ديوان الشاعر/الأطرق بن بدر الهذال

للعيد فرحـه وعنـدي دوم مـوؤده
مدري علام الفرح بالعيـد يجفانـي


يازين عيدي ونور العيـن موجـوده
وياكثر همّـي بعيـدي دون خلانـي


فواز خلّي نساني واخلـف عهـوده
وشفيه يخلف عهـوده ويتناسانـي


سافر حبيبي وخـلا الكبـد ملهـوده
من عدة سنين ولا منه الخبر جانـي


مايدري اني بنيت احـلام بوعـوده
وسهرت ليلي وهمّـه حيـل عنانـي


حرمت نفسي من الدنيا على مـوده
وضحيت لأجله بغيره يابن غسلانـي


قلبي وصل في غرامه لآخر حـدوده
متربـعٍٍ بالغـلا بأعمـاق وجدانـي


علمي بشوفه على أول زمّة نهـوده
بدر الطعش صاحبي مدعوج الأعياني


كل ماأتذكر جماله لاارتكـز عـوده
تذرف دموعي عليه وتكثر أحزانـي


ياويل قلبي سبتني حمـرة خـدوده
مقّدر اوصّف جماله . شـي فتانـي


ياليت منهو سلك مع خـط سامـوده
لأرض اخو مريم وعيّد يومه الثانـي


ويشوف خلّه ولوهي ايـام معـدوده
يسعد بشوفة حبيبه والعمـر فانـي


كانه على العهد مالي يمكـم عـوده
اعيش معه وبـلاده ثانـي اوطانـي


وكانه تغيّر بسبـة هـرج حاسـوده
ابقطع حبال وصله يابـن غسلانـي