ديوان الشاعر/عويد كسار (بحر القصيد)

(الكوبرا والناي ) ماهو طرب ترقص ولا تعشق الناي سم(ن) يـّرقص روس ذيك الأفاعي يميل راس الكوبرا واجبر اخطاي رهن الغلا والعشق رهن استماعي وكـل(ن) على ليلاه غـنّا وليلاي غنيتها بـعيـون ليلـى وداعـي وغنيتها رايح واغني لـها جـاي وغنيتها مجنون صـاحي وواعي وغـنيتها يـالـيل دانه ويـامـاي وهيجنتها مـوال رحلـة ضياعي يـاعـاذلي مهـما تنفس لـبلواي رغـم الهـوى ضيّعت كل المساعي صمتي وصوت الليل يبعد لرجواي واسمع نحيب الـناي دون انقطاعي وأعزف لها مجنون ليلى من أقصاي لامن سرى الساري على ناي راعي صوت الوفا والشعر خذني كما الناي والحقـد وقّـف روس ذيـك الأفاعي بحر القصيد~

(جنون العبقريه) تدري ان العبقريه آخر حدود الجنون=وآخر حدود الصحاوه من جنون العبقريه وآخر حدود المحبه والسوالف بالعيون=وآخر حدود القصايد والليالي سرمديه وفوق حد الفن يعني ارسمي من دون لون=وفوق حد اللون يعني سيلي دمعك عليه وآخر حدود المشاعر يسرحون ويمرحون=مابقى ياكود واحد كمل المجنون ميه وآخر حدود المصايب لازبنتيني تهون=والله انك مازبنتي غير عرق الوايليه الحدب سيفٍ يسولف والجماجم يسكتون=همهمت صوت الجماجم بين ذيك وبين ذيه وآخر حدود العواذل ياقفون ويقعدون=شفت كيف الكون واقف ميتٍ بقلوب حيه وآخر حدود التفاؤل في سمايه والمزون=بارقٍ وأزريت اخيله بالسهول الجرهديه بحر القصيد

(قرص الشمس) كن قرص الشمس خدك لاتأملت الغروب ذبت معها والمحبه ذوبتني بالعذاب ماانتي أول من تركني في متاهات الدروب قبلك سنيني وحظي والعزا بأكبر مصاب والزمان اللي تبسم هو عدو والا محبوب كم واحد تتضح لي صورته خلف الضباب القلوب أقفال لاكن وين مفتاح القلوب ماجبرتك بالمحبه دام تهوى الانسحاب الخطا واكبر خطايه عن وفايه كيف اتوب لاتسل سيوف غدرك مع سنين الأكتئاب ماانقطع وصل المحبه غير من حلف الكذوب عاذل(ن) بيني وبينك يالغلا ودّا وجاب جذع نخلٍ يوم هبت من شمال ومن جنوب دمعي اللي ماسقاها غير من وبل السحاب ارحلي ماني لحالي واقفٍ وقت الغروب كل عقدن في يميني من ردى حظي تراب . . . بحر القصيد~

(ويل الرصد) ياصاحبي كم قلت ضاقت وضاقت واربع جهات الكون ضاقت بالآفاق والياصحت من نومها واستفاقت ياشين وجهك يالزمن قبل الأشراق نصف القطر بالأرض يومٍ تلاقت والنصف الآخر محرقٍ كل الأوراق ونصف العمر مبيوق والناس باقت كم واحدن يسرق من الناس خفاق كم مرةٍ عدت ومرت وفاقت طاحت ولاادري وين طاحت بالأعماق كسرة نجم من دمعة العين واقت ويل الرصد لاطاح من جمر الأحداق بأقصى محيط الهم تكـّة وراقت في منجم سنين الأسى تحت الأنفاق عكـّز على رجل القلم لين عاقت حظ ٍغدى مشلول ماقوم الساق ومن بارق المنشا زمى الغيم ساقت بيت السحاب اللي بنا ظلـّه رواق ياصاحبي كم قلت ضاقت وضاقت وهانت علي سبحان قسام الأرزاق . . . بحر القصيد~

