المهلهل..................... وحكايات الزمان

ارحل كما الغروب

وابعد كما تشاء

كان قلبي لاجلك يحمل الذنوب

تاهت بي الدروب

ولكن ( ما احد يحب اللي يبي))

الاماكن لم تعد تعرف خطواتك

والزوايا اعتادت على غيابك

الورود لم يعد عبيرها يملا المكان

الوقت تغير

السؤال لم يعد له اجابه

ولكن يبقى عزاي بصاحبي الذي ((حضر وسأل وكان حضوره ))

اغلى على من همسات نفسي

لاتسأل الوقت هذا صعب فيه السؤال
آمال تحت الثرى ماتت بليا جواب

دام الزمن والبشر في كل يومٍ بحال
مابين عودة اياب وبين رحلة ذهاب

العام : مثلك سألت العام سود الليال
ولا لقيت الجواب وشلت بعض العتاب

لني تربيت في بيئة ربوع الشمال
صدري لياضاقت الدنيا يشيل الصعاب

اخشى مع الوقت قال فلان وفلان قال
احسب لدربي اذا شديت مية حساب

لكل حادث حديث وكل واثق مقال
لو هو عدوي بخير ابذكره كان غاب

بعض البشر لو ضحك يحس في ضيق بال
لنه بليا هدف عايش بجو اكتئاب

مااصغر بعين الذي يشوفني راس مال
والحر مايستريح الا بروس الهضاب

وانا على شان ماترك للتساؤل مجال
عزاي باللي حضر . مابي حضور الغياب

ان كان مال الزمن وان كان مال العقال
ابقى على هقوتك عينك وعين الصواب

لولا اختلاف البشر ضاع الغلا والوصال
احدنٍ يخيل الثرى واحدنٍ يخيل السحاب

الله عطانا عقل ندرك حدود (الخيال)
وشلون ننسى نهارٍ به حساب وعقاب

لله وحده تعالى المنتهى والكمال
واحنا بشر والخطايا احيان حد الرقاب

ياسيد الغيد يبقى الحال طبعاً محال
اعوام عدة تجي وتروح مثل السراب

ياسيد الغيد يالوافي بكل الخصال
الظن في شاعرك ماظن في يوم خاب

ماهو بشرط الذي يخاف يكون ذال
احيان خوف الرجل يكفيه شر وعذاب

لاتلمس الجرح خل الجرح يابن الحلال
الصمت مثل الدوا الشافي لجرح المصاب

وصيةٍ شلتها من راس ذيب الرجال
ان لم تكن ذئب لاتأمن لمكر الذئاب

ياكثر ماشلت يالغالي حمولٍ ثقال
في وجه تيار وقتي كم عقلت الركاب

في صحوة الناس في حرب الفتن والضلال
الله يفتح بوجه الصادقين الف باب