ديوان الشاعر المبدع / سعود فرحان الرويلي

بسم الله الرحمن الرحيم

إفتتاح ديوان للشاعر المبدع : سعود فرحان الرويلي

فمرحباً بكم ..

إليكم شيء من البوح نرجو القبول بحثت عن مخرج لدرب المتاهه .... ..//.. مليت بحث ولالقيت المخارج ظهر لي إن الصبر نصفه بلاهه .... ..//.. وإن الجحود بشرع الايام دارج وإن الحكي من دون معنى سفاهه ... ..//.. وإن الخطا يعطي عذر للخوارج وإن البحر مهما تهادن مياهه .... ..//.. لاهاج مافكّر بوضع البوارج وإن النظر لاصار مبلي بعاهه .... ..//.. ماهوب متمعّن بذات المعارج وإن الوطن صدق إنتماء ونزاهه .... ..//.. ماهو حكي في حلق هارج ومارج وإن النّفاق أبلغ صفه للتّفاهه .... ..//.. وإن المنافق ماهو ل ضيق فارج وإن الّذي ماهو نزيه إتّجاهه .... ..//.. يهبط على كيفه بكلّ المدارج وإن القصيد أصبح نفاق ووجاهه .... ..//.. والدّاخل بعالم معانيه خارج وانا هنا واقف بنصّ المتاهه .... ..//.. ضاع الدّليل ولالقيت المخارج دمتم بخير ....

بسم الله الرحمن الرحيم
السلام عليكم ورحمة الله وبركاته

إلى الصديق الذي كسره الزمن

ترنيمة ألم ,,,

مدخل /

لم صبرك وقم ياشايبي ....
لايجي واحدٍ ماله رفيق
مالقيت بزماني غايبي ....
مايعرف العمى وجه الطريق

على الرغم إن ضيق المهزله فعلاً مهو معقول
..//.. وعلى رغم إن جلاّد السهر ماطاح من طوله
وعلى رغم الفراغ اللي يتل الروح للمجهول
..//.. وعلى رغم إن تفكير المحنّك ضاعت حلوله
هنا يبلغ جحود الوقت حد العرف والمعقول
..//.. هنا يستوطن الظلم الكئيب ويقرع طبوله
مدام إن الزمن يرسل لكسرة صاحبي مرسول
..//.. ألا تبّت يد المرسل وتبّ وتبّ مرسوله
وإذا المال الغبي توّج على راس الزمان ذيول
..//.. فـ تبّ المال تبّ المال تبّ وتبّت ذيوله
وإذا عصم الشّوارب حدّهم وقت الرّدا لـ خبول
..//.. فـ حسبك يازمن من كثر ضعفه توّج خبوله
نعم ياوقت لو تجلس خطأ هاك الحكي معدول
..//.. تعلّم من مواجع هـ الجسد وإفهم من إنحوله
نعم دكّت طواحين الزمن ماعاد فيه إحلول
..//.. وكثر اللّت والعجن الغبي ياراس وشّوله

مخرج /
ما أقترف من ذنوبي تايبي ..... غير ونّه على كسرة صديق

دمتم بخير ,,,,,,

بسم الله الرحمن الرحيم

السلام عليكم ورحمة الله وبركاته





مرت البارح شوارعك في تسديد دين ..
عاصفه من فوح روحي مع الثلث الأخير
هاك ماعندي عن الوضع لو خاطرك شين ..
واعتبر غيرك على حق لو عقله صغير
ياقليل الفود لاهل الحكي مليون عين ..
لاتحسْب إنك لوحدك بخلق الله بصير
ضاقت فجوج السوالف على( هامان) لين ..
سب ( فرعونه ) وجاب العلوم من الأخير
وأطبقت على ضلوعه سفوح الأخشبين ..
وإختلف عن رد الأنفاس وإجتاحه زفير
يوم شيطان الخطيئه سئل غاويه وين ..
ماعرف وجه الإجابه ولا وين المطير
يرفل( بعهر) النوايا وعقله بين بين ..
ماعرف ( طهر ) الجماله ولا صحوة ضمير
كم فتح لاهل الشماته مجال بحاجتين ..
طعنة الصاحب من الخلف/ وخيانة قصير
من يعلَم ( حامل المسك) دام المسك زين ..
إنه بهـ الوقت الأقشر غدا ( نفَاخ كير )



دمتم سالمين</b></i>

ياكثر الاضلاع كان السالفه للضلوع
مار البلى ان كان ماعند العرب سالفه
.
لا هز غصن الرجا وقت المعاناه جوع
ماغير سحنة شحوب لهقوتن تالفه
.
ياكثر ماملت مع ريح الامل دون طوع
يشطح بي الراي واصبر وارجع اخالفه
.
لو كانت النار تدري وش مصير الشموع
ما اعطت لحر اللهب تصريح ماتخالفه
.
وانا ليا رحت لاترجي ورايه رجوع
بي هقوتن عن معاذير الشقا حالفه
.
ما احب أعيد النظر واكره دروب الخضوع
لي طبع عيت طباع العالم توالفه
.
تركض مقاسيم حظي يم شين الطبوع
واسكت لو ان الرجا يطلع مع الخالفه.
.
.

دمتم سالمين

ديوان مميز وقصائد رائعه كروعة شاعرها


سعود فرحان الرويلي

شاعر غني عن التعريف وقصائده تستحق المتابعه

صح لسانك اخوي سعود ولا هنت اخوي فايز على طرح الديوان

سيد الحرف العبدلي

لاتلمني على طبعي فإن .....................

طبعي كطبع الغانمينا !!!!!!!!!!!!!

لهم في وقفت العز سهم ............
كما لي وقفت في المغرمينا

لو كانت النار تدري وش مصير الشموع
ما اعطت لحر اللهب تصريح ماتخالفه


صح السانك
وديوان مميز على قلت القصايد ياليت تكملها
تحياتي والله الموفق

ياكثر الاضلاع كان السالفه للضلوع
مار البلا انكان ماعند العرب سالفه
،،،
مالقيت بزماني غايبي
ـــ مايعرف العمى وجه الطريق
"
ضاقت فجوج السوالف على هامان لين؟
ــ سب (فرعونه) وجاب العلوم من الأخير !!
:
اذا عصم الشّوارب حدّهم وقت الرّدا لخبول
ــ فـ حسبك يازمن من كثر ضعفه توّج خبوله
،،،
ظهر لي إن الصبر نصفه بلاهه
وإن الجحود بشرع الايام دارج
وإن الحكي من دون معنى سفاهه
وإن الخطا يعطي عذر للخوارج
وإن الوطن صدق إنتماء ونزاهه
ماهو حكي في حلق هارج ومارج
وإن القصيد أصبح نفاق ووجاهه
والدّاخل بعالم معانيه خارج//

لله درك

هنا شعر

وابداع وتميز

دمت مبدعاً يابعدي