(قاف عنزه)

ياحر مثلك نادرين وقلايل=قاف عنزه من فوق راس الطويله
نرفع لك البيضاء بروس النثايل=صوت الفخر منصور عز القبيله
من طنخة العليا على عز وايل=برق السيوف اللآمعات الصقيله
مترفعٍ ماجيت يم الهزايل=من عادتك ياحر صيد الجزيله
شوق الهنوف اللي تقظ الجدايل=أم العيون الناعسات الكحيله
اخت النقى بنت الشرف والحمايل=اللي على شانك تقظ الجديله
تحشم عن اللي يبني البيت مايل=ماهو عزاز القاع جرفٍ يهيله
لو كثرة الشعار تملا الطوايل=ماعاد شكل الأمسيه مستطيله
في مسرح الشعار سوى الهوايل=من بؤرة الزلزال يودي صميله
اللي مدح بفلان وفلان عايل=واللي فصخ ثوب الحيا عن شليله
واصل الشعر تاريخ فعل القبايل=ثقل الحمول الكايده من يشيله
يوم انها مابين صايل وجايل=حتى الحجر ماعاد يقدح بليله
الا مع الويلان شبّت فتايل= من حافر كحيلان قدح الفتيله
أبك انت مثلك نادرين وقلايل=فيك أربعين من الشبه مستحيله
نرفع لك البيضاء بروس النثايل=قاف عنزه من فوق راس الطويله

بحر القصيد~

( طاحة اللوحه على الماء ) للســـفر قطعة عذاب ولاتــــعديت الشــــــمـال مــن ديـــار طريف حتى وقّــّفت بجبال سلمى والــفراغ اللي تركـــته بين طـــيات الســــؤال مـبهـم ٍحـد الأجابه ماأنجـرح بسيوف ثلـمى طاحت اللوحه على الماء واجمل الألوان سال ومرسم الريشه تبعثر عادة الألوان بالـماء كم لون ولون بالماء عكس صوره باالخيال وكم لون ولون بالماء عكس صوره حيل ظلمى الصباح اللي تنــفس بالمطر والغصـــن مال والزهور اللي تكلم عند صوت الريح بلمى شجرة العرجون تشرب من عطش موت الرمال ولنــقطع مسباح شاعر تنمحي مليون كلمى كل حر (ن) في جناحه وجهة الهجره شمال من عشق رجم الحماده مانزل بجبال سلمى

[TABLETEXT="width:80%;background-color:blacborder:6px double blac"]

[TABLETEXT="width:80%;background-color:blacborder:6px double blac"]

[TABLETEXT="width:80%;background-color:blacborder:6px double blac"]

(مـرثـيّـه)

رحماك يامنشي مخايل حقوقه=من بعد موت العود تحيي عروقه
من كل صوب وصوب مزن ٍ تردم=ملائكـه والريح بأمرك تسـوقــه
ورحماك يامنشي صدوق المخايل=حكم القدر والموت كل ٍ يذوقه
عند الولي مكتوب في لوح الاقدار=كم ساعةٍ من روح عمرك تبوقه
طرقي على الدنيا والايام تمشي=واليوم لامن راح يعلن نفوقه
كم واحدن يجمع يبي ثروة المال=والمال يفنى دون الاعمال سوقه
وانا عزايه ماانجبر في عضيدي=نصيبةٍ غـِزت على القبر فوقه
يالــيتني ياخوك فــاقــد يميني=والا طريح فراش رجله تعوقه
والا بدويٍ راح عمره من النوق=ماخذ صبوحه من زهاب وغبوقه
له عزوتن ماخاف حنشل زمانه=هجاد ليل ٍ واصبح بدون نوقه
ويسقيك من وبل السحابه مطرها=ومن دمعي اللي يحرق العين موقه
ويرحمك ربٍ مستوي فوق عرشه=اللي رحم بالقاع ميت عروقه

بحر القصيد~