساماتي"
ذكرتي طيحتي لما بكيت وفي يديني شظ ؟
كسرتي من ضلوعك عظم ضمدتي اصاباتي"
يا يمة كبرت سنيني وشلت الهم طول وعرض
وانا مالي سوى ربي يلملم باقي شتاتي"
رحل آبوي من قبلك تركني والشعر يبيض
ابي اوصف حزن قلبي وتخذلني عباراتي"
يابوي الموت سافربك وقدرك لو نكره البعض
ومهما غبت عن عيني تعيش بوسط دمعاتي"
كأن الكون من بعدك على حلمي الكبير انقض
اسير ف بحر من غربة اقاوم موجه العاتي"
أنا قصة يتيمة قيلت ف وسط العزى وانفض
بقيت ف مجلسي وحدي ونيسي صوت صرخاتي"
اشوف الناس تنفيني وصدري بالألم مكتض
مضيت آكفكف دموعي وانزف دمع ابياتي"
يايمة ارجعي تكفين ابي احيا ابي لي نبض
يا بوي آبيك في الدنيا تلملم حزن عثراتي"
حرثت الليل وادري ما بقى يا دمعتي لي حظ
ذريت احلامي العذرى وطفت كل شمعاتي"