ديوان الشاعر/ عبدالرزاق بطاح المطرفي

هب النسيم ودندن الفكر للقيل
وجتنا من السبق ابكارً همــايم

زرفالها بالماد يجري تقل سيل
بنات تاسـع طاويات الخـرايم

كاش نقول ولا نبي فيه تعديل
ما هو تفطن كاتبين الحــلايم

بالصدر لجن مثل صوت المخاليل
طبعن بصدري مثل طبع القسايم

يالمطرفي ولعت بالدرب قنديل
واخذت من شعرك كبار الغنايم

بالنظم ولا كايفات المواويل
تحذف على مثلك اجداد العمايم

ضيعت كل الوقت بالحط والشيل
يفوت يومي ما ضبطت النظايم

الوقت هو الوقت من غير تبديل
واللي تغــير بالرجاااال العـزايم

اول مجالسهم مثل شاطي النيل
ببيوت ما تفقل عن الضيف دايم

جلساتهم بالصبح ولا مع الليل
تلقى المقهوي بالمعاميل قايم

والخير واجد كل جيل بثر جيل
كلً عليه من اثر جـده رسـايم

النافله للي يحب التنافيل
وسوق المراجل بين بايع وسايم

ابو خالد
:::::::::::::
حييت يامرسل جزيل التماثيل
ياشاعرٍ في بحر الابداع عايم

ياللي اتذلل عاصي القاف تذليل
مافيك حيله ياقوي العزايم

شفت البكار النادرات المواحيل
اللي عليهن من طرفكم وسايم

ارحب يابوخالد على البن والهيل
ياشوق من قرنه على المتن نايم

وان كان تنشد عن طرات التعاليل
وسوالفٍ فيها اعلوم وغنايم

راحت يابوخالد مراح الهماليل
مع الرجال الطيبين القدايم

اللي سوالفهم بعيده عن الميل
وخويهم دايم براس السنايم

وسوالفٍ فيها اشهود ودواليل
ويابعدهم عن الردى والظلايم

ولا زمنا اليوم يانافل الجيل
قامت تعلا فيه روس الهلايم

ياالله يامنزل تبارك مع الفيل
يارب عفوك من لهيب السمايم

والمعذره وان كان بالقول تقليل
ورجى السموحه يالرجال الفهايم


مجاراه متواضعه جداً لخوي ابوخالد
عبدالرزاق المطرفي